ਨਵਜੋਤ ਸਿੱਧੂ ਵਲੋਂ ਮੈਰਾਥਨ ਮੀਟਿੰਗਾਂ ਜਾਰੀ

ਚਾਰ ਜ਼ਿਲਿ੍ਹਆਂ ਦੇ ਆਗੂਆਂ ਤੋਂ ਇਲਾਵਾ ਦਲਿਤ ਆਗੂਆਂ ਤੇ ਵਿਧਾਇਕਾਂ ਨਾਲ ਕੀਤੀਆਂ ਮੀਟਿੰਗਾਂ

ਚੰਡੀਗੜ੍ਹ, 30 ਜੁਲਾਈ (ਗੁਰਉਪਦੇਸ਼ ਭੁੱਲਰ) : ਪੰਜਾਬ ਕਾਂਗਰਸ ਪ੍ਰਧਾਨ ਨਵਜੋਤ ਸਿੱਧੂ ਵਲੋਂ ਪ੍ਰਧਾਨਗੀ ਦਾ ਅਹੁਦਾ ਸੰਭਾਲਣ ਬਾਅਦ ਪਾਰਟੀ ਆਗੂਆਂ ਤੇ ਕਾਰਕੁਨਾਂ ਨਾਲ ਮੀਟਿੰਗਾਂ ਦਾ ਸਿਲਸਿਲਾ ਜਾਰੀ ਹੈ | ਬੀਤੇ ਦਿਨੀਂ ਦੋਆਬਾ ਦੇ ਜ਼ਿਲਿ੍ਹਆਂ ਦੇ ਆਗੂਆਂ ਤੇ ਵਿਧਾਇਕਾਂ ਨਾਲ ਮੀਟਿੰਗ ਤੋਂ ਬਾਅਦ ਅੱਜ ਪੰਜਾਬ ਕਾਂਗਰਸ ਭਵਨ ਚੰਡੀਗੜ੍ਹ ਪਹੁੰਚ ਕੇ ਪੂਰਾ ਦਿਨ ਮੀਟਿੰਗਾਂ ਕੀਤੀਆਂ | ਉਨ੍ਹਾਂ ਨਾਲ ਕਾਰਜਕਾਰੀ ਪ੍ਰਧਾਨ ਕੁਲਜੀਤ ਨਾਗਰਾ, ਸੁਖਵਿੰਦਰ ਸਿੰਘ ਡੈਨੀ ਵੀ ਮੌਜੂਦ ਰਹੇ |
ਅੱਜ ਚੰਡੀਗੜ੍ਹ 'ਚ ਉਨ੍ਹਾਂ ਚਾਰ ਜ਼ਿਲਿ੍ਹਆਂ ਰੋਪੜ, ਮੋਹਾਲੀ, ਫ਼ਤਿਹਗੜ੍ਹ ਸਾਹਿਬ ਅਤੇ ਮਲੇਰਕੋਟਲਾ ਦੇ ਆਗੂਆਂ ਤੇ ਵਰਕਰਾਂ ਨਾਲ ਮੀਟਿੰਗ ਕੀਤੀ | ਇਸ 'ਚ ਉਨ੍ਹਾਂ ਤੋਂ ਪਾਰਟੀ ਦੀ ਮਜ਼ਬੂਤੀ ਅਤੇ 2022 ਦੀਆਂ ਚੋਣਾਂ 'ਚ ਪਾਰਟੀ ਦੀ ਸਫ਼ਲਤਾ ਲਈ ਸੁਝਾਅ ਲਏ | ਇਸ ਦੇ ਨਾਲ ਹੀ ਉਨ੍ਹਾਂ ਦੀਆਂ ਸਮਸਿਆਵਾਂ ਤੇ ਮੰਗਾਂ ਦੀ ਜਾਣਕਾਰੀ ਵੀ ਹਾਸਲ ਕੀਤੀ | ਸਿੱਧੂ ਨੇ ਪਾਰਟੀ ਆਗੂਆਂ ਤੇ ਕਾਰਕੁਨਾਂ ਨੂੰ  2022 ਦੀ ਸਫ਼ਲਤਾ ਲਈ ਹੁਣੇ ਤੋਂ ਇਕਜੁਟ ਹੋ ਕੇ ਤਿਆਰੀ 'ਚ ਜੁਟ ਜਾਣ ਦਾ ਸੱਦਾ ਦਿਤਾ ਹੈ | ਉਨ੍ਹਾਂ ਇਹ ਵੀ ਭਰੋਸਾ ਦਿਤਾ ਕਿ ਪਾਰਟੀ ਆਗੂਆਂ ਤੇ ਮੈਂਬਰਾਂ ਦਾ ਮਾਨ-ਸਨਮਾਨ ਬਹਾਲ ਕਰਵਾਉਣਾ ਮੇਰੀ ਜ਼ਿੰਮੇਵਾਰੀ ਹੈ | 
ਅੱਜ ਦੀਆਂ ਮੀਟਿੰਗਾਂ 'ਚ ਅਹਿਮ ਮੀਟਿੰਗ ਦਲਿਤ ਵਿਧਾਇਕਾਂ ਤੇ ਆਗੂਆਂ ਦੀ ਰਹੀ | ਇਸ 'ਚ ਮੰਤਰੀ ਅਰੁਨਾ ਚੌਧਰੀ ਤੋਂ ਇਲਾਵਾ ਦਲਿਤ ਵਰਗ ਨਾਲ ਸਬੰਧਤ ਕਾਂਗਰਸੀ ਵਿਧਾਇਕ ਰਾਜ ਕੁਮਾਰ ਵੇਰਕਾ, ਡਾ. ਰਾਜ ਕੁਮਾਰ ਚੱਬੇਵਾਲ, ਕੁਲਦੀਪ ਸਿੰਘ ਵੈਦ, ਨੱਥੂ ਰਾਮ, ਲਖਵੀਰ ਲੱਖਾ ਆਦਿ ਸ਼ਾਮਲ ਸਨ | ਇਸ ਮੀਟਿੰਗ ਤੋਂ ਬਾਅਦ ਇਸ 'ਚ ਸ਼ਾਮਲ ਕਈ ਮੈਂਬਰਾਂ ਨੇ ਦਸਿਆ ਕਿ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਵਲੋਂ ਦਲਿਤਾਂ ਦੇ ਬਜਟ ਲਈ ਐਸ.ਸੀ. ਭਲਾਈ ਐਕਟ ਬਣਾਉਣ ਦੇ ਕੀਤੇ ਐਲਾਨ ਅਤੇ ਬੇਜ਼ਮੀਨੇ ਮਜ਼ਦੂਰਾਂ ਦੀ ਕਰਜ਼ਾ ਮਾਫ਼ੀ ਦੇ ਫ਼ੈਸਲਿਆਂ ਦੀ ਮੀਟਿੰਗ 'ਚ ਸ਼ਲਾਘਾ ਕਰਦਿਆਂ ਖ਼ੁਸ਼ੀ ਦਾ ਪ੍ਰਗਟਾਵਾ ਕੀਤਾ ਗਿਆ ਹੈ | ਡਾ. ਰਾਜ ਕੁਮਾਰ ਚੱਬੇਵਾਲ ਨੇ ਕਿਹਾ ਕਿ ਪੰਜਾਬ ਐਸ.ਸੀ. ਵੈਲਫ਼ੇਅਰ ਐਕਟ ਬਣਾਉਣ ਵਾਲਾ ਦੇਸ਼ ਦਾ ਪਹਿਲਾ ਸੂਬਾ ਹੋਵੇਗਾ ਅਤੇ ਹੋਰਨਾਂ ਰਾਜਾਂ ਨੂੰ  ਦਲਿਤ ਭਲਾਈ ਲਈ ਨਵਾਂ ਰਾਹ ਵਿਖਾਇਆ ਹੈ | ਰਾਜ ਕੁਮਾਰ ਵੇਰਕਾ ਨੇ ਕਿਹਾ ਕਿ ਅੱਜ ਦੀ ਮੀਟਿੰਗ 'ਚ ਦਲਿਤ ਮਸਲਿਆਂ ਬਾਰੇ ਸਾਰਥਕ ਵਿਚਾਰ ਚਰਚਾ ਹੋਈ ਹੈ ਅਤੇ ਸਰਕਾਰ ਤੇ ਪਾਰਟੀ ਮਿਲ ਕੇ ਮਸਲੇ ਹੱਲ ਕਰਨਗੇ | ਕੁਲਦੀਪ ਸਿੰਘ ਵੈਦ ਨੇ ਕਿਹਾ ਕਿ ਮੀਟਿੰਗ 'ਚ ਸਿੱਧੂ ਨੇ ਦਲਿਤ ਮਸਲਿਆਂ ਬਾਰੇ ਸੱਭ ਦੇ ਵਿਚਾਰ ਸੁਣੇ ਹਨ ਅਤੇ ਮਸਲਿਆਂ ਦਾ ਹੱਲ ਕਰਵਾਉਣ ਦਾ ਭਰੋਸਾ ਦਿਤਾ ਹੈ | 
ਮੀਟਿੰਗ 'ਚ ਰਾਖਵੇਂਕਰਨ ਸਬੰਧੀ ਸੰਵਿਧਾਨ ਦੀ 85ਵੀਂ ਸੋਧ ਲਾਗੂ ਕਰਵਾਉਣ ਲਈ ਵੀ ਸਿੱਧੂ ਨੇ ਪਹਿਲ ਦੇ ਆਧਾਰ 'ਤੇ  ਯਤਨ ਕਰਨ ਦਾ ਵਾਅਦਾ ਕੀਤਾ | ਮੀਟਿੰਗ 'ਚ ਦਲਿਤ ਵਰਗ ਨੂੰ  ਸਰਕਾਰ ਤੇ ਇਸ ਦੇ ਬੋਰਡਾਂ, ਨਿਗਮਾਂ 'ਚ ਆਬਾਦੀ ਤੇ ਵਿਧਾਇਕਾਂ ਦੀ ਗਿਣਤੀ ਦੇ ਹਿਸਾਬ ਨਾਲ ਪ੍ਰਤੀਨਿਧਤਾ ਦਿਵਾਉਣ ਲਈ ਵੀ ਸਾਰੇ ਵਿਧਾਇਕ ਤੇ ਆਗੂ ਇਕਮਤ ਸਨ |