ਰਾਜਕੋਟ ਦੇ ਕੋਵਿਡ ਹਸਪਤਾਲ 'ਚ ਲੱਗੀ ਅੱਗ, ਪੰਜ ਮਰੀਜ਼ਾਂ ਦੀ ਮੌਤ

ਅਹਿਮਦਾਬਾਦ, 27 ਨਵੰਬਰ: ਗੁਜਰਾਤ ਦੇ ਰਾਜਕੋਟ ਸ਼ਹਿਰ ਵਿਚ ਵੀਰਵਾਰ ਦੇਰ ਰਾਤ ਨੂੰ ਨਾਮਜ਼ਦ ਕੋਵਿਡ -19 ਹਸਪਤਾਲ ਦੇ ਆਈਸੀਯੂ ਵਿਚ ਪੰਜ ਮਰੀਜ਼ਾਂ ਦੀ ਮੌਤ ਹੋ ਗਈ।
ਅੱਗ ਬੁਝਾਊ ਵਿਭਾਗ ਦੇ ਇਕ ਅਧਿਕਾਰੀ ਨੇ ਦਸਿਆ ਕਿ 26 ਹੋਰ ਮਰੀਜ਼ ਜਿਨ੍ਹਾਂ ਦਾ ਹਸਪਤਾਲ ਵਿਚ ਕੋਰੋਨਾ ਵਾਇਰਸ ਦਾ ਇਲਾਜ ਚੱਲ ਰਿਹਾ ਸੀ, ਨੂੰ ਸੁਰੱਖਿਅਤ ਬਚਾ ਲਿਆ ਗਿਆ ਹੈ। ਉਨ੍ਹਾਂ ਸਾਰਿਆਂ ਨੂੰ ਦੂਜੇ ਹਸਪਤਾਲਾਂ ਵਿਚ ਦਾਖ਼ਲ ਕਰਵਾਇਆ ਗਿਆ ਹੈ।
ਫਾਇਰ ਵਿਭਾਗ ਦੇ ਅਧਿਕਾਰੀ ਜੇ. ਬੀ. ਥੇਵਾ ਨੇ ਦਸਿਆ ਕਿ ਅੱਗ ਵੀਰਵਾਰ ਦੇਰ ਰਾਤ ਕਰੀਬ ਸਾਢੇ 12 ਵਜੇ ਆਨੰਦ ਬੰਗਲੋ ਚੌਕ ਵਿਖੇ ਸਥਿਤ ਚਾਰ ਮੰਜ਼ਿਲਾ ਉਦਿਆ ਸ਼ਿਵਾਨੰਦ ਹਸਪਤਾਲ ਵਿਚ ਪਹਿਲੀ ਮੰਜ਼ਿਲ ਦੇ ਆਈਸੀਯੂ ਵਿਚ ਲੱਗੀ। ਇਥੇ ਕੁਲ 31 ਮਰੀਜ਼ਾਂ ਨੂੰ ਦਾਖ਼ਲ ਕੀਤਾ ਗਿਆ ਸੀ।
ਗੁਜਰਾਤ ਦੇ ਮੁੱਖ ਮੰਤਰੀ ਵਿਜੇ ਰੁਪਾਨੀ ਨੇ ਇਸ ਘਟਨਾ 'ਤੇ ਦੁੱਖ ਪ੍ਰਗਟ ਕੀਤਾ ਅਤੇ ਇਸ ਦੀ ਜਾਂਚ ਦੇ ਆਦੇਸ਼ ਦਿਤੇ। ਉਨ੍ਹਾਂ ਨੇ ਮ੍ਰਿਤਕਾਂ ਦੇ ਪਰਵਾਰਾਂ ਨੂੰ 4-4  ਲੱਖ ਰੁਪਏ ਮੁਆਵਜ਼ਾ ਦੇਣ ਦਾ ਐਲਾਨ ਵੀ ਕੀਤਾ ਹੈ।
ਰਾਜਕੋਟ ਦੇ ਪੁਲਿਸ ਕਮਿਸ਼ਨਰ ਮਨੋਜ ਅਗਰਵਾਲ ਨੇ ਕਿਹਾ ਕਿ ਆਈਸੀਯੂ ਵਿਚ ਦਾਖ਼ਲ 11 ਮਰੀਜ਼ਾਂ ਵਿਚੋਂ ਪੰਜ ਦੀ ਅੱਗ ਕਾਰਨ ਮੌਤ ਹੋ ਗਈ। ਅੱਗ ਬਾਕੀ ਮੰਜ਼ਲਾਂ ਤਕ ਫੈਲਣ ਤੋਂ ਪਹਿਲਾਂ ਇਸ ਨੂੰ ਕਾਬੂ ਕਰ ਲਿਆ ਗਿਆ ਸੀ। ਰਾਜ ਦੇ ਉਪ ਮੁੱਖ ਮੰਤਰੀ ਨਿਤਿਨ ਭਾਈ ਪਟੇਲ ਨੇ ਕਿਹਾ ਕਿ ਆਈਸੀਯੂ ਵਾਰਡ ਵਿਚ ਦੇਰ ਰਾਤ 12:30 ਵਜੇ ਅੱਗ ਲੱਗੀ ਅਤੇ ਫਾਇਰ ਵਿਭਾਗ ਨੇ ਲਗਭਗ ਅੱਧੇ ਘੰਟੇ ਵਿਚ ਇਸ ਨੂੰ ਕਾਬੂ ਕਰ ਲਿਆ। ਕੋਰੋਨਾ ਵਾਇਰਸ ਨਾਲ ਸੰਕਰਮਿਤ ਤਿੰਨ ਮਰੀਜ਼ਾਂ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ ਜਦਕਿ ਦੂਜੇ ਦੋ ਮਰੀਜ਼ਾਂ ਨੇ ਉਸ ਸਮੇਂ ਦਮ ਤੋੜਿਆ ਜਦੋਂ ਉਨ੍ਹਾਂ ਨੂੰ ਕਿਸੇ ਹੋਰ ਹਸਪਤਾਲ ਲਿਜਾਇਆ ਜਾ ਰਿਹਾ ਸੀ।
ਪਟੇਲ ਨੇ ਕਿਹਾ ਕਿ ਇਸ ਹਾਦਸੇ ਵਿਚ ਕੋਈ ਹੋਰ ਜ਼ਖ਼ਮੀ ਨਹੀਂ ਹੋਇਆ। ਬਾਕੀ 26 ਮਰੀਜ਼ਾਂ ਨੂੰ ਹੋਰ ਹਸਪਤਾਲਾਂ ਵਿਚ ਦਾਖ਼ਲ ਕਰਵਾਇਆ ਹੈ। (ਪੀਟੀਆਈ)
ਉਨ੍ਹਾਂ ਕਿਹਾ ਕਿ ਮੁਢਲੀ ਜਾਂਚ ਤੋਂ ਪਤਾ ਲਗਦਾ ਹੈ ਕਿ ਅੱਗ ਇਕ ਵੈਂਟੀਲੇਟਰ ਵਿਚਲੀ ਸ਼ਾਟ-ਸਰਕਟ ਕਾਰਨ ਲੱਗੀ ਸੀ। ਐਨਓਸੀ ਨਿਜੀ ਹਸਪਤਾਲ ਨੇੜੇ ਸੀ। ਨਾਲ ਹੀ, ਅੱਗ ਬੁਝਾਉਣ ਦੇ ਸਾਰੇ ਉਪਕਰਣ ਹਸਪਤਾਲ ਵਿਚ ਮੌਜੂਦ ਸਨ।
ਮੁੱਖ ਮੰਤਰੀ ਦਫ਼ਤਰ ਨੇ ਇਕ ਬਿਆਨ ਵਿਚ ਕਿਹਾ ਕਿ ਸੀਨੀਅਰ ਆਈਏਐਸ ਅਧਿਕਾਰੀ ਏ.ਕੇ. ਕੇ. ਰਾਕੇਸ਼ ਮਾਮਲੇ ਦੀ ਜਾਂਚ ਕਰੇਗਾ। ਅਧਿਕਾਰੀਆਂ ਨੇ ਦਸਿਆ ਕਿ ਹਾਦਸੇ ਵਿਚ ਮਾਰੇ ਗਏ ਮਰੀਜ਼ਾਂ ਦੇ ਨਾਮ ਰਾਮ ਸਿੰਘ, ਨਿਤਿਨ ਬਦਾਨੀ, ਰਸਿਕਾ ਅਗਰਵਤ, ਸੰਜੇ ਰਾਠੌੜ ਅਤੇ ਕੇਸ਼ੂ ਅਕਬਰੀ ਹਨ। (ਪੀਟੀਆਈ)