ਉਨ੍ਹਾਂ ਪੰਜਾਬ ਸਰਕਾਰ ਦਾ ਧਨਵਾਦ ਕਰਦਿਆਂ ਆਖਿਆ ਕਿ ਸਾਡੇ ਪਿੰਡ ਦੇ ਪ੍ਰਾਇਮਰੀ ਸਕੂਲ ਦਾ ਨਾਮ ਬਦਲ ਕੇ ਮੇਰੇ ਪਿਤਾ ਸ਼ਹੀਦ ਮੇਜਰ ਸਿੰਘ ਫ਼ੌਜੀ ਦੇ ਨਾਂਅ 'ਤੇ ਰਖਿਆ ਜਾ ਰਿਹੈ
Kot Kapura News: ਸ਼ਹੀਦ ਮੇਜਰ ਸਿੰਘ ਫ਼ੌਜੀ ਦੀ ਸ਼ਹੀਦੀ ਮੌਕੇ ਉਸ ਦੇ ਪੁੱਤਰ ਰੁਪਿੰਦਰ ਸਿੰਘ ਧਾਲੀਵਾਲ ਵਾਸੀ ਪਿੰਡ ਸੇਢਾ ਸਿੰਘ ਵਾਲਾ ਦੀ ਉਮਰ ਮਹਿਜ਼ 3 ਮਹੀਨੇ ਸੀ, ਮਾ. ਰੁਪਿੰਦਰ ਸਿੰਘ ਧਾਲੀਵਾਲ ਨੇ ਦਸਿਆ ਕਿ ਮੇਰੀ ਮਾਤਾ ਦਾ 60 ਸਾਲਾਂ ਬਾਅਦ ਇਕ ਸੁਪਨਾ ਪੂਰਾ ਹੋਇਆ, ਜੋ ਹੁਣ ਪੰਜਾਬ ਸਰਕਾਰ ਵਲੋਂ 1965 ਦੀ ਜੰਗ ਵਿਚ ਸ਼ਹੀਦ ਹੋਏ ਫ਼ੌਜੀਆਂ ਦਾ ਨਾਮ ਉਨ੍ਹਾਂ ਦੇ ਪਿੰਡਾਂ ਦੇ ਸਕੂਲਾਂ ਵਿਚ ਰਖਿਆ ਜਾ ਰਿਹਾ ਹੈ।
ਉਨ੍ਹਾਂ ਕਿਹਾ ਕਿ ਭਾਵੇਂ ਅੱਜ ਮੇਰੀ ਮਾਤਾ ਜੀ ਇਸ ਦੁਨੀਆਂ ਨੂੰ ਅਲਵਿਦਾ ਕਹਿ ਗਏ ਹਨ। ਉਨ੍ਹਾਂ ਪੰਜਾਬ ਸਰਕਾਰ ਦਾ ਧਨਵਾਦ ਕਰਦਿਆਂ ਆਖਿਆ ਕਿ ਸਾਡੇ ਪਿੰਡ ਦੇ ਪ੍ਰਾਇਮਰੀ ਸਕੂਲ ਦਾ ਨਾਮ ਬਦਲ ਕੇ ਮੇਰੇ ਪਿਤਾ ਸ਼ਹੀਦ ਮੇਜਰ ਸਿੰਘ ਫ਼ੌਜੀ ਦੇ ਨਾਂਅ ’ਤੇ ਰਖਿਆ ਜਾ ਰਿਹਾ ਹੈ। ਉਨ੍ਹਾਂ ਇਹ ਵੀ ਕਿਹਾ ਕਿ ਸਾਡੇ ਵੱਡ-ਵਡੇਰਿਆਂ ਵਿਚੋਂ ਸ. ਸੇਢਾ ਸਿੰਘ ਵੀ ਉਸ ਵੇਲੇ ਫ਼ੌਜ ਦੇ ਵੱਡੇ ਰੈਂਕ ’ਤੇ ਸਨ ਅਤੇ ਪਿੰਡ ਦਾ ਨਾਮ ਤਾਂ ਹੀ ਸੇਢਾ ਸਿੰਘ ਵਾਲਾ ਰਖਿਆ ਗਿਆ ਸੀ ਅਤੇ ਮਾ. ਰੁਪਿੰਦਰ ਸਿੰਘ ਅਤੇ ਉਨ੍ਹਾਂ ਧਰਮਪਤਨੀ ਬਲਜੀਤ ਕੌਰ ਨੇ ਦਸਿਆ ਕਿ ਸੱਸ ਅਤੇ ਸਹੁਰੇ ਦੀਆਂ ਪੁਰਾਣੀਆਂ ਨਿਸ਼ਾਨੀਆਂ ਸੰਭਾਲ ਕੇ ਰੱਖੀਆਂ ਹਨ, ਜਿਵੇਂ ਕਿ ਸੰਦੂਕ, ਚਰਖਾ, ਪਲੰਘ, ਮੇਜ਼-ਕੁਰਸੀਆਂ ਫੁੱਲਾਂ ਵਾਲੀਆਂ ਕੱਢੀਆਂ ਗੱਦੀਆਂ ਅੱਜ ਵੀ ਮੌਜੂਦ ਹਨ।
ਬਲਜੀਤ ਕੌਰ ਨੇ ਦਸਿਆ ਕਿ ਮੇਰਾ ਅਪਣੀ ਸੱਸ ਰਾਜਿੰਦਰ ਕੌਰ ਨਾਲ ਬਹੁਤ ਪਿਆਰ ਸੀ, ਅਸੀਂ ਸੱਸ-ਨੂੰਹ ਵਾਲਾ ਰਿਸ਼ਤਾ ਕਦੇ ਨਹੀਂ ਰਖਿਆ, ਹਮੇਸ਼ਾਂ ਮਾਂ-ਧੀ ਵਾਲਾ ਪਿਆਰ ਹੁੰਦਾ ਸੀ, ਹਰ ਗੱਲ ਮੇਰੇ ਨਾਲ ਸਾਂਝੀ ਕਰਦੀ ਸੀ। ਉਨ੍ਹਾਂ ਆਖਿਆ ਕਿ ਅਸੀਂ ਅਪਣੇ ਪੁੱਤਰ ਬੱਲਪ੍ਰੀਤ ਸਿੰਘ ਅਤੇ ਨੂੰਹ ਸਮੇਤ ਪੋਤਰੇ ਨੂੰ ਵੀ ਇਹੀ ਸਿਖਿਆ ਦਿਤੀ ਹੈ ਕਿ ਵੱਡ ਵਡੇਰਿਆਂ ਦੀਆਂ ਨਿਸ਼ਾਨੀਆਂ ਹਮੇਸ਼ਾ ਸੰਭਾਲ ਕੇ ਰੱਖਣੀਆਂ ਚਾਹੀਦੀਆਂ ਹਨ।
ਕੋਟਕਪੂਰਾ ਤੋਂ ਪੱਤਰਕਾਰ ਗੁਰਿੰਦਰ ਸਿੰਘ ਦੀ ਰਿਪੋਰਟ
