ਕਸਾਵਾ ਦੀ ਫਸਲ ਲਈ ਝੋਨੇ ਦੇ ਮੁਕਾਬਲੇ ਘੱਟ ਪਾਣੀ ਦੀ ਪੈਂਦੀ ਹੈ ਲੋੜ
ਜਲੰਧਰ : ਸਾਬਕਾ ਮੰਤਰੀ ਅਤੇ ਕਪੂਰਥਲਾ ਤੋਂ ਕਾਂਗਰਸੀ ਵਿਧਾਇਕ ਰਾਣਾ ਗੁਰਜੀਤ ਸਿੰਘ ਵੱਲੋਂ ਕਸਾਵਾ ਦੀ ਖੇਤੀ ਦਾ ਪ੍ਰਦਰਸ਼ਨ ਕੀਤਾ ਗਿਆ। ਇਹ ਇਕ ਅਜਿਹੀ ਫ਼ਸਲ ਜਿਸ ਨੂੰ ਉਨ੍ਹਾਂ ਨੇ ਪਾਣੀ ਦੀ ਜ਼ਿਆਦਾ ਵਰਤੋਂ ਵਾਲੇ ਝੋਨੇ ਦੇ ਬਦਲ ਵਜੋਂ ਸੁਝਾਇਆ ਸੀ। ਰਾਣਾ ਗੁਰਜੀਤ ਨੇ ਕਿਹਾ ਕਿ ਭਾਵੇਂ ਇਸ ਫ਼ਸਲ ਨੂੰ ਝੋਨੇ ਨਾਲੋਂ ਬਹੁਤ ਘੱਟ ਪਾਣੀ ਦੀ ਲੋੜ ਹੁੰਦੀ ਹੈ, ਪਰ ਕਿਸਾਨ ਕਣਕ ਅਤੇ ਝੋਨੇ ਦੀ ਖੇਤੀ ਤੋਂ ਮੌਜੂਦਾ ਕਮਾਈ ਨਾਲੋਂ ਪ੍ਰਤੀ ਏਕੜ ਘੱਟੋ-ਘੱਟ ਤਿੰਨ ਤੋਂ ਚਾਰ ਗੁਣਾ ਜ਼ਿਆਦਾ ਕਮਾ ਸਕਦੇ ਹਨ। ਇਸ ਨੂੰ ਆਲੂ ਵਾਂਗ ਉਬਾਲ ਕੇ ਅਤੇ ਤਲ ਕੇ ਖਾਧਾ ਜਾ ਸਕਦਾ ਹੈ ਅਤੇ ਇਸ ਨੂੰ ਆਈਸਕ੍ਰੀਮ ਵਰਗੇ ਖਾਣ ਵਾਲੇ ਪਦਾਰਥਾਂ ਨੂੰ ਗਾੜ੍ਹਾ ਬਣਾਉਣ ਲਈ ਵੀ ਵਰਤਿਆ ਜਾ ਸਕਦਾ ਹੈ।
ਇਸ ਮੌਕੇ ਸ਼ਾਹਕੋਟ ਤੋਂ ਕਾਂਗਰਸ ਦੇ ਵਿਧਾਇਕ ਹਰਦੇਵ ਸਿੰਘ ਲਾਡੀ ਸ਼ੇਰੋਵਾਲੀਆ ਦੇ ਤਿੰਨ ਏਕੜ ਖੇਤ ’ਚ ਪ੍ਰਦਰਸ਼ਨ ਕੀਤਾ। ਭਾਰਤੀ ਖੇਤੀ ਪ੍ਰੀਸ਼ਦ ਭੁਵਨੇਸ਼ਵਰ ਦੇ ਨਿਰਦੇਸ਼ਕ ਡਾ. ਐਮ.ਨੇਦੁੰਚੇਜ਼ਿਆਨ ਅਤੇ ਖੇਤੀਬਾੜੀ ਯੂਨੀਵਰਿਸਟੀ ਲੁਧਿਆਣਾ ਦੇ ਮਾਹਿਰਾਂ ਨੇ ਪ੍ਰੀਖਣ ਨੂੰ ਸਫਲ ਦੱਸਿਆ ਅਤੇ ਕਿਸਾਨਾਂ ਦੇ ਨਾਲ ਤਕਨੀਕੀ ਜਾਣਕਾਰੀ ਸਾਂਝੀ ਕੀਤੀ।
ਰਾਣਾ ਗੁਰਜੀਤ ਸਿੰਘ ਨੇ ਕਿਹਾ ਕਿ ਸ਼ੁਰੂਆਤ ਵਿੱਚ ਇਲਾਕੇ ਦੇ ਲਗਭਗ 10 ਕਿਸਾਨ ਦੋ-ਦੋ ਏਕੜ 'ਤੇ ਫ਼ਸਲ ਬੀਜ ਸਕਣਗੇ, ਜਿਸ ਲਈ ਮੈਂ ਮੁਫ਼ਤ ਬੀਜ ਪ੍ਰਦਾਨ ਕਰਾਂਗਾ । ਫਸਲ ਦੀ ਕਟਾਈ ਸਮੇਂ ਮੈਂ ਬਾਇਓ-ਈਥੇਨੌਲ ਪੈਦਾ ਕਰਨ ਲਈ ਉਨ੍ਹਾਂ ਦੀ ਪੂਰੀ ਫ਼ਸਲ ਖਰੀਦਾਂਗਾ। ਕਸਾਵਾ, ਇੱਕ ਸੋਕਾ-ਰੋਧਕ ਸਟਾਰਚੀ ਜੜ੍ਹ ਫਸਲ, ਜਾਨਵਰਾਂ ਦੀ ਖੁਰਾਕ, ਬਾਇਓਫਿਊਲ ਉਤਪਾਦਨ ਅਤੇ ਅਲਕੋਹਲ ਵਾਲੇ ਪੀਣ ਵਾਲੇ ਪਦਾਰਥਾਂ ਲਈ ਵਰਤੀ ਜਾਂਦੀ ਹੈ। ਨੇਦੁੰਚੇਜ਼ਿਆਨ ਨੇ ਕਿਹਾ ਕਿ ਇਸ ਫ਼ਸਲ ਦੀ ਵਰਤੋਂ ਟੈਪੀਓਕਾ ਮੋਤੀ (ਸੋਗਾ), ਚਿਪਸ, ਗਲੂਟਨ-ਮੁਕਤ ਆਟਾ ਅਤੇ ਬਾਇਓ-ਈਥੇਨੌਲ ਪੈਦਾ ਕਰਨ ਲਈ ਕੀਤੀ ਜਾ ਸਕਦੀ ਹੈ।
ਉਨ੍ਹਾਂ ਦੱਸਿਆ ਕਿ ਇੱਕ ਏਕੜ ਵਿੱਚ ਤਿੰਨ ਫੁੱਟ ਦੀ ਦੂਰੀ 'ਤੇ ਲਗਭਗ 5,000 ਕਸਾਵਾ ਦੇ ਪੌਦੇ ਲਗਾਏ ਜਾ ਸਕਦੇ ਹਨ। ਉਨ੍ਹਾਂ ਕਿਹਾ ਕਿ ਹਰੇਕ ਪੌਦਾ 5 ਕਿਲੋਗ੍ਰਾਮ ਤੋਂ ਵੱਧ ਸਟਾਰਚੀ ਕੰਦ ਪੈਦਾ ਕਰਦਾ ਹੈ। ਇਸ ਤਰ੍ਹਾਂ ਇੱਕ ਕਿਸਾਨ ਇੱਕ ਏਕੜ ਤੋਂ 25,000 ਕਿਲੋਗ੍ਰਾਮ ਫ਼ਸਲ ਕੱਟ ਸਕਦਾ ਹੈ ਅਤੇ 3.75 ਲੱਖ ਰੁਪਏ ਕਮਾ ਸਕਦਾ ਹੈ।" ਉਨ੍ਹਾਂ ਇਹ ਵੀ ਦੱਸਿਆ ਕਿ ਫ਼ਸਲ ਕੀਟ ਅਤੇ ਬਿਮਾਰੀ ਮੁਕਤ ਹੈ।
