PSPCL News : ਰਾਜ ਉਪਯੋਗਤਾਵਾਂ ਵਿਚ ਪ੍ਰਾਪਤ ਕੀਤਾ 7ਵਾਂ ਸਥਾਨ
PSPCL reduces losses, improves ranking Latest News in Punjabi : ਚੰਡੀਗੜ੍ਹ: ਪੰਜਾਬ ਰਾਜ ਬਿਜਲੀ ਨਿਗਮ ਲਿਮਟਿਡ (ਪੀਐਸਪੀਸੀਐਲ) ਨੇ ਅਪਣੀ ਕਾਰਗੁਜ਼ਾਰੀ ਵਿਚ ਸੁਧਾਰ ਕੀਤਾ ਹੈ ਅਤੇ ਹੁਣ ਰਾਜ ਉਪਯੋਗਤਾਵਾਂ ਵਿਚ ਸੱਤਵੇਂ ਸਥਾਨ 'ਤੇ ਹੈ ਅਤੇ ਦੇਸ਼ ਭਰ ਦੀਆਂ 52 ਬਿਜਲੀ ਉਪਯੋਗਤਾਵਾਂ ਵਿਚੋਂ 12ਵੇਂ ਸਥਾਨ 'ਤੇ ਹੈ।
ਪੰਜਾਬ ਨੇ ਬਿਜਲੀ ਦੇ ਖੇਤਰ ਵਿਚ ਵੱਡੀ ਸਫ਼ਲਤਾ ਹਾਸਲ ਕੀਤੀ ਹੈ। ਦਰਅਸਲ, ਪੰਜਾਬ ਜੋ ਪਹਿਲਾਂ ਬਿਜਲੀ ਖੇਤਰ ਦੀ ਰਾਸ਼ਟਰੀ ਦਰਜਾਬੰਦੀ ਵਿਚ ਪਿੱਛੇ ਰਹਿੰਦਾ ਸੀ, ਹੁਣ ਬਹੁਤ ਸੁਧਾਰ ਹੋਇਆ ਹੈ। ਅੰਕੜਿਆਂ ਅਨੁਸਾਰ, ਪਾਵਰਕਾਮ ਨੇ ਸਾਲ 2023-24 ਦੀ ਰਾਸ਼ਟਰੀ ਦਰਜਾਬੰਦੀ ਵਿਚ ਕੁੱਲ 7ਵਾਂ ਸਥਾਨ ਪ੍ਰਾਪਤ ਕੀਤਾ ਹੈ।
ਰਾਜ ਬਿਜਲੀ ਉਪਯੋਗਤਾ ਨੇ ਇਸ ਸਾਲ ਅਪਣੀ ਦਰਜਾਬੰਦੀ ਵਿਚ ਸੁਧਾਰ ਕੀਤਾ ਕਿਉਂਕਿ ਕੁੱਲ ਤਕਨੀਕੀ ਅਤੇ ਵਪਾਰਕ (ਏਟੀ ਐਂਡ ਸੀ) ਨੁਕਸਾਨ, ਜੋ ਕਿ ਬਿਜਲੀ ਵੰਡ ਪ੍ਰਣਾਲੀ ਵਿਚ ਊਰਜਾ ਨੁਕਸਾਨਾਂ ਅਤੇ ਵਪਾਰਕ ਨੁਕਸਾਨਾਂ ਦਾ ਜੋੜ ਹਨ, 11.26 ਫ਼ੀ ਸਦੀ ਤੋਂ ਘਟ ਕੇ 10.96 ਫ਼ੀ ਸਦੀ ਹੋ ਗਏ ਹਨ।
ਇਕ ਸੀਨੀਅਰ ਪੀਐਸਪੀਸੀਐਲ ਅਧਿਕਾਰੀ ਨੇ ਕਿਹਾ ਕਿ "ਬਿਲਿੰਗ ਕੁਸ਼ਲਤਾ ਵੀ 88.74 ਫ਼ੀ ਸਦੀ ਤੋਂ ਵਧ ਕੇ 89.27 ਫ਼ੀ ਸਦੀ ਹੋ ਗਈ ਹੈ ਅਤੇ ਸਪਲਾਈ ਦੀ ਔਸਤ ਲਾਗਤ ਅਤੇ ਮਾਲੀਆ ਪ੍ਰਾਪਤੀ ਪਾੜੇ ਵਿਚ ਪ੍ਰਤੀ ਯੂਨਿਟ 0.25 ਪੈਸੇ ਦਾ ਸੁਧਾਰ ਹੋਇਆ ਹੈ।"
ਸਮੁੱਚੀ ਦਰਜਾਬੰਦੀ ਵਿਚ, ਹਰਿਆਣਾ (UHBVN ਅਤੇ DHBVN), ਉੜੀਸਾ (TPWODL, TPNOWL ਅਤੇ TPCOWL), ਕੇਰਲ (KSEBL) ਅਤੇ ਪੰਜਾਬ (PSPCL) ਰੈਂਕਿੰਗ ਵਿਚ ਸਿਖਰ 'ਤੇ ਹਨ।
ਇਸ ਵਾਰ ਪੰਜਾਬ ਦੇਸ਼ ਭਰ ਵਿਚ ਜਨਤਕ ਖੇਤਰ ਦੀਆਂ ਕੰਪਨੀਆਂ ਵਾਲੇ ਰਾਜਾਂ ਵਿਚੋਂ ਤੀਜੇ ਸਥਾਨ 'ਤੇ ਹੈ। ਕੇਂਦਰੀ ਬਿਜਲੀ ਮੰਤਰਾਲੇ ਵਲੋਂ 13ਵੀਂ ਏਕੀਕ੍ਰਿਤ ਰੇਟਿੰਗ ਰਿਪੋਰਟ ਜਾਰੀ ਕੀਤੀ ਗਈ ਹੈ ਜਿਸ ਵਿੱਚ ਪੰਜਾਬ ਨੂੰ ਬਿਜਲੀ ਖੇਤਰ ਵਿਚ ‘ਏ’ ਗ੍ਰੇਡ ਦਿਤਾ ਗਿਆ ਹੈ, ਜਦੋਂ ਕਿ ਪਹਿਲਾਂ ਇਸ ਨੂੰ 'ਬੀ' ਗ੍ਰੇਡ ਮਿਲਦਾ ਸੀ। ਇਸ ਪੱਖੋਂ ਇਹ ਸਾਬਤ ਹੁੰਦਾ ਹੈ ਕਿ ਪੰਜਾਬ ਪਾਵਰਕਾਮ ਨੇ ਅਪਣੀ ਸਥਿਤੀ ਸੁਧਾਰਨ ਲਈ ਬਹੁਤ ਵਧੀਆ ਕੰਮ ਕੀਤਾ ਹੈ। ਪੰਜਾਬ ਦੇ ਕੁੱਲ 77 ਅੰਕ ਹਨ, ਜਦੋਂ ਕਿ ਪਿਛਲੀ ਵਾਰ ਇਸ ਦੇ 61 ਅੰਕ ਸਨ। ਹਰਿਆਣਾ ਅਤੇ ਗੁਜਰਾਤ ਦਾ ਗ੍ਰੇਡ 'A+' ਹੈ।
ਇੱਥੇ ਤੁਹਾਨੂੰ ਇਹ ਵੀ ਦਸ ਦਈਏ ਕਿ ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਪਿਛਲੇ ਸਾਲ ਪਾਵਰਕਾਮ ਨੂੰ ਬਿਜਲੀ ਸੁਧਾਰ ਦਾ ਟੀਚਾ ਦਿਤਾ ਸੀ। ਪਾਵਰਕਾਮ ਦੇ ਸੀ.ਐਮ.ਡੀ ਬਲਦੇਵ ਸਿੰਘ ਸਰਾਂ, ਜੋ ਹੁਣ ਸੇਵਾਮੁਕਤ ਹੋ ਚੁੱਕੇ ਹਨ, ਨੇ ਬਿਜਲੀ ਸੁਧਾਰਾਂ ਲਈ ਵੱਡੇ ਕਦਮ ਚੁੱਕੇ ਸਨ। ਜੇ ਅਸੀਂ ਵੱਖ-ਵੱਖ ਨਿਯੁਕਤੀਆਂ ਦੀ ਕਾਰਗੁਜ਼ਾਰੀ 'ਤੇ ਨਜ਼ਰ ਮਾਰੀਏ ਤਾਂ ਪਾਵਰਕਾਮ ਨੇ ਸਾਲ 2023-24 ਵਿੱਚ ਬਿਜਲੀ ਸਪਲਾਈ ਕਰਨ ਵਿਚ ਵਧੀਆ ਪ੍ਰਦਰਸ਼ਨ ਕੀਤਾ ਹੈ, ਜਿਸ ਦੇ ਬਦਲੇ ਪਾਵਰਕਾਮ ਨੂੰ 'ਏ' ਗ੍ਰੇਡ ਮਿਲਿਆ ਹੈ। ਸਾਲ 2023-24 ਦੌਰਾਨ, ਪਾਵਰਕਾਮ ਨੇ ਲਗਭਗ 800 ਕਰੋੜ ਰੁਪਏ ਦਾ ਮੁਨਾਫ਼ਾ ਕਮਾਇਆ ਹੈ ਅਤੇ ਵਿੱਤੀ ਅਤੇ ਤਕਨੀਕੀ ਘਾਟੇ ਨੂੰ ਘਟਾਇਆ ਹੈ। ਪਿਛਲੇ ਸਾਲ ਪੰਜਾਬ ਸਰਕਾਰ ਵਲੋਂ ਪਾਵਰਕਾਮ ਨੂੰ ਸਬਸਿਡੀ ਦੀ ਰਕਮ ਵੀ ਸਮੇਂ ਸਿਰ ਦੇ ਦਿਤੀ ਗਈ ਸੀ। ਖਪਤਕਾਰਾਂ ਤੋਂ ਬਿਜਲੀ ਬਿੱਲਾਂ ਦੀ ਵਸੂਲੀ ਵਿਚ ਵੀ ਸੁਧਾਰ ਹੋਇਆ ਹੈ।
