ਸੂਬਾ ਮੰਤਰੀ ਮੰਡਲ ਅੱਜ ਲੈ ਸਕਦਾ ਹੈ ਭਵਿੱਖ ਦੇ ਕਦਮਾਂ ਬਾਰੇ ਅਹਿਮ ਫ਼ੈਸਲੇ
ਚੰਡੀਗੜ੍ਹ: ਪੰਜਾਬ ਦੇ ਲੋਕਾਂ ਨੂੰ ਹਾਲੇ ਕੋਰੋਨਾ ਮਹਾਂਮਾਰੀ ਕਾਰਨ ਇਕ ਮਹੀਨਾ ਹੋਰ ਸਖ਼ਤ ਪਾਬੰਦੀਆਂ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ। ਸੂਬੇ ਵਿਚ ਕੋਰੋਨਾ ਪੀੜਤਾਂ ਦੀਆਂ ਲਾਕਆਊਟ-1 ਸ਼ੁਰੂ ਹੋਣ ਤੋਂ ਬਾਅਦ ਵੱਧ ਰਹੀਆਂ ਮੌਤਾਂ ਅਤੇ ਪਾਜ਼ੇਟਿਵ ਮਰੀਜ਼ਾਂ ਦਾ ਅੰਕੜਾ ਸਾਰੇ ਜ਼ਿਲ੍ਹਿਆਂ ਵਿਚ ਮੁੜ ਹਰ ਦਿਨ ਵਧਣ ਦੇ ਮੱਦੇਨਜ਼ਰ ਪੰਜਾਬ ਸਰਕਾਰ ਜੁਲਾਈ ਮਹੀਨੇ ਦੌਰਾਨ ਸਖ਼ਤ ਪਾਬੰਦੀਆਂ ਲਾਗੂ ਕਰ ਸਕਦੀ ਹੈ।
corona virus
ਭਾਵੇਂ ਕਿ ਕੁੱਝ ਹੋਰ ਵਾਜਬ ਛੋਟਾਂ ਦੇਣ ਬਾਰੇ ਵੀ ਵਿਚਾਰ ਕੀਤਾ ਜਾ ਰਿਹਾ ਹੈ ਪਰ ਇਕੱਠਾਂ ਵਾਲੀਆਂ ਛੋਟਾਂ ਖ਼ਤਮ ਹੋ ਸਕਦੀਆਂ ਹਨ। ਕੋਰੋਨਾ ਕੇਸਾਂ ਦਾ ਅੰਕੜਾ ਇਹੀ ਰਿਹਾ ਤਾਂ ਕੇਂਦਰ ਦੇ ਦਿਸ਼ਾ ਨਿਰਦੇਸ਼ਾਂ ਨੂੰ ਦੇਖਣ ਬਾਅਦ 30 ਜੂਨ ਨੂੰ ਖ਼ਤਮ ਹੋਣ ਵਾਲੇ ਲਾਕਆਊਟ-1 ਬਾਅਦ ਸੂਬੇ ਵਿਚ ਮੁਕੰਮਲ ਲਾਕਡਾਊਨ ਮੁੜ ਵੀ ਲਾਗੂ ਹੋ ਸਕਦਾ ਹੈ ਪਰ ਚੁਕੇ ਜਾਣ ਵਾਲੇ ਕਦਮ 30 ਜੂਨ ਤੋਂ ਪਹਿਲਾਂ ਕੇਂਦਰ ਵਲੋਂ ਜਾਰੀ ਹੋਣ ਵਾਲੀਆਂ ਨਵੀਆਂ ਹਦਾਇਤਾਂ ਦੀ ਰੋਸ਼ਨੀ ਵਿਚ ਹੀ ਹੋਣਗੇ।
Corona Virus
ਜ਼ਿਕਰਯੋਗ ਹੈ ਕਿ 22 ਜੂਨ ਨੂੰ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਵਲੋਂ ਸੂਬਾ ਮੰਤਰੀ ਮੰਡਲ ਦੀ ਬੈਠਕ ਸੱਦੀ ਗਈ ਹੈ ਅਤੇ ਇਸ ਤੋਂ ਬਾਅਦ 24 ਨੂੰਸਰਬ ਪਾਰਟੀ ਮੀਟਿੰਗ ਵੀ ਹੈ। ਸਰਕਾਰ ਰਾਜ ਦੀ ਸਥਿਤੀ ਦੇ ਮੁਲਾਂਕਣ ਤੋਂ ਬਾਅਦ ਸਟੇਟ ਮਾਹਰ ਕਮੇਟੀ ਦੀ ਸਲਾਹ ਮੁਤਾਬਕ 22 ਜੂਨ ਦੀ ਮੰਤਰੀ ਮੰਡਲ ਦੀ ਬੈਠਕ ਵਿਚ ਕੁੱਝ ਸਖ਼ਤ ਕਦਮ ਚੁਕਣ ਦਾ ਫ਼ੈਸਲਾ ਲੈ ਸਕਦੀ ਹੈ।
Corona virus
ਪਤਾ ਲੱਗਾ ਹੈ ਕਿ ਪਬਲਿਕ ਤੇ ਨਿਜੀ ਟਰਾਂਸਪੋਰਟ ਦੀ ਆਵਾਜਾਈ ਨੂੰ ਮਿਲੀਆਂ ਖੁਲ੍ਹਾਂ 'ਤੇ ਵੀ ਮੁੜ ਵਿਚਾਰ ਹੋ ਸਕਦਾ ਹੈ ਕਿਉਂਕਿ ਲੋਕ ਇਸ ਦਾ ਨਾਜਾਇਜ਼ ਫ਼ਾਇਦਾ ਉਠਾ ਕੇ ਬਿਨਾਂ ਸਾਵਧਾਨੀ ਵਰਤੇ ਇਧਰ ਉਧਰ ਚੋਰੀ ਛੁਪੇ ਰਹੇ ਹਨ ਤੇ ਬਾਹਰਲੇ ਰਾਜਾਂ ਤੋਂ ਵੀ ਨਿਜੀ ਵਾਹਨਾਂ ਰਾਹੀਂ ਕਈ ਲੋਕ ਆ ਰਹੇ ਹਨ। ਆਵਾਜਾਈ ਦੀ ਖੁਲ੍ਹ ਦੇਣ ਬਾਅਦ ਹੀ ਜ਼ਿਆਦਾ ਕੇਸ ਵਧਣੇ ਸ਼ੁਰੂ ਹੋਏ ਹਨ ਤੇ ਲੋਕ ਸਾਵਧਾਨੀਆਂ ਭੁੱਲ ਕੇ ਨਿਯਮਾਂ ਦੀ ਪ੍ਰਵਾਹ ਕੀਤੇ ਬਿਨਾਂ ਇਧਰ ਉਧਰ ਪਹਿਲਾਂ ਵਾਂਗ ਘੁੰਮਣ ਲੱਗੇ ਹਨ।
Corona Virus
ਇਹ ਵੀ ਪਤਾ ਲੱਗਾ ਹੈ ਕਿ ਵਿਆਹਾਂ ਵਿਚ 50 ਵਿਅਕਤੀਆਂ ਤੇ ਅੰਤਮ ਸਸਕਾਰ ਵਿਚ 20 ਵਿਅਕਤੀਆਂ ਦੇ ਸ਼ਾਮਲ ਹੋਣ ਦੀ ਛੋਟ 'ਤੇ ਵੀ ਸਰਕਾਰ ਮੁੜ ਵਿਚਾਰ ਕਰ ਕੇ ਇਹ ਗਿਣਤੀ ਘੱਟ ਕਰ ਸਕਦੀ ਹੈ। ਆਮ ਪਬਲਿਕ ਦੀ ਆਵਾਜਾਈ 'ਤੇ ਸਖ਼ਤ ਰੋਕਾਂ ਲੱਗ ਸਕਦੀਆਂ ਹਨ। ਇਸ ਤੋਂ ਇਲਾਵਾ ਮੰਤਰੀ ਮੰਡਲ ਦੀ ਬੈਠਕ ਵਿਚ ਜਿਥੇ ਸੂਬੇ ਦੇ ਵਿੱਤੀ ਹਾਲਾਤ 'ਤੇ ਚਰਚਾ ਕਰ ਕੇ ਵਿੱਤੀ ਸਾਧਨ ਜੁਟਾਉਣ ਬਾਰੇ ਚਰਚਾ ਹੋਵੇਗੀ ਉਥੇ ਕੋਰੋਨਾ ਮਹਾਂਮਾਰੀ ਦੇ ਮੌਕੇ ਮੈਡੀਕਲ ਸਟਾਫ਼ ਦੀਆਂ 7500 ਅਸਾਮੀਆਂ ਭਰਨ 'ਤੇ ਵੀ ਮੋਹਰ ਲੱਗ ਸਕਦੀ ਹੈ।
Punjabi News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ।
