ਇਹ ਕਮੇਟੀਆਂ ਅਨੈਤਿਕ ਕੰਮਾਂ 'ਤੇ ਨਜ਼ਰ ਰੱਖਣਗੀਆਂ ਅਤੇ ਸਰਪੰਚ ਨੂੰ ਰਿਪੋਰਟ ਦੇਣਗੀਆਂ।
ਫਾਜ਼ਿਲਕਾ: ਸਰਹੱਦੀ ਜ਼ਿਲ੍ਹਿਆਂ ਦੇ ਨੌਜਵਾਨਾਂ ਨੂੰ ਨਸ਼ਿਆਂ ਤੋਂ ਬਚਾਉਣ ਲਈ ਰਾਜਪਾਲ ਦੇ ਸੱਦੇ ਤੋਂ ਬਾਅਦ ਇਹ ਸਥਾਨਕ ਲਹਿਰ ਫਾਜ਼ਿਲਕਾ ਵਿਚ ਵੀ ਦਿਖਾਈ ਦੇਣ ਲੱਗੀ ਹੈ। ਫਾਜ਼ਿਲਕਾ ਜ਼ਿਲ੍ਹੇ ਦੇ 7 ਪਿੰਡਾਂ ਜੈਮਲਵਾਲਾ, ਟਿੰਡਾਵਾਲਾ, ਬਸਤੀ ਰਣਜੀਤ ਸਿੰਘ, ਚੱਕਾ ਬੁਢੋਕੇ, ਚੱਕਾ ਸਿੰਘੇਵਾਲਾ, ਬਾਹਮਣੀਵਾਲਾ, ਸਿਮਰੇਵਾਲਾ ਦੇ ਸਰਪੰਚਾਂ-ਪੰਚਾਂ ਨੇ ਸਰਬਸੰਮਤੀ ਨਾਲ ਫੈਸਲਾ ਕੀਤਾ ਹੈ ਕਿ ਉਨ੍ਹਾਂ ਦੇ ਪਿੰਡਾਂ ਵਿਚ ਕੋਈ ਵੀ ਵਿਅਕਤੀ ਨਸ਼ਾ ਨਾ ਕਰੇ। ਨਸ਼ੇ ਕਰਨ ਅਤੇ ਵੇਚਣ ਦੀ ਇਜਾਜ਼ਤ ਨਹੀਂ ਦਿੱਤੀ ਜਾਵੇਗੀ।
ਪੰਚਾਇਤ ਦੇ ਫੈਸਲੇ ਦੀ ਉਲੰਘਣਾ ਕਰਨ ਵਾਲੇ ਖ਼ਿਲਾਫ਼ ਕਾਰਵਾਈ ਕੀਤੀ ਜਾਵੇਗੀ। ਪੰਚਾਇਤ ਅਜਿਹੇ ਮਾਮਲੇ ਵਿਚ ਸ਼ਾਮਲ ਕਿਸੇ ਵੀ ਵਿਅਕਤੀ ਨੂੰ ਰਿਹਾਅ ਕਰਵਾਉਣ ਲਈ ਥਾਣਿਆਂ ਵਿਚ ਨਹੀਂ ਜਾਵੇਗੀ। ਸਾਂਝੀ ਮੀਟਿੰਗ ਵਿਚ ਆਪੋ-ਆਪਣੇ ਪਿੰਡਾਂ ਵਿਚ ਕਮੇਟੀਆਂ ਬਣਾਉਣ ਦਾ ਫੈਸਲਾ ਕੀਤਾ ਗਿਆ ਹੈ। ਇਹ ਕਮੇਟੀਆਂ ਅਨੈਤਿਕ ਕੰਮਾਂ 'ਤੇ ਨਜ਼ਰ ਰੱਖਣਗੀਆਂ ਅਤੇ ਸਰਪੰਚ ਨੂੰ ਰਿਪੋਰਟ ਦੇਣਗੀਆਂ।
ਦੇਸ਼ ਦੇ ਮਸ਼ਹੂਰ ਕ੍ਰਿਕਟਰ ਸ਼ੁਭਮਨ ਗਿੱਲ ਦੇ ਜੱਦੀ ਪਿੰਡ ਜਮਾਲਵਾਲਾ ਤੋਂ ਨਸ਼ਾ ਛੁਡਾਊ ਕਦਮ ਦੀ ਸ਼ੁਰੂਆਤ ਹੋਵੇਗੀ। ਪੰਚਾਇਤ ਦਾ ਕਹਿਣਾ ਹੈ ਕਿ ਜਿਸ ਤਰ੍ਹਾਂ ਜੈਮਲਵਾਲਾ ਦੇ ਸਰਦਾਰ ਇੰਦਰ ਸਿੰਘ ਦੇ ਪੋਤਰੇ ਅਤੇ ਲਖਵਿੰਦਰ ਸਿੰਘ ਗਿੱਲ ਦੇ ਪੋਤਰੇ ਸ਼ੁਭਮਨ ਗਿੱਲ ਨੇ ਫਾਜ਼ਿਲਕਾ ਦਾ ਨਾਮ ਖੇਡ ਜਗਤ ਵਿਚ ਰੌਸ਼ਨ ਕੀਤਾ ਹੈ, ਉਸ ਤੋਂ ਪ੍ਰੇਰਨਾ ਲੈ ਕੇ ਹੋਰਨਾਂ ਨੌਜਵਾਨਾਂ ਨੂੰ ਵੀ ਨੌਜਵਾਨ ਸ਼ਕਤੀ ਨਸ਼ੇ ਤੋਂ ਦੂਰ ਰਹੇ।
ਪਿੰਡ ਬੁਢੋਕੇ ਦੇ ਸਰਪੰਚ ਬੂਟਾ ਸਿੰਘ ਦਾ ਕਹਿਣਾ ਹੈ ਕਿ ਭਾਵੇਂ ਅੱਜ ਸਮਾਰਟਫ਼ੋਨ ਦਾ ਯੁੱਗ ਹੈ ਪਰ ਪੰਚਾਇਤਾਂ ਵੱਲੋਂ ਸਬੰਧਤ ਪਿੰਡਾਂ ਦੇ ਗੁਰਦੁਆਰਿਆਂ ਰਾਹੀਂ ਮੰਗ ਕੀਤੀ ਗਈ ਹੈ ਕਿ ਪਿੰਡਾਂ ਦੀਆਂ ਪੰਚਾਇਤਾਂ ਨਸ਼ਾ ਤਸਕਰੀ ਤੇ ਨਸ਼ਿਆਂ ਖ਼ਿਲਾਫ਼ ਸਖ਼ਤ ਕਦਮ ਚੁੱਕਣ। ਫਿਰ ਵੀ ਜੇਕਰ ਕੋਈ ਅਨੈਤਿਕ ਕੰਮ ਕਰਦਾ ਹੈ, ਤਾਂ ਉਹ ਖ਼ੁਦ ਜ਼ਿੰਮੇਵਾਰ ਹੋਵੇਗਾ।
ਪੰਚਾਇਤਾਂ ਨੇ ਸਰਕਾਰ ਦੇ ਖੁਫ਼ੀਆ ਵਿਭਾਗ ਦੀ ਤਰਜ਼ 'ਤੇ ਪਿੰਡਾਂ ਦੇ ਨੌਜਵਾਨਾਂ ਦਾ ਖੁਫ਼ੀਆ ਵਿੰਗ ਬਣਾਇਆ ਹੈ। ਇਹ ਨਸ਼ਾ ਤਸਕਰੀ 'ਤੇ ਨਜ਼ਰ ਰੱਖੇਗਾ ਅਤੇ ਪੰਚ ਜਾਂ ਸਰਪੰਚ ਨੂੰ ਸੂਚਨਾ ਦੇਵੇਗਾ। ਸਮੂਹ ਪੰਚਾਇਤ ਜਾਂਚ ਕਰ ਕੇ ਮੁਲਜ਼ਮਾਂ ਨੂੰ ਪੁਲਿਸ ਹਵਾਲੇ ਕਰੇਗੀ। ਦਿਨ-ਰਾਤ ਪਹਿਰਾ ਦੇਣ ਦਾ ਵੀ ਫੈਸਲਾ ਕੀਤਾ ਗਿਆ ਹੈ ਤਾਂ ਜੋ ਨਸ਼ਾ ਇਕ ਪਿੰਡ ਤੋਂ ਦੂਜੇ ਪਿੰਡ ਨਾ ਪਹੁੰਚ ਸਕੇ।
