ਦੋ ਬੱਚੀਆਂ ਦਾ ਪਿਤਾ ਅਤੇ ਘਰ ਦਾ ਇਕਲੌਤਾ ਕਮਾਊ ਜੀਅ ਸੀ ਮ੍ਰਿਤਕ ਕੁਲਵੀਰ ਸਿੰਘ
ਬਨੂੜ : ਪਿੰਡ ਮੋਟੇਮਾਜਰਾ ਵਿਚ ਇਕ 27 ਸਾਲਾ ਨੌਜਵਾਨ ਦੀ ਬਿਜਲੀ ਦੀ ਹਾਈ ਵੋਲਟੇਜ ਤਾਰਾਂ ਦੀ ਲਪੇਟ ਵਿਚ ਆਉਣ ਕਾਰਨ ਮੌਤ ਹੋਣ ਦੀ ਖ਼ਬਰ ਸਾਹਮਣੇ ਆਈ ਹੈ। ਉਹ ਘਰ ਦਾ ਇਕਲੌਤਾ ਕਮਾਊ ਜੀਅ ਸੀ ਤੇ ਦੋ ਬੱਚੀਆਂ ਦਾ ਪਿਤਾ ਸੀ।
ਮਿਲੀ ਜਾਣਕਾਰੀ ਮੁਤਾਬਕ ਮ੍ਰਿਤਕ ਕੁਲਵੀਰ ਸਿੰਘ (27) ਪੁੱਤਰ ਅਮਰੀਕ ਸਿੰਘ ਮਕਾਨਾਂ ਦੇ ਲੈਂਟਰਾਂ ਦੇ ਸਰੀਏ ਦਾ ਜਾਲ ਬੰਨ੍ਹਣ ਅਤੇ ਚਾਦਰਾਂ ਦੇ ਸ਼ੈੱਡ ਬਣਾਉਣ ਦਾ ਕੰਮ ਕਰਦਾ ਸੀ। ਬੀਤੀ ਸ਼ਾਮ ਉਹ ਆਪਣੇ ਪਿੰਡ ਮੋਟੇਮਾਜਰਾ ਦੇ ਕਿਸੇ ਵਸਨੀਕ ਦੇ ਘਰ ਚਾਦਰਾਂ ਦਾ ਸ਼ੈੱਡ ਬਣਾ ਰਿਹਾ ਸੀ। ਸ਼ੈੱਡ ਬਣਾਉਣ ਲਈ ਐਂਗਲ ਦਾ ਜਾਲ ਬਣਾਉਣ ਵਾਸਤੇ ਉਹ ਐਂਗਲ ਚੁੱਕਣ ਲੱਗਿਆ ਤਾਂ ਅਚਾਨਕ ਐਂਗਲ ਉਪਰੋਂ ਲੰਘ ਰਹੀਆਂ ਬਿਜਲੀ ਦੀਆਂ ਹਾਈ ਵੋਲਟੇਜ ਤਾਰਾਂ ਨਾਲ ਟਕਰਾ ਗਿਆ ਤੇ ਕਰੰਟ ਲੱਗਣ ਕਾਰਨ ਬੁਰੀ ਤਰ੍ਹਾਂ ਝੁਲਸ ਗਿਆ। ਸ਼ੈੱਡ ਦੀ ਉਸਾਰੀ ਕਰਾਉਣ ਵਾਲੇ ਵਿਅਕਤੀ ਅਤੇ ਕੁਲਵੀਰ ਸਿੰਘ ਦੇ ਪਰਿਵਾਰਕ ਮੈਂਬਰਾਂ ਨੇ ਉਸ ਨੂੰ ਤੁਰਤ ਬਨੂੜ ਨੇੜਲੇ ਨਿੱਜੀ ਹਸਪਤਾਲ ਵਿਚ ਪਹੁੰਚਾਇਆ, ਜਿੱਥੇ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿਤਾ।
ਮ੍ਰਿਤਕ ਦੇ ਚਾਚਾ ਕਾਕਾ ਸਿੰਘ ਨੇ ਦਸਿਆ ਕਿ ਉਸ ਦਾ ਭਤੀਜਾ ਘਰ ਦਾ ਇਕੱਲਾ ਕਮਾਊ ਜੀਅ ਸੀ ਅਤੇ ਮਿਹਨਤ ਮਜ਼ਦੂਰੀ ਕਰ ਕੇ ਪਰਵਾਰ ਦਾ ਗੁਜ਼ਾਰਾ ਚਲਾ ਰਿਹਾ ਸੀ। ਪਿੰਡ ਵਾਸੀਆਂ ਨੇ ਪੰਜਾਬ ਸਰਕਾਰ ਅਤੇ ਪ੍ਰਸ਼ਾਸਨ ਕੋਲੋਂ ਮ੍ਰਿਤਕ ਦੀ ਵਿਧਵਾ ਅਤੇ ਬੱਚੀਆਂ ਦੇ ਪਾਲਣ ਪੋਸ਼ਣ ਲਈ ਲੋੜੀਂਦੀ ਗਰਾਂਟ ਜਾਰੀ ਕਰਨ ਦੀ ਮੰਗ ਕੀਤੀ ਹੈ।
