ਕਾਂਗਰਸੀ ਵਿਧਾਇਕ ਨੇ ਸਾਧਿਆ ਨਿਸ਼ਾਨਾ
ਪਠਾਨਕੋਟ : ਫ਼ਿਲਮਾਂ 'ਚ ਦੰਮਦਾਰ ਭੂਮਿਕਾ ਨਿਭਾਉਣ ਵਾਲੇ ਫ਼ਿਲਮੀ ਹੀਰੋ ਸੰਨੀ ਦਿਓਲ ਹੁਣ ਸਿਆਸੀ ਮੰਚ 'ਤੇ ਵੀ 'ਫ਼ਿਲਮੀ' ਤੇਵਰ ਅਪਣਾਉਂਦੇ ਨਜ਼ਰ ਆ ਰਹੇ ਹਨ। ਫ਼ਿਲਮਾਂ ਅੰਦਰ ਉਨ੍ਹਾਂ ਦੇ 'ਢਾਈ ਕਿਲੋ' ਵਾਲੇ ਹੱਥ ਦਾ ਕਮਾਲ ਦਰਸ਼ਕ ਫ਼ਿਲਮੀ ਪਰਦੇ ਉਪਰ ਵੇਖ ਹੀ ਚੁੱਕੇ ਹਨ। ਕਿਵੇਂ ਉਹ ਪਲਾਂ ਵਿਚ ਹੀ ਵੱਡੇ-ਵੱਡੇ ਨਾਢੂਖਾਨਾਂ ਨੂੰ ਧੂੜ ਚਟਾ ਦਿੰਦੇ ਹਨ।
Photo
ਉਨ੍ਹਾਂ ਦੀ ਇਸੇ ਅਦਾ ਨੇ ਉਨ੍ਹਾਂ ਦੇ ਸਿਤਾਰੇ ਨੂੰ ਬੁਲੰਦੀਆਂ ਤਕ ਪਹੁੰਚਾ ਦਿਤਾ ਸੀ। ਇਹੀ ਅਦਾ ਉਨ੍ਹਾਂ ਨੂੰ ਅਪਣੇ ਸਿਆਸੀ ਜੀਵਨ ਵਿਚ ਵੀ ਬੜੀ ਕੰਮ ਆਈ ਜਿਸ ਦੀ ਬਦੌਲਤ ਉਹ ਪਿਛਲੀਆਂ ਲੋਕ ਸਭਾ ਚੋਣਾਂ 'ਚ ਸੰਸਦ ਮੈਂਬਰ ਚੁਣੇ ਗਏ। ਪਰ ਹੁਣ ਇਸੇ ਅਦਾ ਨੂੰ ਸਿਆਸੀ ਮੰਚਾਂ 'ਤੇ ਵਰਤਣਾ ਉਨ੍ਹਾਂ ਨੂੰ ਭਾਰੀ ਪੈਂਦਾ ਜਾਪ ਰਿਹਾ ਹੈ।
Photo
ਦਰਅਸਲ ਪਿਛਲੇ ਦਿਨਾਂ ਦੌਰਾਨ ਹਲਕੇ ਅੰਦਰੋਂ ਕਾਫ਼ੀ ਅਰਸਾ ਗਾਇਬ ਰਹਿਣ ਬਾਅਦ ਉਨ੍ਹਾਂ ਦੇ ਵਿਰੋਧੀਆਂ ਨੇ ਉਨ੍ਹਾਂ ਦੀ ਗੁੰਮਸ਼ੁਦਗੀ ਸਬੰਧੀ ਪੋਸਟਰ ਛਪਵਾ ਦਿਤੇ ਸਨ। ਇਸ ਤੋਂ ਬਾਅਦ ਹੁਣ ਉਹ ਅਪਣੇ ਹਲਕੇ ਅੰਦਰ ਸਰਗਰਮ ਵਿਖਾਈ ਦੇ ਰਹੇ ਹਨ। ਉਨ੍ਹਾਂ ਨੇ ਇਨ੍ਹਾਂ ਪੋਸਟਰਾਂ ਬਾਰੇ ਮੀਡੀਆ ਦੇ ਇਕ ਹਿੱਸੇ ਵਿਰੁਧ ਵੀ ਭੜਾਸ ਕੱਢੀ ਸੀ।
Photo
ਹੁਣ ਉਨ੍ਹਾਂ ਦੇ ਫ਼ਿਲਮੀ ਅੰਦਾਜ਼ ਦਾ ਪ੍ਰਭਾਵ ਉਨ੍ਹਾਂ ਦੇ ਸਿਆਸੀ ਮੰਚਾਂ 'ਤੇ ਵੀ ਪੈਣ ਲੱਗਾ ਹੈ। ਪਠਾਨਕੋਟ ਵਿਖੇ ਜਨ ਸਭਾ ਨੂੰ ਸੰਬੋਧਨ ਕਰਦਿਆਂ ਉਨ੍ਹਾਂ ਕਿਹਾ ਕਿ 'ਤੁਸੀਂ ਸਾਰੇ ਜਾਣਦੇ ਹੀ ਹੋ, ਕੁਟਾਪਾ ਚਾੜ੍ਹਣ 'ਚ ਮੇਰੇ ਤੋਂ ਵੱਡਾ ਕੋਈ ਨਹੀਂ। ਅਸੀਂ ਜਿਹਨੂੰ ਚੱਕਣਾ ਚੱਕ ਦੇਨੇ ਆਂ, ਪਰ ਮੈਂ ਚਾਹੁੰਦਾ ਹਾਂ ਕਿ ਹਰ ਕੰਮ ਪਿਆਰ ਨਾਲ ਹੋਵੇ, ਕਿਉਂ ਕਿਸੇ ਨੂੰ ਸੱਟ ਦੇਣੀ'।
Photo
ਸੰਨੀ ਦਿਓਲ ਦੇ ਇਸ ਲਾਇਲਾਗ 'ਤੇ ਸਿਆਸਤ ਗਰਮਾ ਗਈ ਹੈ। ਪਠਾਨਕੋਟ ਦੇ ਹਲਕਾ ਭੋਮਾ ਤੋਂ ਕਾਂਗਰਸ ਦੇ ਵਿਧਾਇਕ ਜੋਗਿੰਦਰਪਾਲ ਨੇ ਸੰਨੀ ਦੇ ਬੋਲਾਂ 'ਤੇ ਤੰਜ਼ ਕਸਦਿਆਂ ਕਿਹਾ ਕਿ ਇਸ ਵਿਚ ਸੰਨੀ ਦਿਓਲ ਦਾ ਕੋਈ ਕਸੂਰ ਨਹੀਂ ਹੈ, ਉਹ ਤਾਂ ਸਿਆਸਤ ਤੋਂ ਬਿਲਕੁਲ ਕੋਰੇ ਹਨ। ਇਸ ਵਿਚ ਸਾਰਾ ਕਸੂਰ ਭਾਜਪਾ ਦਾ ਹੈ। ਸੰਨੀ ਦੀ ਪਤਾ ਨਹੀਂ ਕੀ ਮਜਬੂਰੀ ਰਹੀ ਹੋਵੇਗੀ ਕਿ ਉਹ ਸਿਆਸਤ ਵਿਚ ਆ ਗਏ ਹਨ। ਉਹ ਜਿਹੋ ਜਿਹੇ ਡਾਂਸ ਫ਼ਿਲਮਾਂ ਵਿਚ ਕਰ ਰਹੇ ਸਨ, ਉਹੋ ਜਿਹਾ ਹੀ ਇੱਥੇ ਕਰ ਰਹੇ ਹਨ।
