ਜੋੜਾ ਘਰ ਦੀ ਖੁਦਾਈ ਦੌਰਾਨ ਸੁਰੰਗਾਂ ਨਿਕਲੀਆਂ

ਸ਼੍ਰੋਮਣੀ ਕਮੇਟੀ ਤੇ ਸਿੱਖ ਸਦਭਾਵਨਾ ਦਲ ਨਾਲ ਹੋਈਆਂ ਹਿੰਸਕ ਝੜਪਾਂ

ਅੰਮਿ੍ਰਤਸਰ, 15 ਜੁਲਾਈ (ਸੁਖਵਿੰਦਰਜੀਤ ਸਿੰਘ ਬਹੋੜੂ): ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵਲੋਂ ਕਾਰਸੇਵਾ ਰਾਹੀਂ ਉਸਾਰੇ ਜਾ ਰਹੇ ਵਿਸ਼ਾਲ ਜੋੜਾ ਘਰ ਦੀ ਖ਼ੁਦਾਈ ਦੌਰਾਨ ਪੁਰਾਤਨ ਸੁਰੰਗਾਂ ਨਿਕਲਣ ਤੇ ਸਿੱਖ ਜਥੇਬੰਦੀ ਸਿੱਖ ਭਾਵਨਾ ਦਲ ਦੇ ਮੁੱਖ ਸੇਵਾਦਾਰ ਭਾਈ ਬਲਦੇਵ ਸਿੰਘ ਤੇ ਹਮਾਇਤੀਆਂ ਨਾਲ ਤਿੱਖੀਆਂ ਹਿੰਸਕ ਝੜਪਾਂ ਹੋਈਆਂ ਅਤੇ ਜਬਰਦਸਤ ਧੱਕਾ-ਮੁੱਕੀ ਹੋਈ ਪਰ ਪੁਲਿਸ ਤੇ ਐਸਡੀਐਮ ਦੇ ਸਮੇਂ ਸਿਰ ਪਹੁੰਚਣ ਨਾਲ ਖ਼ੂਨੀ ਟਕਰਾਅ ਟਲ ਗਿਆ। ਇਹ ਕਾਰ ਸੇਵਾ ਬਾਬਾ ਕਸ਼ਮੀਰ ਸਿੰਘ ਭੂਰੀ ਵਾਲੇ ਕਰਵਾ ਰਹੇ ਹਨ। ਐਸਡੀਐਮ ਨੇ ਟਕਰਾਅ ਨੂੰ ਮੱਦੇਨਜ਼ਰ ਰੱਖਦਿਆਂ ਜੋੜਾ ਘਰ ਦੀ ਉਸਾਰੀ ਦਾ ਕੰਮ ਅਗਲੇ ਹੁਕਮਾਂ ਤਕ ਸੀਲ ਕਰ ਦਿਤਾ ਹੈ।  
ਐਸਡੀਐਮ ਨੇ ਦਸਿਆ ਕਿ ਵਾਦ ਵਿਵਾਦ ਸਬੰਧੀ ਸਰਕਾਰ ਤੇ ਸ਼੍ਰੋਮਣੀ ਕਮੇਟੀ ਨਾਲ ਗੱਲਬਾਤ ਕਰੇਗੀ ਅਤੇ ਕਾਨੂੰਨ ਮੁਤਾਬਕ ਕਾਰਵਾਈ ਮੁਕੰਮਲ ਹੋਣ ਉਪਰੰਤ ਹੀ ਕਾਰ ਸੇਵਾ ਨਾਲ ਬਣ ਰਹੀ ਇਮਾਰਤ ਦੀ ਆਗਿਆ ਦਿਤੀ ਜਾਵੇਗੀ। ਭਾਈ ਬਲਦੇਵ ਸਿੰਘ ਵਡਾਲਾ ਨੇ ਦਸਿਆ ਕਿ ਸ਼੍ਰੋਮਣੀ ਕਮੇਟੀ ਮੁਲਾਜ਼ਮਾਂ ਬਦਸਲੂਕੀ ਕਰਦਿਆਂ ਮੈਨੂੰ ਅਪਸ਼ਬਦ ਵਰਤੇ ਹਨ, ਧੱਕਾਮੁੱਕੀ ਕੀਤੀ ਹੈ ਪਰ ਪੁਲਿਸ ਦਖ਼ਲ ਨਾਲ ਅਣਸੁਖਾਵੀਂ ਘਟਨਾ ਟਲ ਗਈ ਹੈ। ਭਾਈ ਵਡਾਲਾ ਮਤਾਬਕ ਨਾਲ ਡਿੱਚ ਨਾਲ ਕਰੀਬ 25-30 ਫੁੱਟ ਜ਼ਮੀਨ ਦੀ ਖੁਦਾਈ ਕਰਨ ਤੇ ਸੁਰੰਗਾਂ ਨਿਕਲੀਆਂ ਹਨ ਤੇ ਅਸਾਂ ਉਨ੍ਹਾਂ ਨੂੰ ਕਿਹਾ ਸੀ ਕਿ ਪੁਰਾਤਨ ਵਿਰਾਸਤ ਹੋ ਸਕਦੀ ਹੈ,ਇਸ ਲਈ ਸਬੰਧਤ ਵਿਭਾਗ ਦੀ ਸਹਿਮਤੀ ਤੇ ਸਲਾਹ ਕਰ ਲੈਣੀ ਚਾਹੀਦੀ ਪਰ ਉਨ੍ਹਾਂ ਲੜਨਾ ਸ਼ੁਰੂ ਕਰ ਦਿਤਾ। ਇਸ ਜ਼ਮੀਨ ਤੇ ਇਮਾਰਤ ਉਸਾਰਨ ਸਬੰਧੀ ਨਕਸ਼ਾ ਹੋਣਾ ਜ਼ਰੂਰੀ ਅਤੇ ਸੰਗਤ ਦੀ ਰਾਏ ਤੇ ਪੁਰਾਤਨ ਸੁਰੰਗਾਂ ਦੇ ਦਰਸ਼ਨ ਕਰਵਾਉਣੇ ਚਾਹੀਦੇ ਹਨ ਕਿ ਇਹ ਸੁਰੰਗਾਂ ਕਿਧਰ ਨੂੰ ਜਾਂਦੀਆਂ ਹਨ। ਭਾਈ ਵਡਾਲਾ ਮੁਤਾਬਕ ਕਾਰ ਸੇਵਾ ਵਾਲੇ ਬਾਬਾ ਕਸ਼ਮੀਰ ਸਿੰਘ ਭੂਰੀ ਵਾਲਿਆਂ ਨਾਲ ਕੀ ਐਗਰੀਮੈਂਟ ਹੋਇਆ ਹੈ, ਇਸ ਦਾ ਸੰਗਤ ਨੂੰ ਜਾਣੂ ਕਰਵਾਉਣਾ ਜ਼ਰੂਰੀ ਹੈ। ਜ਼ਿਕਰਯੋਗ ਹੈ ਕਿ ਨਵੇਂ ਜੋੜਾ ਘਰ ਦਾ ਟੱਕ ਲਾਉਣ ਸਮੇਂ ਵੀ ਤਿੱਖਾ ਵਾਦ-ਵਿਵਾਦ ਹੋਇਆ ਸੀ।