ਕਿਹਾ, ਇਸ ਤਰ੍ਹਾਂ ਤਾਂ ਪੀੜਤਾਂ ਨੂੰ ਕਦੇ ਵੀ ਨਿਆਂ ਨਹੀਂ ਮਿਲਣਾ
ਚੰਡੀਗੜ੍ਹ (ਗੁਰਉਪਦੇਸ਼ ਭੁੱਲਰ): ਪੰਜਾਬ ਹਰਿਆਣਾ ਹਾਈ ਕੋਰਟ ਵਲੋਂ ਕੋਟਕਪੂਰਾ ਗੋਲੀ ਕਾਂਡ ਮਾਮਲੇ ਕੁੰਵਰ ਵਿਜੈ ਪ੍ਰਤਾਪ ਸਿੰਘ ਜਾਂਚ ਰੀਪੋਰਟ ਰੱਦ ਕਰਨ ਤੇ ਦੁਬਾਰਾ ਜਾਂਚ ਕਰਵਾਉਣ ਦੇ ਫ਼ੈਸਲੇ ’ਤੇ ਰਿਟਾਇਰਡ ਜਸਟਿਸ ਰਣਜੀਤ ਸਿੰਘ ਨੇ ਵੀ ਅਪਣਾ ਪ੍ਰਤੀਕਰਮ ਦਿਤਾ ਹੈ।
Punjab and haryana High Court
ਜ਼ਿਕਰਯੋਗ ਹੈ ਕਿ ਜਸਟਿਸ ਰਣਜੀਤ ਸਿੰਘ ਦੀ ਅਗਵਾਈ ਵਿਚ ਬਣੇ ਕਮਿਸ਼ਨ ਨੇ ਪਹਿਲਾਂ ਬਹਿਬਲ ਕਲਾਂ ਤੇ ਕੋਟਕਪੂਰਾ ਗੋਲੀ ਕਾਂਡ ਦੀ ਜਾਂਚ ਕੀਤੀ ਸੀ ਅਤੇ ਉਸ ਦੇ ਆਧਾਰ ’ਤੇ ਅੱਗੇ ਸਿੱਟ ਵਲੋਂ ਕੁੰਵਰ ਵਿਜੈ ਪ੍ਰਤਾਪ ਸਿੰਘ ਦੀ ਅਗਵਾਈ ਵਿਚ ਗੋਲੀ ਕਾਂਡ ਦੀ ਜਾਂਚ ਕਰ ਕੇ 9 ਚਲਾਨ ਕੋਰਟ ਵਿਚ ਫ਼ਾਈਲ ਕੀਤੇ ਸਨ ਤੇ ਇਕ ਚਲਾਨ ਬਾਕੀ ਸੀ।
Kotakpura Goli Kand
ਜਸਟਿਸ ਰਣਜੀਤ ਸਿੰਘ ਨੇ ਹਾਈ ਕੋਰਟ ਦੇ ਫ਼ੈਸਲੇ ’ਤੇ ਹੈਰਾਨੀ ਪ੍ਰਗਟ ਕਰਦਿਆਂ ਲਿਖਤੀ ਬਿਆਨ ਜਾਰੀ ਕਰ ਕੇ ਕਿਹਾ ਹੈ ਕਿ ਇਹ ਇਸ ਤਰ੍ਹਾਂ ਦਾ ਇਕ ਵਿਲੱਖਣ ਹੀ ਮਾਮਲਾ ਹੈ ਜਿਸ ਵਿਚ ਹਾਈ ਕੋਰਟ ਨੇ ਜਾਂਚ ਪੂਰੀ ਹੋ ਜਾਣ ’ਤੇ ਚਲਾਨ ਪੇਸ਼ ਹੋਣ ਬਾਅਦ ਦਖ਼ਲ ਦਿਤਾ ਹੈ ਜੋ ਇਕ ਗ਼ੈਰ ਵਾਜਬ ਜਿਹਾ ਫ਼ੈਸਲਾ ਹੈ। ਉਨ੍ਹਾਂ ਕਿਹਾ ਕਿ ਸੁਪਰੀਮ ਕੋਰਟ ਦਾ ਵੀ ਨਿਰਦੇਸ਼ ਹੈ ਕਿ ਇਸ ਤਰ੍ਹਾਂ ਜਾਂਚ ਵਿਚ ਕੋਰਟ ਦਖ਼ਲ ਨਹੀਂ ਦੇ ਸਕਦੀ ਅਤੇ ਚਲਾਨ ਪੇਸ਼ ਹੋਣ ਬਾਅਦ ਤਾਂ ਮਾਮਲਾ ਟਰਾਇਲ ਕੋਰਟ ਵਿਚ ਹੀ ਜਾ ਸਕਦਾ ਹੈ।
Justice Ranjit Singh
ਪਹਿਲਾਂ ਇਸ ਗੋਲੀ ਕਾਂਡ ਵਿਚ ਪਿਛਲੀ ਸਰਕਾਰ ਦੋਸ਼ੀਆਂ ਨੂੰ ਬਚਾਉਂਦੀ ਰਹੀ ਅਤੇ ਬਾਅਦ ਵਿਚ ਜਨਤਕ ਦਬਾਅ ਕਾਰਨ ਹੀ ਜਾਂਚ ਪੜਤਾਲ ਦਾ ਕੰਮ ਅੱਗੇ ਵਧਿਆ ਤੇ ਹੁਣ ਜਾਂਚ ਪੂਰੀ ਹੋਣ ਤੇ ਚਲਾਨ ਪੇਸ਼ ਹੋਣ ਬਾਅਦ ਇਕਦਮ ਸਾਰੀ ਜਾਂਚ ਰੱਦ ਕਰ ਦੇਣ ਨਾਲ ਠੀਕ ਨਹੀਂ ਹੋਇਆ। ਉਨ੍ਹਾਂ ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੂੰ ਵੀ ਸਲਾਹ ਦਿਤੀ ਕਿ ਉਹ ਹਾਈ ਕੋਰਟ ਦੇ ਫ਼ੈਸਲੇ ਵਿਰੁਧ ਸੁਪਰੀਮ ਕੋਰਟ ਜਾਣ ਨਹੀਂ ਤਾਂ ਪੀੜਤਾਂ ਨੂੰ ਕਦੇ ਵੀ ਇਨਸਾਫ਼ ਨਹੀਂ ਮਿਲਣਾ।
