Mohali News: ਸੋਸ਼ਲ ਮੀਡੀਆ 'ਤੇ ਵਾਇਰਲ ਵੀਡੀਓ ਤੋਂ ਨੰਬਰ ਟਰੇਸ ਕਰ ਕੇ ਕੀਤਾ ਚਲਾਨ
ਐਸ.ਏ.ਐਸ. ਨਗਰ (ਸਤਵਿੰਦਰ ਸਿੰਘ ਧੜਾਕ): ਮੋਹਾਲੀ ਦੇ ਚੀਮਾ ਚੌਕ ਨੇੜੇ ਨੌਜਵਾਨਾਂ ਨੂੰ ਕਾਰ ਦੀ ਛੱਤ ਤੇ ਚੜ੍ਹ ਕੇ ਰੌਲਾ ਪਾਉਣਾ ਮਹਿੰਗਾ ਪੈ ਗਿਆ। ਇਨ੍ਹਾਂ ਦੀ ਵੀਡੀਉ ਜਦੋਂ ਕਿਸੇ ਰਾਹਗੀਰ ਨੇ ਸੋਸ਼ਲ ਮੀਡੀਆ ’ਤੇ ਵਾਇਰਲ ਕੀਤੀ ਤਾਂ ਮੋਹਾਲੀ ਪੁਲਿਸ ਨੇ ਕਾਰ ਦੇ ਨੰਬਰ ਦੇ ਆਧਾਰ ’ਤੇ ਇਨ੍ਹਾਂ ਦਾ ਪਤਾ ਲੱਭ ਕੇ ਚਲਾਨ ਕਰ ਦਿਤਾ ਹੈ।
ਇਹ ਘਟਨਾ ਸੋਮਵਾਰ ਸ਼ਾਮ ਦੀ ਦੱਸੀ ਜਾ ਰਹੀ ਹੈ ਜਿਸ ਵਿਚ ਚੀਮਾ ਚੌਕ ਨੇੜੇ ਤਿੰਨ ਵਾਹਨਾਂ ’ਚ ਸਵਾਰ ਕੁਝ ਵਿਅਕਤੀ ਛੱਤ ’ਤੇ ਚੜ੍ਹ ਕੇ ਖਿੜਕੀ ਤੋਂ ਬਾਹਰ ਆ ਕੇ ਹੰਗਾਮਾ ਕਰ ਰਹੇ ਸਨ। ਉਹ ਨਾ ਸਿਰਫ਼ ਅਪਣੀ ਜਾਨ ਨੂੰ ਖ਼ਤਰੇ ਵਿਚ ਪਾ ਰਿਹਾ ਸੀ ਸਗੋਂ ਹੋਰ ਵਾਹਨਾਂ ਲਈ ਵੀ ਖ਼ਤਰਾ ਪੈਦਾ ਕਰ ਰਿਹਾ ਸੀ। ਮੁੰਡੇ ਅਪਣੇ ਸਟੰਟ ਕਰਦੇ ਹੋਏ ਵੀਡੀਉ ਬਣਾ ਰਹੇ ਸਨ। ਕੁੱਝ ਰਾਹਗੀਰਾਂ ਨੇ ਉਸ ਦੀ ਵੀਡੀਉ ਵੀ ਬਣਾ ਕੇ ਸੋਸ਼ਲ ਮੀਡੀਆ ’ਤੇ ਪੋਸਟ ਕਰ ਦਿਤੀ।
ਇਹ ਵੀਡੀਉ ਟ੍ਰੈਫ਼ਿਕ ਜ਼ੋਨ-1 ਦੇ ਇੰਚਾਰਜ ਇੰਸਪੈਕਟਰ ਗੁਰਸਿਮਰਨ ਸਿੰਘ ਗਿੱਲ ਕੋਲ ਵੀ ਪਹੁੰਚੀ, ਜਿਨ੍ਹਾਂ ਨੇ ਤੁਰੰਤ ਕਾਰਵਾਈ ਕਰਦਿਆਂ ਨਾਕਾਬੰਦੀ ਕਰ ਕੇ ਵਾਹਨਾਂ ਨੂੰ ਘੇਰ ਕੇ ਚਲਾਨ ਕੱਟੇ। ਹਾਲਾਂਕਿ ਗੇੜੀ ਰੂਟ ਵਜੋਂ ਜਾਣੀ ਜਾਂਦੀ ਮਾਰਕੀਟ ਫੇਜ਼-3ਬੀ2 ਵਿਚ ਸਟੰਟ ਕਰਦੇ ਵਾਹਨਾਂ ਦੀਆਂ ਪਹਿਲਾਂ ਵੀ ਕਈ ਵੀਡੀਉਜ਼ ਵਾਇਰਲ ਹੋਈਆਂ, ਜਿਸ ਤੋਂ ਬਾਅਦ ਪੁਲਿਸ ਨੇ ਕਾਰਵਾਈ ਕਰਦਿਆਂ ਚਲਾਨ ਕੱਟੇ ਅਤੇ ਕਈ ਲੋਕਾਂ ਵਿਰੁਧ ਐਫ਼ਆਈਆਰ ਵੀ ਦਰਜ ਕੀਤੀ। ਪੁਲਿਸ ਦਾ ਦਾਅਵਾ ਇਹ ਵੀ ਰਿਹਾ ਕਿ ਹੁਣ ਫ਼ੇਜ਼-3ਬੀ2 ਤੋਂ ਗੇੜੀ ਰੂਟ ਦਾ ਟੈਗ ਹਟਾ ਦਿਤਾ ਗਿਆ ਹੈ। ਕਿਉਕਿ ਇੱਥੇ ਵਿਸ਼ੇਸ਼ ਨਾਕਾਬੰਦੀ ਕਰਕੇ ਵਾਹਨਾਂ ਦੀ ਚੈਕਿੰਗ ਕੀਤੀ ਜਾਂਦੀ ਹੈ ਅਤੇ ਹੰਗਾਮਾ ਵੀ ਘਟਿਆ ਹੈ।
ਇੰਚਾਰਜ ਗੁਰਸਿਮਰਨ ਸਿੰਘ ਗਿੱਲ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਇਕ ਵੀਡੀਉ ਮਿਲੀ ਜਿਸ ਵਿਚ ਕੁੱਝ ਨੌਜਵਾਨ ਤਿੰਨ ਗੱਡੀਆਂ ਫ਼ਾਰਚੂਨਰ, ਈਟੀਓਸ ਅਤੇ ਵੇਨਿਊ ਦੀ ਛੱਤ ’ਤੇ ਚੜ੍ਹ ਕੇ ਹੰਗਾਮਾ ਕਰ ਰਹੇ ਹਨ। ਇਸ ਦੇ ਨਾਲ ਹੀ ਕੁਝ ਨੌਜਵਾਨ ਕਾਰ ਦੇ ਸ਼ੀਸ਼ਿਆਂ ’ਤੇ ਖੁਲ੍ਹੇ ਸ਼ੀਸ਼ਿਆਂ ’ਤੇ ਬੈਠੇ ਹਨ ਅਤੇ ਸੜਕਾਂ ’ਤੇ ਘੁੰਮ ਰਹੇ ਹਨ। ਉਨ੍ਹਾਂ ਚੀਮਾ ਚੌਕ ਨੇੜੇ ਨਾਕਾ ਲਗਾ ਕੇ ਤਿੰਨਾਂ ਵਾਹਨਾਂ ਨੂੰ ਟਰੇਸ ਕੀਤਾ।
ਖ਼ਤਰਨਾਕ ਡਰਾਈਵਿੰਗ, ਛੱਤ ’ਤੇ ਬੈਠ ਕੇ ਹੰਗਾਮਾ ਕਰਨ ਅਤੇ ਦੂਜਿਆਂ ਲਈ ਖ਼ਤਰਾ ਪੈਦਾ ਕਰਨ ਵਾਲੇ ਇਨ੍ਹਾਂ ਵਾਹਨਾਂ ਦੇ ਚਲਾਨ ਕੱਟੇ ਗਏ ਹਨ। ਉਨ੍ਹਾਂ ਦਸਿਆ ਕਿ ਹੁਣ ਤੱਕ ਜ਼ੋਨ-1 ਵਿਚ ਟ੍ਰੈਫ਼ਿਕ ਨਿਯਮਾਂ ਦੀ ਉਲੰਘਣਾ ਕਰਨ ਵਾਲੇ 150 ਤੋਂ ਵੱਧ ਵਿਅਕਤੀਆਂ ਦੇ ਚਲਾਨ ਕੀਤੇ ਜਾ ਚੁੱਕੇ ਹਨ ਅਤੇ ਇਹ ਕਾਰਵਾਈ ਭਵਿੱਖ ਵਿੱਚ ਵੀ ਜਾਰੀ ਰਹੇਗੀ।
