ਵਿਦਿਆਰਥੀਆਂ ਤੋਂ 20-22 ਲੱਖ ਲੈ ਕੇ ਫ਼ਰਜ਼ੀ ਦਸਤਾਵੇਜ਼ਾਂ ਉਤੇ ਉਨ੍ਹਾਂ ਨੂੰ ਪੜ੍ਹਾਈ ਲਈ ਆਸਟਰੇਲੀਆ ਅਤੇ ਨਿਊਜ਼ੀਲੈਂਡ ਭੇਜਣ ਵਾਲੀ ਮੋਹਾਲੀ...
ਚੰਡੀਗੜ੍ਹ (ਸਸਸ) : ਵਿਦਿਆਰਥੀਆਂ ਤੋਂ 20-22 ਲੱਖ ਲੈ ਕੇ ਫ਼ਰਜ਼ੀ ਦਸਤਾਵੇਜ਼ਾਂ ਉਤੇ ਉਨ੍ਹਾਂ ਨੂੰ ਪੜ੍ਹਾਈ ਲਈ ਆਸਟਰੇਲੀਆ ਅਤੇ ਨਿਊਜ਼ੀਲੈਂਡ ਭੇਜਣ ਵਾਲੀ ਮੋਹਾਲੀ ਦੇ ਫੇਸ-10 ਦੀ ਸੀ-ਬਰਡ ਇਮੀਗ੍ਰੇਸ਼ਨ ਇੰਟਰਨੈਸ਼ਨਲ ਕੰਪਨੀ ਉਤੇ ਈਡੀ (ਇਨਫੋਰਸਮੈਂਟ ਡਾਇਰੈਕਟੋਰੇਟ) ਨੇ ਸ਼ਿਕੰਜਾ ਕੱਸ ਦਿਤਾ ਹੈ। ਈਡੀ ਨੇ ਕੰਪਨੀ ਦੀ 8 ਕਰੋੜ ਦੀ ਪ੍ਰਾਪਰਟੀ ਅਟੈਚ ਕਰ ਦਿਤੀ ਹੈ।
ਕੁੱਝ ਸਮਾਂ ਪਹਿਲਾਂ ਆਫ਼ਿਸ ਉਤੇ ਹੋਈ ਰੇਡ ਵਿਚ ਫ਼ਰਜ਼ੀ ਸਰਟੀਫਿਕੇਟ ਤਿਆਰ ਕਰਨ ਲਈ ਤਹਿਸੀਲਦਾਰ ਦੀ ਜਾਅਲੀ ਮੋਹਰ, ਚਾਰ ਬੈਂਕਾਂ ਦੀਆਂ ਜਾਅਲੀ ਮੋਹਰਾਂ, ਇਕ ਦਰਜਨ ਤੋਂ ਵੱਧ ਹਾਰਡ ਡਿਸਕਾਂ, 10 ਲੈਪਟਾਪ, ਐਗਜ਼ੀਕਿਊਟਿਵ ਮੈਜਿਸਟ੍ਰੇਟ ਦੀ ਜਾਅਲੀ ਮੋਹਰ, ਪ੍ਰਾਈਵੇਟ ਹਸਪਤਾਲਾਂ ਅਤੇ ਟਰਾਂਸਪੋਰਟ ਕੰਪਨੀਆਂ ਦੀਆਂ ਜਾਅਲੀ ਮੋਹਰਾਂ, ਪੀਐਨਬੀ ਦੀ 1000 ਤੋਂ ਜ਼ਿਆਦਾ ਖ਼ਾਲੀ ਐਫਡੀ, ਲੈਟਰ ਪੈਡ, ਇਕ ਪਿਸਤੌਲ ਅਤੇ ਹੋਰ ਸਾਮਾਨ ਬਰਾਮਦ ਕੀਤਾ ਗਿਆ ਸੀ।
ਕੰਪਨੀ ਦਾ ਇਕ ਡਾਇਰੈਕਟਰ ਪ੍ਰਿਤਪਾਲ ਸਿੰਘ ਅਤੇ ਇਕ ਹੋਰ ਡਾਇਰੈਕਟਰ ਹੈ। ਸਟੂਡੈਂਟਸ ਦੇ ਐਗਰੀਕਲਚਰ ਸਰਟੀਫਿਕੇਟ, ਬੈਂਕ ਦੀ ਐਫਡੀ ਤੋਂ ਇਲਾਵਾ ਪੀਐਸਈਬੀ ਅਤੇ ਹਿਮਾਚਲ ਬੋਰਡ ਦੇ ਜਾਅਲੀ ਸਰਟੀਫਿਕੇਟ ਇਹ ਲੋਕ ਅਪਣੇ ਆਪ ਹੀ ਬਣਾਉਂਦੇ ਸਨ। ਈਡੀ ਨੇ 17 ਅਕਤੂਬਰ 2017 ਨੂੰ ਜਾਂਚ ਸ਼ੁਰੂ ਕੀਤੀ ਸੀ। ਕੰਪਨੀ ਦੇ ਡਾਇਰੈਕਟਰ ਪ੍ਰਿਤਪਾਲ ਦਾ ਆਸਟਰੇਲੀਆ ਦੇ ਕੁੱਝ ਕਾਲਜਾਂ ਵਿਚ ਵੀ ਸ਼ੇਅਰ ਹੈ।
ਉਹ ਇਥੋਂ ਸਟੂਡੈਂਟਸ ਨੂੰ ਉਨ੍ਹਾਂ ਕਾਲਜਾਂ ਵਿਚ ਐਡਮਿਸ਼ਨ ਦਿਵਾਉਣ ਦਾ ਲਾਲਚ ਦਿੰਦੇ ਸਨ। ਇਸ ਦੇ ਬਦਲੇ ਵਿਚ 20 ਤੋਂ 22 ਲੱਖ ਪ੍ਰਤੀ ਵਿਦਿਆਰਥੀ ਵਸੂਲਦੇ ਸਨ ਅਤੇ ਉਨ੍ਹਾਂ ਨੂੰ ਵਿਦੇਸ਼ ਭੇਜਣ ਲਈ ਜਾਅਲੀ ਦਸਤਾਵੇਜ਼ ਤਿਆਰ ਕਰਦੇ ਸਨ।
