ਮੁੰਬਈ ’ਚ ਘਰਵਾਲੀ ਨਾਲ ਲੜ ਕੇ ਵਿਅਕਤੀ ਨੇ ਤਿੰਨ ਬੱਚਿਆਂ ਨੂੰ ਜ਼ਹਿਰ ਦਿਤਾ, ਇਕ ਦੀ ਮੌਤ

ਮੁੰਬਈ, 1 ਜੁਲਾਈ : ਮੁੰਬਈ ’ਚ ਇਕ ਵਿਅਕਤੀ ਨੇ ਅਪਣੀ ਘਰਵਾਲੀ ਨਾਲ ਝਗੜਾ ਹੋਣ ਤੋਂ ਬਾਅਦ ਅਪਣੇ ਬੱਚਿਆਂ ਨੂੰ ਚੂਹੇ ਮਾਰਨ ਦੀ ਦਵਾਈ ਆਈਸਕ੍ਰੀਮ ’ਚ ਮਿਲਾ ਕੇ ਖੁਆ ਦਿਤੀ। ਇਸ ਵਿਚ ਜੋੜੇ ਦੇ 6 ਸਾਲਾ ਬੱਚੇ ਦੀ ਮੌਤ ਹੋ ਗਈ ਅਤੇ ਉਸ ਦੇ ਦੋਵੇਂ ਭਰਾ-ਭੈਣ ਹਸਪਤਾਲ ’ਚ ਦਾਖ਼ਲ ਹਨ। ਪੁਲਿਸ ਦੇ ਇਕ ਅਧਿਕਾਰੀ ਨੇ ਇਹ ਜਾਣਕਾਰੀ ਦਿਤੀ।             ਅਧਿਕਾਰੀ ਨੇ ਦਸਿਆ ਕਿ ਘਟਨਾ 25 ਜੂਨ ਦੀ ਹੈ ਪਰ ਮੰਗਲਵਾਰ ਨੂੰ ਇਸ ਦਾ ਪਤਾ ਲੱਗਾ, ਜਦੋਂ ਸਰਕਾਰੀ ਹਸਪਤਾਲ ਵਿਚ ਬੱਚੇ ਦੀ ਮੌਤ ਹੋ ਗਈ ਅਤੇ ਡਾਕਟਰਾਂ ਨੇ ਇਸ ਬਾਰੇ ਮਾਨਖੁਰਦ ਪੁਲਿਸ ਨੂੰ ਸੂਚਤ ਕੀਤਾ। ਬੱਚਿਆਂ ਦੀ ਮਾਂ ਨਾਜ਼ੀਆ ਬੇਗਮ ਨੇ ਪੁਲਿਸ ਨੂੰ ਦਸਿਆ ਕਿ ਉਸ ਦਾ ਪਤੀ ਅਲੀ ਨੌਸ਼ਾਦ ਅੰਸਾਰੀ (27) ਦਿਹਾੜੀ ’ਤੇ ਕੰਮ ਕਰਦਾ ਹੈ। ਦੋਵਾਂ ਦਰਮਿਆਨ ਪੈਸਿਆਂ ਨੂੰ ਲੈ ਕੇ ਹਮੇਸ਼ਾ ਝਗੜਾ ਹੁੰਦਾ ਰਹਿੰਦਾ ਹੈ। ਨਾਜ਼ੀਆ ਨੇ ਦਸਿਆ ਕਿ 25 ਜੂਨ ਨੂੰ ਵੀ ਉਨ੍ਹਾਂ ਵਿਚਾਲੇ ਝਗੜਾ ਹੋਇਆ ਸੀ, ਜਿਸ ਤੋਂ ਬਾਅਦ ਮਾਨਖੁਰਦ ਦੇ ਸਾਠੇ ਨਗਰ ਸਥਿਤ ਅਪਣੇ ਘਰ ਤੋਂ ਅਪਣੀ ਭੈਣ ਕੋਲ ਚਲੀ ਗਈ ਸੀ। ਉਸ ਨੇ ਪੁਲਿਸ ਨੂੰ ਦਸਿਆ ਕਿ ਅੰਸਾਰੀ ਤਿੰਨੋਂ ਬੱਚਿਆਂ  ਨੂੰ ਆਈਸਕ੍ਰੀਮ ਖੁਆਉਣ ਦਾ ਵਾਅਦਾ ਕਰ ਕੇ ਅਪਣੇ ਨਾਲ ਲੈ ਗਿਆ ਅਤੇ ਉਸ ਨੇ ਕਥਿਤ ਤੌਰ ’ਤੇ ਜ਼ਹਿਰ ਖੁਆ ਦਿਤਾ। ਇਸ ਵਿਚਾਲੇ ਨਾਜ਼ੀਆ ਅਪਣੇ ਘਰ ਆ ਗਈ। ਸ਼ੁਰੂਆਤ ’ਚ ਉਸ ਨੇ ਡਾਕਟਰਾਂ ਨੂੰ ਝੂਠ ਕਹਿ ਦਿਤਾ ਕਿ ਬੱਚਿਆਂ ਨੇ ਗ਼ਲਤੀ ਨਾਲ ਚੂਹੇ ਮਾਰਨ ਵਾਲੀ ਦਵਾਈ ਖਾ ਲਈ ਹੈ ਪਰ ਜਦੋਂ ਉਸ ਦੇ ਪੁੱਤਰ ਦੀ ਮੌਤ ਹੋ ਗਈ ਤਾਂ ਉਸ ਨੇ ਪੁਲਿਸ ਨੂੰ ਸਚਾਈ ਦੱਸਣ ਦਾ ਫ਼ੈਸਲਾ ਕੀਤਾ। ਪੁਲਿਸ ਨੇ ਕਤਲ ਤੇ ਇਰਾਦਾ ਕਤਲ ਦਾ ਮਾਮਲਾ ਦਰਜ ਕਰ ਲਿਆ ਹੈ। ਦੋਸ਼ੀ ਹਾਲੇ ਫਰਾਰ ਹੈ। (ਏਜੰਸੀ)