'ਜੇਕਰ ਮੋਦੀ ਸਰਕਾਰ ਨਾ ਬਦਲੀ ਗਈ ਤਾਂ ਇਸ ਦੇਸ਼ ਵਿਚ ਖੇਤੀ, ਫੌਜ ਅਤੇ ਸਭ ਕੁਝ ਜੋ ਚੰਗਾ ਹੈ, ਖ਼ਤਮ ਹੋ ਜਾਵੇਗਾ'

 ਨਵੀਂ ਦਿੱਲੀ: ਮੇਘਾਲਿਆ ਦੇ ਸਾਬਕਾ ਰਾਜਪਾਲ ਸਤਿਆਪਾਲ ਮਲਿਕ ਨੇ ਕਿਹਾ ਕਿ ਹਰਿਆਣਾ ਦੇ ਨੂਹ ਵਿੱਚ ਹੋਏ ਦੰਗੇ ਸਰਕਾਰੀ ਸਪਾਂਸਰਡ ਸਨ। ਕੇਂਦਰ ਸਰਕਾਰ ਇਸ ਨੂੰ ਅਲੀਗੜ੍ਹ, ਮੁਜ਼ੱਫਰਨਗਰ, ਆਗਰਾ, ਭਰਤਪੁਰ ਅਤੇ ਜੈਪੁਰ ਤੱਕ ਫੈਲਾਉਣਾ ਚਾਹੁੰਦੀ ਸੀ ਪਰ ਕਿਸਾਨਾਂ ਨੇ  ਉਨ੍ਹਾਂ ਦਾ ਸਾਥ ਨਹੀਂ ਦਿਤਾ। ਉਹ ਅਜੇ ਵੀ ਇਸ ਤਰ੍ਹਾਂ ਦੀ ਕੋਸ਼ਿਸ਼ ਕਰਨਗੇ, ਪਰ ਸਾਨੂੰ ਇਸ ਵਿੱਚ ਆਉਣ ਦੀ ਲੋੜ ਨਹੀਂ ਹੈ।

ਮਲਿਕ ਨੇ ਇਹ ਗੱਲਾਂ ਸੀਕਰ ਦੇ ਐੱਸਕੇ ਗਰਾਊਂਡ 'ਚ ਆਯੋਜਿਤ ਜਾਟ-ਮੁਸਲਿਮ-ਮੇਘਵਾਲ ਸੰਮੇਲਨ 'ਚ ਸ਼ਾਮਲ ਹੋਣ ਤੋਂ ਬਾਅਦ ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਕਹੀਆਂ। ਉਨ੍ਹਾਂ ਕਿਹਾ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਮਨੀਪੁਰ ਵੀ ਨਹੀਂ ਗਏ। ਮੇਰੇ ਪੈਰਾਂ ਦੀ ਹਾਲਤ ਬਹੁਤ ਖਰਾਬ ਹੈ, ਪਰ ਮੈਂ ਉਨ੍ਹਾਂ ਨੂੰ ਹਟਾਉਣ ਲਈ ਥਾਂ-ਥਾਂ ਜਾਵਾਂਗਾ।ਇਹ ਬਹੁਤ ਖਤਰਨਾਕ, ਜ਼ਾਲਮ ਅਤੇ ਦੁਸ਼ਟ ਲੋਕ ਹਨ। ਇਨ੍ਹਾਂ ਨੂੰ ਦੂਰ ਕਰਨਾ ਤੁਹਾਡਾ ਫਰਜ਼ ਹੈ। ਜੇਕਰ ਇਹ ਸਰਕਾਰ ਨਾ ਬਦਲੀ ਗਈ ਤਾਂ ਇਸ ਦੇਸ਼ ਵਿੱਚ ਖੇਤੀ, ਫੌਜ ਅਤੇ ਸਭ ਕੁਝ ਜੋ ਚੰਗਾ ਹੈ, ਖਤਮ ਹੋ ਜਾਵੇਗਾ।

ਕਾਨਫਰੰਸ ਬਾਰੇ ਸਾਬਕਾ ਰਾਜਪਾਲ ਨੇ ਕਿਹਾ ਕਿ ਹੁਣ ਅਜਿਹੇ ਪ੍ਰੋਗਰਾਮਾਂ ਦੀ ਲੋੜ ਹੈ ਕਿਉਂਕਿ ਦੇਸ਼ ਵਿੱਚ ਹਿੰਦੂ-ਮੁਸਲਿਮ ਦੰਗੇ ਕਰਵਾਉਣ ਦੇ ਯਤਨ ਕੀਤੇ ਜਾ ਰਹੇ ਹਨ। ਮਲਿਕ ਨੇ ਕਿਹਾ ਕਿ ਹੁਣ ਦਿੱਲੀ ਵਿੱਚ ਮੋਦੀ ਸਰਕਾਰ ਨਹੀਂ ਬਣੇਗੀ। ਪੁਲਵਾਮਾ ਹਮਲੇ ਵਿਚ ਵੀ ਕੇਂਦਰ ਸਰਕਾਰ ਨੇ ਹੀ ਫੌਜੀਆਂ ਨੂੰ ਇਸ ਲਈ ਮਾਰਿਆ ਕਿਉਂਕਿ ਉਨ੍ਹਾਂ ਨੇ ਫੌਜੀਆਂ ਨੂੰ ਹਵਾਈ ਜਹਾਜ਼ ਨਹੀਂ ਦਿੱਤੇ ਸਨ। ਮਲਿਕ ਨੇ ਕਿਹਾ- ਮੀਡੀਆ 'ਚ ਖ਼ਬਰ ਆ ਰਹੀ ਹੈ ਕਿ ਫੌਜੀਆਂ ਦੀਆਂ ਅਰਜ਼ੀਆਂ ਗ੍ਰਹਿ ਮੰਤਰਾਲੇ 'ਚ 4 ਮਹੀਨਿਆਂ ਤੋਂ ਪੈਂਡਿੰਗ ਰਹੀਆਂ। ਜੇ ਤੁਸੀਂ ਮੈਨੂੰ ਹਵਾਈ ਜਹਾਜ਼ ਦੇਣ ਲਈ ਕਿਹਾ ਹੁੰਦਾ, ਤਾਂ ਮੈਂ ਦੇ ਦਿੰਦਾ। ਮੈਂ ਇਮਤਿਹਾਨਾਂ ਲਈ ਉਥੋਂ ਦੇ ਮੁੰਡਿਆਂ ਨੂੰ ਹਵਾਈ ਜਹਾਜ਼ ਦੇ ਦਿੰਦਾ ਸੀ।

ਮਲਿਕ ਨੇ ਕਿਹਾ ਕਿ ਭਾਰਤ ਦਾ ਪੂਰਾ ਇਤਿਹਾਸ ਹਿੰਦੂਆਂ ਅਤੇ ਮੁਸਲਮਾਨਾਂ ਦੀ ਏਕਤਾ ਦਾ ਰਿਹਾ ਹੈ। ਅਜਿਹੀ ਸਥਿਤੀ ਵਿੱਚ ਹਿੰਦੂ-ਮੁਸਲਮਾਨ ਵਿੱਚ ਉਲਝਣ ਦੀ ਲੋੜ ਨਹੀਂ ਹੈ। ਉਨ੍ਹਾਂ ਕਿਹਾ ਕਿ ਹਲਦੀ ਘਾਟੀ ਵਿਚ ਰਾਣਾ ਪ੍ਰਤਾਪ ਦੀ ਤਰਫੋਂ ਆਏ ਕਮਾਂਡਰ ਦਾ ਨਾਂ ਹਕੀਮ ਖਾਨ ਸੀ। ਇਸੇ ਤਰ੍ਹਾਂ ਹਸਨ ਖਾਨ ਮੇਵਾਤੀ ਨੇ ਰਾਣਾ ਸਾਂਗਾ ਨਾਲ ਲੜਾਈ ਕੀਤੀ। ਦੇਸ਼ ਦਾ ਇਤਿਹਾਸ ਅਜਿਹੇ ਲੋਕਾਂ ਨਾਲ ਭਰਿਆ ਪਿਆ ਹੈ।
ਮਲਿਕ ਨੇ ਕਿਹਾ ਕਿ ਕੇਂਦਰ ਸਰਕਾਰ ਖੇਤੀ ਅਤੇ ਫੌਜ ਨੂੰ ਖ਼ਤਮ ਕਰਨਾ ਚਾਹੁੰਦੀ ਹੈ। ਦੱਸੋ ਕਿਹੜਾ ਨੌਜਵਾਨ ਆਪਣੀ ਜਾਨ ਖ਼ਤਰੇ ਵਿਚ ਪਾ ਕੇ ਸਿਰਫ਼ 4 ਸਾਲ ਲਈ ਫ਼ੌਜ ਵਿਚ ਭਰਤੀ ਹੋਵੇਗਾ। ਇਸ ਦਾ ਨਤੀਜਾ ਇਹ ਹੋਵੇਗਾ ਕਿ ਸਾਡੀ ਫੌਜ ਬੇਅਸਰ ਹੋ ਜਾਵੇਗੀ।