ਡੁੱਬਣ ਵਾਲੇ ਵਿਦਿਆਰਥੀਆਂ ਦੇ ਨਾਂ ਅੰਸ਼ੁਲ ਅਤੇ ਆਯੂਸ਼ ਹਨ, ਜੋ ਆਪਣੇ ਪੰਜ ਸਕੂਲੀ ਦੋਸਤਾਂ ਨਾਲ ਬਿਆਸ ਦਰਿਆ 'ਤੇ ਸੈਲਫੀ ਲੈਣ ਆਏ ਸਨ

ਕਾਂਗੜਾ : ਹਿਮਾਚਲ ਦੇ ਕਾਂਗੜਾ ਜ਼ਿਲ੍ਹੇ ਦੇ ਡੇਹਰਾ ਪਿੰਡ ਦੇ ਨਾਲ ਵਗਣ ਵਾਲੇ ਬਿਆਸ ਦਰਿਆ 'ਤੇ ਸੈਲਫੀ ਲੈਣ ਦੀ ਕੋਸ਼ਿਸ਼ ਵਿਚ ਦੋ ਸਕੂਲੀ ਵਿਦਿਆਰਥੀ ਡੁੱਬ ਗਏ। ਇਸ ਦੇ ਨਾਲ ਹੀ NDRF ਦੀ ਟੀਮ ਨੇ ਤਲਾਸ਼ੀ ਮੁਹਿੰਮ ਸ਼ੁਰੂ ਕਰ ਦਿਤੀ ਹੈ। ਡੁੱਬਣ ਵਾਲੇ ਵਿਦਿਆਰਥੀਆਂ ਦੇ ਨਾਂ ਅੰਸ਼ੁਲ ਅਤੇ ਆਯੂਸ਼ ਹਨ, ਜੋ ਆਪਣੇ ਪੰਜ ਸਕੂਲੀ ਦੋਸਤਾਂ ਨਾਲ ਬਿਆਸ ਦਰਿਆ 'ਤੇ ਸੈਲਫੀ ਲੈਣ ਆਏ ਸਨ। ਇਸ ਵਿਚੋਂ ਕਠਿਆਡਾ ਪਿੰਡ ਦਾ ਰਹਿਣ ਵਾਲਾ ਅੰਸ਼ੁਲ ਆਪਣੇ ਮਾਪਿਆਂ ਦਾ ਇਕਲੌਤਾ ਪੁੱਤਰ ਹੈ।

Drown

ਜਾਣਕਾਰੀ ਮੁਤਾਬਕ ਅੰਸ਼ੁਲ ਅਤੇ ਆਯੂਸ਼ ਆਪਣੇ 5 ਸਕੂਲੀ ਦੋਸਤਾਂ ਨਾਲ ਬਿਆਸ ਦਰਿਆ ਦੇ ਕੰਢੇ ਚਟਾਨਾਂ 'ਤੇ ਪਾਰਟੀ ਕਰਨ ਅਤੇ ਸੈਲਫੀ ਲੈਣ ਆਏ ਸਨ। ਜਦਕਿ ਘਰ ਆਧਾਰ ਕਾਰਡ ਅੱਪਡੇਟ ਕਰਨ ਦਾ ਬਹਾਨਾ ਬਣਾਇਆ ਸੀ। NDRF ਨੂੰ ਅਜੇ ਤੱਕ ਵਿਦਿਆਰਥੀਆਂ ਦੀਆਂ ਲਾਸ਼ਾਂ ਨਹੀਂ ਮਿਲੀਆਂ ਹਨ। ਹਾਲਾਂਕਿ ਮੌਕੇ ਤੋਂ ਕੱਪੜੇ, ਕੋਲਡ ਡਰਿੰਕ ਦੀਆਂ ਬੋਤਲਾਂ ਅਤੇ ਗਲਾਸ ਮਿਲੇ ਹਨ। ਇਸ ਤੋਂ ਇਲਾਵਾ ਸਕੂਟੀ ਵੀ ਸੜਕ ਦੇ ਕਿਨਾਰੇ ਖੜ੍ਹੀ ਮਿਲੀ ਹੈ। ਇਹ ਵੀ ਦੱਸਿਆ ਜਾ ਰਿਹਾ ਹੈ ਕਿ ਹੋਰ ਦੋਸਤ ਵੀ ਆਪਣੀ ਬਾਈਕ ਲੈ ਕੇ ਆਏ ਸਨ।

ਅੰਸ਼ੁਲ ਅਤੇ ਆਯੂਸ਼ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ, ਗੜਲੀ ਵਿਚ ਗਿਆਰਵੀਂ ਜਮਾਤ ਵਿਚ ਇਕੱਠੇ ਪੜ੍ਹਦੇ ਸਨ। ਫਿਲਹਾਲ ਨੂਰਪੁਰ ਤੋਂ NDRF ਦੀ 16 ਮੈਂਬਰੀ ਟੀਮ, ਜਵਾਲਾਮੁਖੀ ਦੇ ਡੀਐੱਸਪੀ ਚੰਦਰਪਾਲ ਸਿੰਘ ਅਤੇ ਡੇਹਰਾ ਪੁਲਿਸ ਤਲਾਸ਼ੀ ਮੁਹਿੰਮ 'ਚ ਜੁਟੀ ਹੋਈ ਹੈ। ਇਸ ਦੇ ਨਾਲ ਹੀ ਪਤਾ ਲੱਗਾ ਹੈ ਕਿ ਕਈ ਵਿਦਿਆਰਥੀਆਂ ਨੂੰ ਇੱਥੇ ਸੈਲਫੀ ਲੈਂਦੇ ਦੇਖਿਆ ਗਿਆ ਸੀ।

Drowning

ਜਾਣਕਾਰੀ ਅਨੁਸਾਰ ਅੰਸ਼ੁਲ ਕੁਮਾਰ ਪੁੱਤਰ ਵਰਿੰਦਰ ਕੁਮਾਰ ਪਿੰਡ ਕਠਿਆਡਾ ਗੜਲੀ ਜ਼ਿਲ੍ਹਾ ਕਾਂਗੜਾ ਦਾ ਰਹਿਣ ਵਾਲਾ ਸੀ, ਜੋ ਆਪਣੇ ਮਾਪਿਆਂ ਦਾ ਇਕਲੌਤਾ ਪੁੱਤਰ ਸੀ। ਜਦਕਿ ਆਯੂਸ਼ ਪੁੱਤਰ ਰਾਜਪਾਲ ਪਿੰਡ ਅਤੇ ਡਾਕਖਾਨਾ ਗੜਲੀ ਵਿਖੇ ਆਪਣੇ ਨਾਨਕੇ ਰਹਿੰਦਾ ਸੀ। ਉਂਝ ਆਯੂਸ਼ ਦਾ ਘਰ ਊਨਾ ਜ਼ਿਲ੍ਹੇ ਦੇ ਅੰਬ ਦੇ ਪੋਲੀਆ ਪਰੋਟਾਨ ਪਿੰਡ 'ਚ ਹੈ। ਦੋਵਾਂ ਦੀ ਉਮਰ ਵੀ 16 ਸਾਲ ਹੈ। ਇਹ ਵੀ ਦੱਸਿਆ ਗਿਆ ਹੈ ਕਿ ਦੋਵੇਂ ਸਨਿਚਰਵਾਰ ਸਵੇਰੇ ਸਕੂਟੀ 'ਤੇ ਪਰਾਗਪੁਰ ਵੱਲ ਗਏ ਸਨ, ਪਰ ਸ਼ਾਮ ਤੱਕ ਘਰ ਨਹੀਂ ਪਹੁੰਚੇ। ਇਨ੍ਹਾਂ ਦੋਵਾਂ ਦੀ ਸਥਾਨਕ ਲੋਕਾਂ ਨੇ ਆਪਣੇ ਤੌਰ 'ਤੇ ਭਾਲ ਕੀਤੀ। ਕਾਫੀ ਮੁਸ਼ੱਕਤ ਤੋਂ ਬਾਅਦ ਚੰਬਾ ਅਧੀਨ ਬਿਆਸ ਦਰਿਆ ਦੇ ਕੰਢੇ ਤੋਂ ਸਕੂਟੀ ਮਿਲੀ। ਇਸ ਤੋਂ ਬਾਅਦ ਪਰਿਵਾਰ ਵਾਲਿਆਂ ਨੇ ਬਿਆਸ ਦਰਿਆ ਦੇ ਕੰਢੇ ਚੱਟਾਨਾਂ ਵਿਚਕਾਰ ਰੇਤ 'ਤੇ ਆਪਣੇ ਕੱਪੜੇ ਅਤੇ ਮੋਬਾਈਲ ਬਰਾਮਦ ਕੀਤੇ।

ਅੰਸ਼ੁਲ ਦੇ ਦਾਦਾ ਕੇਵਲ ਕ੍ਰਿਸ਼ਨ ਨੇ ਦੱਸਿਆ ਕਿ ਉਹ ਆਪਣਾ ਆਧਾਰ ਕਾਰਡ ਅਪਡੇਟ ਕਰਨ ਲਈ ਸਵੇਰੇ 10 ਵਜੇ ਘਰੋਂ ਨਿਕਲਿਆ ਸੀ ਪਰ ਜਦੋਂ ਉਹ ਦੋ ਵਜੇ ਤੱਕ ਘਰ ਨਹੀਂ ਪਰਤਿਆ ਤਾਂ ਸਾਰੇ ਉਸ ਦੀ ਭਾਲ ਕਰਨ ਲੱਗੇ। ਫਿਰ ਉਸ ਦੀ ਸਕੂਟਰੀ ਪਿੰਡ ਬਿਆਸ ਦਰਿਆ ਦੇ ਕੰਢੇ ਸੜਕ ਕਿਨਾਰੇ ਪਈ ਮਿਲੀ। ਇਸ ਤੋਂ ਬਾਅਦ ਬਿਆਸ ਦਰਿਆ ਦੇ ਕੰਢੇ ਜਾ ਕੇ ਉਸ ਨੂੰ ਦੋ ਬੱਚਿਆਂ ਦੇ ਕੱਪੜੇ, ਕੋਲਡ ਡਰਿੰਕ ਦੀ ਬੋਤਲ ਅਤੇ ਗਲਾਸ ਮਿਲਿਆ। ਜਿਸ ਤੋਂ ਬਾਅਦ ਇਸ ਦੀ ਸੂਚਨਾ ਡੇਹਰਾ ਪੁਲਿਸ ਨੂੰ ਦਿਤੀ ਗਈ।

drown

ਇੰਚਾਰਜ ਡੀਐਸਪੀ ਜਵਾਲਾਮੁਖੀ ਚੰਦਰਪਾਲ ਸਿੰਘ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਗਾਰਲੀ ਸਕੂਲ ਵਿਚ ਪੜ੍ਹਦੇ ਦੋ ਵਿਦਿਆਰਥੀ ਕੱਲ੍ਹ ਬਿਆਸ ਦਰਿਆ ਵਿਚ ਡੁੱਬ ਗਏ ਸਨ, ਜਿਨ੍ਹਾਂ ਦੀ ਐਨਡੀਆਰਐਫ ਦੀ ਟੀਮ ਅਤੇ ਗੋਤਾਖੋਰਾਂ ਵਲੋਂ ਭਾਲ ਕੀਤੀ ਜਾ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਪੁਲਿਸ ਹਰ ਪਹਿਲੂ ਦੀ ਜਾਂਚ ਕਰ ਰਹੀ ਹੈ। ਫਿਲਹਾਲ ਕਿਸੇ ਵੀ ਬੱਚੇ ਦੀ ਲਾਸ਼ ਨਹੀਂ ਮਿਲੀ ਹੈ। ਮੌਕੇ ਤੋਂ ਕੱਪੜੇ ਅਤੇ ਸਕੂਟੀ ਬਰਾਮਦ ਹੋਈ ਹੈ।