ਈ.ਡੀ. ਨੇ ਕੀਤੀ ਕੁਰਕੀ
ਨਵੀਂ ਦਿੱਲੀ - ਮਨੀ ਲਾਂਡਰਿੰਗ ਰੋਕੂ ਕਾਨੂੰਨ (ਪੀ.ਐਮ.ਐਲ.ਏ.) ਤਹਿਤ ਉੜੀਸਾ ਸਰਕਾਰ ਦੇ ਇੱਕ ਸਾਬਕਾ ਸਫ਼ਾਈ ਕਰਮਚਾਰੀ ਦੀ 1.88 ਕਰੋੜ ਰੁਪਏ ਦੀ ਜਾਇਦਾਦ ਕੁਰਕ ਕੀਤੀ ਗਈ ਹੈ। ਐਨਫ਼ੋਰਸਮੈਂਟ ਡਾਇਰੈਕਟੋਰੇਟ (ਈ.ਡੀ.) ਨੇ ਬੁੱਧਵਾਰ ਨੂੰ ਇਹ ਜਾਣਕਾਰੀ ਦਿੱਤੀ।
ਇਹ ਜਾਇਦਾਦ ਪੁਰੀ ਜ਼ਿਲ੍ਹੇ ਦੇ ਵਧੀਕ ਉਪ-ਮੰਡਲ ਅਧਿਕਾਰੀ (ਬੰਦੋਬਸਤ) ਦੇ ਦਫ਼ਤਰ ਵਿੱਚ ਤਾਇਨਾਤ ਸਾਬਕਾ 'ਸਫ਼ਾਈ ਮੋਹਰੀਰ' (ਸਫ਼ਾਈ ਸਹਾਇਕ) ਲਿੰਗਰਾਜ ਜੇਨਾ ਦੀ ਹੈ।
ਈ.ਡੀ. ਦਾ ਮਨੀ ਲਾਂਡਰਿੰਗ ਕੇਸ ਓਡੀਸ਼ਾ ਵਿਜੀਲੈਂਸ ਡਾਇਰੈਕਟੋਰੇਟ ਦੁਆਰਾ ਦਾਇਰ ਕੀਤੇ ਗਏ ਜੇਨਾ ਖ਼ਿਲਾਫ਼ ਕਥਿਤ ਤੌਰ 'ਤੇ ਆਮਦਨ ਤੋਂ ਵੱਧ ਜਾਇਦਾਦ ਦੇ ਮਾਮਲੇ ਤੋਂ ਉਪਜਿਆ ਹੈ।
ਵਿਜੀਲੈਂਸ ਡਾਇਰੈਕਟੋਰੇਟ ਦੁਆਰਾ ਦਾਇਰ ਚਾਰਜਸ਼ੀਟ ਵਿੱਚ ਕਿਹਾ ਗਿਆ ਹੈ ਕਿ ਜੇਨਾ ਨੇ ਆਪਣੀ ਆਮਦਨ ਦੇ ਦੱਸੇ ਸਰੋਤਾਂ ਤੋਂ 1.88 ਕਰੋੜ ਰੁਪਏ ਦੀ ਵੱਧ ਜਾਇਦਾਦ ਇਕੱਠੀ ਕਰਕੇ ਆਪਣੇ ਆਪ ਨੂੰ ਅਤੇ ਆਪਣੇ ਪਰਿਵਾਰਕ ਮੈਂਬਰਾਂ ਨੂੰ 'ਗ਼ੈਰ-ਕਨੂੰਨੀ ਤੌਰ 'ਤੇ ਅਮੀਰ' ਬਣਾਇਆ।
ਮਨੀ ਲਾਂਡਰਿੰਗ ਰੋਕੂ ਕਾਨੂੰਨ ਤਹਿਤ ਦਰਜ ਕੀਤੇ ਗਏ ਕੇਸ ਵਿੱਚ ਈ.ਡੀ. ਦੀ ਜਾਂਚ ਵਿੱਚ ਪਾਇਆ ਗਿਆ ਕਿ ਜੇਨਾ ਨੇ 'ਅਪਰਾਧਿਕ ਗਤੀਵਿਧੀਆਂ ਵਿੱਚ ਸ਼ਾਮਲ ਹੋ ਕੇ ਮਾਲੀ ਆਮਦਨ ਹਾਸਲ ਕੀਤੀ, ਇਸ ਨੂੰ ਲੁਕੋਇਆ, ਅਤੇ ਵੱਖ-ਵੱਖ ਸੰਪੱਤੀਆਂ ਦੀ ਪ੍ਰਾਪਤੀ ਵਿੱਚ ਇਸ ਦਾ ਨਿਵੇਸ਼ ਕੀਤਾ।'
