ਇਹ ਅਧਿਐਨ ‘ਪੀ.ਐਲ.ਓ.ਐਸ. ਵਨ’ ਰਸਾਲੇ ’ਚ ਪ੍ਰਕਾਸ਼ਤ ਹੋਇਆ ਸੀ।
Chimpanzees: ਨਵੀਂ ਦਿੱਲੀ: ਇਕ ਅਧਿਐਨ ’ਚ ਪਾਇਆ ਗਿਆ ਹੈ ਕਿ ਚਿੰਪਾਂਜ਼ੀ ਅਪਣੇ ਸਰੀਰ ’ਤੇ ਲੱਗੀ ਸੱਟ ਨੂੰ ਠੀਕ ਕਰਨ ਲਈ ਦਵਾਈਆਂ ਵਾਲੇ ਪੌਦੇ ਲੱਭਦੇ ਹਨ। ਇਕ ਅਧਿਐਨ ’ਚ ਇਹ ਦਾਅਵਾ ਕੀਤਾ ਗਿਆ ਹੈ।
ਚਿੰਪਾਂਜ਼ੀ ਕਈ ਤਰ੍ਹਾਂ ਦੇ ਪੌਦੇ ਖਾਣ ਲਈ ਜਾਣੇ ਜਾਂਦੇ ਹਨ, ਪਰ ਖੋਜਕਰਤਾਵਾਂ ਦਾ ਕਹਿਣਾ ਹੈ ਕਿ ਇਹ ਪਤਾ ਲਗਾਉਣਾ ਮੁਸ਼ਕਲ ਹੈ ਕਿ ਕੀ ਉਹ ਜਾਣਬੁਝ ਕੇ ਬਿਮਾਰੀਆਂ ਦੇ ਇਲਾਜ ਲਈ ਦਵਾਈਆਂ ਦੇ ਪੌਦੇ ਲੱਭਦੇ ਹਨ ਜਾਂ ਕੀ ਉਹ ਅਣਜਾਣੇ ’ਚ ਉਨ੍ਹਾਂ ਪੌਦਿਆਂ ਨੂੰ ਖਾਂਦੇ ਹਨ ਜੋ ਦਵਾਈਆਂ ਹਨ।
ਇਹ ਅਧਿਐਨ ‘ਪੀ.ਐਲ.ਓ.ਐਸ. ਵਨ’ ਰਸਾਲੇ ’ਚ ਪ੍ਰਕਾਸ਼ਤ ਹੋਇਆ ਸੀ। ਬਰਤਾਨੀਆਂ ਦੀ ਆਕਸਫੋਰਡ ਯੂਨੀਵਰਸਿਟੀ ਦੇ ਖੋਜਕਰਤਾਵਾਂ ਨੇ ਯੂਗਾਂਡਾ ਦੇ ਬੁਡੋਂਗੋ ਸੈਂਟਰਲ ਫਾਰੈਸਟ ਰਿਜ਼ਰਵ ’ਚ 51 ਜੰਗਲੀ ਚਿੰਪਾਜ਼ੀਆਂ ਦੇ ਵਿਵਹਾਰ ਅਤੇ ਸਿਹਤ ਦਾ ਅਧਿਐਨ ਕੀਤਾ।
ਖੋਜਕਰਤਾਵਾਂ ਨੇ ਪਾਇਆ ਕਿ ਇਕ ਨਰ ਚਿੰਪਾਜ਼ੀ ਦੇ ਹੱਥ ’ਤੇ ਸੱਟ ਲੱਗੀ ਸੀ ਅਤੇ ਉਹ ਫਰਨ ਦੇ ਪੱਤਿਆਂ ਦੀ ਭਾਲ ਕਰ ਰਿਹਾ ਸੀ ਜੋ ਦਰਦ ਅਤੇ ਸੋਜਸ਼ ਨੂੰ ਘਟਾਉਣ ’ਚ ਮਦਦ ਕਰ ਸਕਦੇ ਸਨ। ਇਸੇ ਤਰ੍ਹਾਂ ਇਕ ਹੋਰ ਚਿੰਪਾਜ਼ੀ ਪਰਜੀਵੀ ਇਨਫੈਕਸ਼ਨ ਤੋਂ ਪੀੜਤ ਸੀ ਅਤੇ ਇਸ ਨੂੰ ਠੀਕ ਕਰਨ ਲਈ ਸਕਾਊਟੀਆ ਮਿਰਟੀਨਾ ਦੀ ਛਿੱਲ ਖਾ ਰਿਹਾ ਸੀ।
ਟੀਮ ਨੇ ਜੰਗਲ ’ਚ ਰੁੱਖਾਂ ਅਤੇ ਜੜੀਆਂ-ਬੂਟੀਆਂ ਦੀਆਂ ਕਿਸਮਾਂ ਦੇ ਪੌਦਿਆਂ ਦੇ ਨਮੂਨਿਆਂ ਦਾ ਵੀ ਵਿਸ਼ਲੇਸ਼ਣ ਕੀਤਾ ਅਤੇ ਪਾਇਆ ਕਿ ਇਨ੍ਹਾਂ ਪੌਦਿਆਂ ’ਚ ਐਂਟੀਬਾਇਓਟਿਕ ਅਤੇ ਐਂਟੀਬਾਇਓਟਿਕ ਗੁਣ ਹੁੰਦੇ ਹਨ। ਚਿੰਪਾਂਜ਼ੀ ਖੁਦ ਉਨ੍ਹਾਂ ਨੂੰ ਦਵਾਈ ਵਜੋਂ ਖਾਂਦੇ ਸਨ। ਇਨ੍ਹਾਂ ਪ੍ਰਜਾਤੀਆਂ ’ਚ ਉਹ ਪੌਦੇ ਸ਼ਾਮਲ ਹਨ ਜੋ ਚਿੰਪਾਜ਼ੀ ਦੀ ਖੁਰਾਕ ਦਾ ਹਿੱਸਾ ਨਹੀਂ ਸਨ ਪਰ ਉਨ੍ਹਾਂ ਦੇ ਉਪਚਾਰਕ ਗੁਣਾਂ ਕਾਰਨ ਉਨ੍ਹਾਂ ਨੂੰ ਖਾਂਦੇ ਸਨ।
ਖੋਜਕਰਤਾਵਾਂ ਨੇ ਪਾਇਆ ਕਿ 88 ਫ਼ੀ ਸਦੀ ਪੌਦਿਆਂ ਦੇ ਅਰਕ ’ਚ ਐਂਟੀਬੈਕਟੀਰੀਅਲ ਗੁਣ ਹੁੰਦੇ ਹਨ ਜੋ ਬੈਕਟੀਰੀਆ ਨੂੰ ਫੈਲਣ ਤੋਂ ਰੋਕਦੇ ਹਨ, ਜਦਕਿ 33 ਫ਼ੀ ਸਦੀ ਪੌਦਿਆਂ ’ਚ ਸੋਜਸ਼ ਘਟਾਉਣ ਵਾਲੇ ਗੁਣ ਹੁੰਦੇ ਹਨ।
