ਯੂਐਸਏਆਈਡੀ ਵਲੋਂ ਅਗਲੇ ਹੁਕਮਾਂ ਤਕ ਭਾਰਤ ਵਿਚ ਕੰਮ ਮੁਅੱਤਲ ਕਰਨ ਦੇ ਨਿਰਦੇਸ਼
News Delhi: ਰਾਸ਼ਟਰਪਤੀ ਡੋਨਾਲਡ ਟਰੰਪ ਵਲੋਂ ਅਮਰੀਕੀ ਵਿਦੇਸ਼ੀ ਸਹਾਇਤਾ ਦੀ ਸਮੀਖਿਆ ਕਰਨ ਅਤੇ ਉਨ੍ਹਾਂ ਨੂੰ ਨਵੇਂ ਪ੍ਰਸ਼ਾਸਨ ਦੀਆਂ ਨੀਤੀਆਂ ਨਾਲ ਜੋੜਨ ਲਈ ਕਾਰਜਕਾਰੀ ਆਦੇਸ਼ ਜਾਰੀ ਕਰਨ ਤੋਂ ਬਾਅਦ, ਯੂਐਸ ਏਜੰਸੀ ਫਾਰ ਇੰਟਰਨੈਸ਼ਨਲ ਡਿਵੈਲਪਮੈਂਟ (ਯੂ.ਐਸ.ਏ.ਆਈ.ਡੀ.) ਨੇ ਇਕ ਨਿਰਦੇਸ਼ ਜਾਰੀ ਕੀਤਾ ਹੈ, ਜਿਸ ਵਿਚ ਭਾਰਤ ’ਚ ਇਸ ਦੇ ਸਮਰਥਨ ਨਾਲ ਪ੍ਰਾਜੈਕਟਾਂ ਨੂੰ ਲਾਗੂ ਕਰਨ ਵਾਲੇ ਸਾਰੇ ਸੰਗਠਨ ਨੂੰ ਅਗਲੇ ਨੋਟਿਸ ਤਕ ਕੰਮ ਨੂੰ ਮੁਅੱਤਲ ਕਰਨ ਲਈ ਕਿਹਾ ਗਿਆ ਹੈ। ਇਸ ਕਦਮ ਨੇ ਭਾਰਤ ਵਿਚ ਯੂਐਸਏਆਈਡੀ ਵਲੋਂ ਫ਼ੰਡ ਪ੍ਰਾਪਤ ਪ੍ਰਾਜੈਕਟਾਂ ਨਾਲ ਜੁੜੇ ਲੋਕਾਂ ਵਿਚ ਚਿੰਤਾ ਪੈਦਾ ਕਰ ਦਿਤੀ ਹੈ।
ਯੂਐਸਏਆਈਡੀ ਵਲੋਂ ਭਾਰਤ ਵਿਚ ਕੰਮ ਮੁਅੱਤਲ ਕਰਨ ਦਾ ਸਭ ਤੋਂ ਵੱਡਾ ਪ੍ਰਭਾਵ ਕੀ ਹੋਵੇਗਾ?
ਸਭ ਤੋਂ ਵੱਧ ਪ੍ਰਭਾਵ ਸਿਹਤ-ਸਬੰਧਤ ਪ੍ਰੋਗਰਾਮਾਂ ’ਤੇ ਪੈਣ ਦੀ ਉਮੀਦ ਹੈ, ਜਿੱਥੇ ਯੂਐਸਏਆਈਡੀ ਫ਼ੰਡਾਂ ਨੇ ਜ਼ਮੀਨੀ ਪੱਧਰ ਤਕ ਪਹੁੰਚ ਲਈ ਤਕਨੀਕੀ ਸਹਾਇਤਾ ਨੂੰ ਹੁਲਾਰਾ ਦਿਤਾ ਹੈ। ਹੋਰ ਖੇਤਰ ਜਿੱਥੇ ਅੱਗੇ ਜਾ ਕੇ ਪ੍ਰਭਾਵ ਮਹਿਸੂਸ ਕੀਤੇ ਜਾਣ ਦੀ ਸੰਭਾਵਨਾ ਹੈ, ਵਿਚ ਸਿਖਿਆ, ਲਿੰਗ ਅਤੇ ਜਲਵਾਯੂ ਤਬਦੀਲੀ ਸ਼ਾਮਲ ਹਨ। ਹਾਲਾਂਕਿ ਭਾਰਤ ਵਿਚ ਯੂਐਸਏਆਈਡੀ ਦੀ ਮੌਜੂਦਗੀ ਬਹੁਤ ਘੱਟ ਹੈ, ਪਰ ਇਸ ਦੇ ਹੋਰ ਘੱਟ ਹੋਣ ਦੀ ਸੰਭਾਵਨਾ ਅਜਿਹੇ ਸਮੇਂ ’ਚ ਹੈ ਜਦੋਂ ਵਿਸ਼ਵਵਿਆਪੀ ਸਹਾਇਤਾ ਵਿਚ ਕਾਫ਼ੀ ਕਮੀ ਆਈ ਹੈ ਅਤੇ ਇਸ ਦੇ ਵਿਕਾਸ ਵਿਚ ਲੱਗੇ ਗ਼ੈਰ ਸਰਕਾਰੀ ਸੰਗਠਨਾਂ ਦੀਆਂ ਵਿੱਤੀ ਮੁਸ਼ਕਲਾਂ ਨੂੰ ਹੋਰ ਵਧਾ ਸਕਦੀਆਂ ਹਨ।
ਸਵੈ-ਸੇਵੀ ਸੰਸਥਾਵਾਂ ਅਤੇ ਸਰਕਾਰਾਂ ਲਈ ਪ੍ਰਾਜੈਕਟਾਂ ਦਾ ਸੰਚਾਲਨ ਕਰਨ ਵਾਲੀਆਂ ਏਜੰਸੀਆਂ ਸਮੇਤ ਭਾਈਵਾਲਾਂ ਲਈ ਯੂਐਸਏਆਈਡੀ ਦੇ ਨਿਰਦੇਸ਼ ਵਿਚ ਇਹ ਸਪੱਸ਼ਟ ਕਿਹਾ ਗਿਆ ਹੈ ਕਿ ਉਨ੍ਹਾਂ ਨੂੰ ਮੁਅੱਤਲੀ ਦੌਰਾਨ ਸਹਿਯੋਗ ਖ਼ਰਚ ਨੂੰ ਘੱਟ ਤੋਂ ਘੱਟ ਕਰਨਾ ਚਾਹੀਦਾ ਹੈ। ਨਿਰਦੇਸ਼ ਵਿਚ ਕਿਹਾ ਗਿਆ ਹੈ, ‘‘ਪ੍ਰਾਪਤਕਰਤਾ ਇਸ ਸਮਝੌਤੇ ਤਹਿਤ ਉਦੋਂ ਤਕ ਕੰਮ ਮੁੜ ਸ਼ੁਰੂ ਨਹੀਂ ਕਰੇਗਾ ਜਦੋਂ ਤਕ ਸਮਝੌਤਾ ਅਧਿਕਾਰੀ (ਯੂਐਸਏਆਈਡੀ) ਤੋਂ ਲਿਖਤੀ ਰੂਪ ਵਿਚ ਨੋਟੀਫ਼ਿਕੇਸ਼ਨ ਪ੍ਰਾਪਤ ਕਰਦਾ ਕਿ ਇਹ ਮੁਅੱਤਲੀ ਰੱਦ ਕਰ ਦਿਤੀ ਗਈ ਹੈ।’’
