ਨਜ਼ਰਬੰਦੀ ਅਧੀਨ ਕੇਵਲ 17 ਆਗੂ ਹੀ ਬਚੇ
ਜੰਮੂ : ਜੰਮੂ-ਕਸ਼ਮੀਰ ਵਿਚ ਹਾਲਾਤ ਆਮ ਵਰਗੇ ਹੋਣ ਬਾਅਦ ਸਿਆਸੀ ਆਗੂਆਂ ਦੀ ਰਿਹਾਈ ਦਾ ਸਿਲਸਿਲਾ ਜਾਰੀ ਹੈ। ਇਸੇ ਦੌਰਾਨ ਚਾਰ ਹੋਰ ਪ੍ਰਮੁੱਖ ਸਿਆਸੀ ਆਗੂਆਂ ਨੂੰ ਸ੍ਰੀਨਗਰ ਦੇ ਵਿਧਾਇਕ ਹੋਸਟਲ ਵਿਚ ਨਜ਼ਰਬੰਦੀ ਤੋਂ ਰਿਹਾਅ ਕਰ ਦਿਤਾ ਗਿਆ ਹੈ। ਜਾਣਕਾਰੀ ਅਨੁਸਾਰ ਰਿਹਾਅ ਕੀਤੇ ਗਏ ਆਗੂ ਨੈਸ਼ਨਲ ਕਾਨਫ਼ਰੰਸ ਦੇ ਹਨ ਅਤੇ ਉਨ੍ਹਾਂ ਵਿਚ ਅਬਦੁੱਲ ਮਜੀਦ ਲਾਰਮੀ, ਗ਼ੁਲਾਮ ਨਬੀ ਭੱਟ, ਡਾ ਮੁਹੰਮਦ ਸ਼ਫੀ ਅਤੇ ਮੁਹੰਮਦ ਯੂਸਫ਼ ਭੱਟ ਸ਼ਾਮਲ ਹਨ।
Photo
ਚਾਰਾਂ ਆਗੂਆਂ ਦੀ ਰਿਹਾਈ ਦੇ ਨਾਲ ਹੀ ਵਾਦੀ ਵਿਚ ਨਜ਼ਰਬੰਦੀ ਅਧੀਨ ਆਗੂਆਂ ਦੀ ਗਿਣਤੀ 17 ਰਹਿ ਗਈ ਹੈ। ਇਨ੍ਹਾਂ ਵਿਚ ਫ਼ਾਰੂਕ ਅਬਦੁੱਲਾ, ਉਮਰ ਅਬਦੁੱਲਾ ਅਤੇ ਮਹਿਬੂਬਾ ਮੁਫਤੀ ਸ਼ਾਮਲ ਹਨ। ਇਹ ਤਿੰਨੋਂ ਰਿਆਸਤ ਦੇ ਮੁੱਖ ਮੰਤਰੀ ਰਹੇ ਹਨ।
Photo
ਫਾਰੂਕ ਅਬਦੁੱਲਾ ਨੂੰ ਸ੍ਰੀਨਗਰ ਦੇ ਗੁਪਕਾਰ ਰੋਡ ਉਸ ਦੇ ਘਰ ਵਿਚ ਨਜ਼ਰਬੰਦ ਕੀਤਾ ਗਿਆ ਹੈ ਜਿਸ ਨੂੰ ਸਬ-ਜੇਲ ਵਜੋਂ ਨਾਮਜ਼ਦ ਕੀਤਾ ਗਿਆ ਹੈ। ਉਮਰ ਅਬਦੁੱਲਾ ਨੂੰ ਹਰੀ ਨਿਵਾਸ 'ਤੇ ਨਜ਼ਰਬੰਦ ਕੀਤਾ ਗਿਆ ਹੈ ਜਦਕਿ ਮਹਿਬੂਬਾ ਮੁਫ਼ਤੀ ਨੂੰ ਮੌਲਾਨਾ ਆਜ਼ਾਦ ਰੈਜ਼ੀਡੈਂਸੀ ਰੋਡ 'ਤੇ ਪੈਂਦੀ ਸਰਕਾਰੀ ਇਮਾਰਤ ਵਿਚ ਰਖਿਆ ਗਿਆ ਹੈ।
Photo
16 ਜਨਵਰੀ ਨੂੰ ਵੀ ਵਿਧਾਇਕ ਹੋਸਟਲ ਵਿਚੋਂ ਵੀ ਪੰਜ ਮੁੱਖ ਧਾਰਾ ਦੇ ਰਾਜਨੇਤਾ ਨਜ਼ਰਬੰਦੀ ਤੋ ਰਿਹਾਅ ਕੀਤੇ ਗਏ ਸਨ। ਰਿਹਾਅ ਕੀਤੇ ਗਏ ਨੇਤਾ 5 ਅਗੱਸਤ ਤੋਂ ਨਜ਼ਰਬੰਦੀ ਵਿਚ ਸਨ ਜਦ ਕੇਂਦਰ ਨੇ ਧਾਰਾ 370 ਨੂੰ ਰੱਦ ਕਰ ਦਿਤਾ ਸੀ ਅਤੇ ਜੰਮੂ-ਕਸ਼ਮੀਰ ਨੂੰ ਦੋ ਕੇਂਦਰ ਸ਼ਾਸਤ ਪ੍ਰਦੇਸ਼ਾਂ ਵਿਚ ਵੰਡ ਦਿਤਾ ਸੀ।
