ਜਾਤੀ ਆਧਾਰਤ ਭੇਦਭਾਵ ਦੇ ਵਿਰੋਧ ਵਿੱਚ ਧਰਨਾ
ਚੰਡੀਗੜ੍ਹ: ਏਐਸਐਫ (ਅੰਬੇਡਕਰ ਸਟੂਡੈਂਟ ਫੋਰਮ) ਵੱਲੋਂ 16 ਫ਼ਰਵਰੀ 2026 ਨੂੰ ਪੰਜਾਬ ਯੂਨੀਵਰਸਿਟੀ ਦੇ ਵਾਈਸ-ਚਾਂਸਲਰ ਦਫ਼ਤਰ ਦੇ ਬਾਹਰ ਲੱਗੇ ਧਰਨੇ ਵਿੱਚ ਭਾਗ ਲਿਆ ਗਿਆ। ਇਹ ਧਰਨਾ ਅਰਥਸ਼ਾਸਤਰ ਵਿਭਾਗ ਦੇ ਡਾ. ਹਰਪ੍ਰੀਤ ਸਿੰਘ ਵੱਲੋਂ ਸ਼ੁਰੂ ਕੀਤਾ ਗਿਆ ਹੈ।
ਇਹ ਧਰਨਾ ਡਾ. ਹਰਪ੍ਰੀਤ ਸਿੰਘ ਨਾਲ ਪਿਛਲੇ ਤਿੰਨ ਸਾਲਾਂ ਤੋਂ ਚੱਲ ਰਹੀ ਜਾਤੀ ਆਧਾਰਿਤ ਭੇਦਭਾਵ ਦੇ ਵਿਰੋਧ ਵਿੱਚ ਸ਼ੁਰੂ ਕੀਤਾ ਗਿਆ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਇਸ ਭੇਦਭਾਵ ਦੇ ਕਾਰਨ ਉਨ੍ਹਾਂ ਦੀ ਤਰੱਕੀ (ਪ੍ਰਮੋਸ਼ਨ) ਨੂੰ ਜਾਣਬੁੱਝ ਕੇ ਰੋਕਿਆ ਗਿਆ ਹੈ। ਵਿਭਾਗ ਦੀ ਚੇਅਰਪਰਸਨ ਵੱਲੋਂ ਨਾ ਸਿਰਫ਼ ਡਾ. ਹਰਪ੍ਰੀਤ ਸਿੰਘ ਨਾਲ, ਸਗੋਂ ਅਨੁਸੂਚਿਤ ਜਾਤੀ (ਐਸ.ਸੀ.) ਨਾਲ ਸਬੰਧਤ ਹੋਰ ਸਹਿਕਰਮੀਆਂ ਨਾਲ ਵੀ ਮੀਟਿੰਗਾਂ ਵਿੱਚ ਭੇਦਭਾਵਪੂਰਨ ਵਤੀਰਾ ਕੀਤਾ ਗਿਆ ਹੈ।
ਜਾਤੀ ਆਧਾਰਿਤ ਭੇਦਭਾਵ ਸਾਡੇ ਸਮਾਜ ‘ਤੇ ਇੱਕ ਵੱਡਾ ਦਾਗ ਹੈ। ਇਹ ਬਹੁਤ ਚਿੰਤਾਜਨਕ ਗੱਲ ਹੈ ਕਿ ਆਧੁਨਿਕ ਸਮੇਂ ਵਿੱਚ ਵੀ ਇਹ ਭੇਦਭਾਵ ਜਾਰੀ ਹੈ ਅਤੇ ਉੱਚ ਸਿੱਖਿਆ ਸੰਸਥਾਵਾਂ ਵਿੱਚ ਵੀ ਆਪਣੀ ਜਗ੍ਹਾ ਬਣਾ ਚੁੱਕਿਆ ਹੈ। ਇਸ ਤਰ੍ਹਾਂ ਦੀ ਅਨਿਆਇਕ ਪ੍ਰਥਾ ਕਾਬਲ ਵਿਅਕਤੀਆਂ ਨੂੰ ਪਿੱਛੇ ਧੱਕਦੀ ਹੈ ਅਤੇ ਉਨ੍ਹਾਂ ਵਿੱਚ ਹੀਨਭਾਵਨਾ ਪੈਦਾ ਕਰਦੀ ਹੈ। ਏਐਸਐਫ ਸਭ ਪ੍ਰਕਾਰ ਦੇ ਜਾਤੀ ਆਧਾਰਿਤ ਭੇਦਭਾਵ ਦੀ ਕੜੀ ਨਿੰਦਾ ਕਰਦਾ ਹੈ ਅਤੇ ਯੂਨੀਵਰਸਿਟੀ ਪ੍ਰਸ਼ਾਸਨ ਤੋਂ ਤੁਰੰਤ ਅਤੇ ਨਿਰਪੱਖ ਕਾਰਵਾਈ ਦੀ ਮੰਗ ਕਰਦਾ ਹੈ।
