S.Joginder Singh Ji: ਬੀਤੇ ਸੋਮਵਾਰ ਦੇ ਦਿਨ ਸਿੱਖੀ ਸੋਚ ਮੁਤਾਬਕ ਸਾਦਗੀ ਨਾਲ ਸਸਕਾਰ ਤੇ ਅੰਤਮ ਅਰਦਾਸ ਕੀਤੀ ਗਈ ਸੀ
S. Joginder Singh Ji: ‘‘ਉੱਚਾ ਦਰ ਬਾਬੇ ਨਾਨਕ ਦਾ’ ਸਵਰਗੀ ਸਰਦਾਰ ਜੋਗਿੰਦਰ ਸਿੰਘ ਜੀ ਦੀ ਰਗ-ਰਗ ਅਤੇ ਕਣ-ਕਣ ਵਿਚ ਵਸਿਆ ਹੋਇਆ ਸੀ ਅਤੇ ਹੁਣ ਉਹ ਬਰੋਟੇ ਵਿਚ ਰਹਿ ਕੇ ਅਪਣੇ ਚਾਹਵਾਨਾਂ ਨੂੰ ਛਾਂ ਵੀ ਦੇਣਗੇ।’’ ਇਹ ਪ੍ਰਗਟਾਵਾ ਅੱਜ ਇਥੇ ‘ਉੱਚਾ ਦਰ ਬਾਬੇ ਨਾਨਕ ਦਾ’ ’ਚ ‘ਰੋਜ਼ਾਨਾ ਸਪੋਕਸਮੈਨ’ ਦੇ ਐਮਡੀ ਸਰਦਾਰਨੀ ਜਗਜੀਤ ਕੌਰ, ਵੱਡੀ ਬੇਟੀ ਸਿਮਰਨ ਸਿੰਘ ਅਤੇ ਐਸੋਸੀਏਟ ਐਡੀਟਰ ਬੀਬਾ ਨਿਮਰਤ ਕੌਰ ਨੇ ਇਥੇ ਪੁੱਜੇ ਸ਼ਰਧਾਲੂਆਂ ਦੇ ਇਕੱਠ ਨੂੰ ਸੰਬੋਧਨ ਕਰਦਿਆਂ ਕੀਤਾ।
ਇਸ ਤੋਂ ਪਹਿਲਾਂ ਉਨ੍ਹਾਂ ਇਥੇ ਸ. ਜੋਗਿੰਦਰ ਸਿੰਘ ਦੀਆਂ ਅਸਥੀਆਂ ਨੂੰ ਉਨ੍ਹਾਂ ਦੀ ਹੀ ਇੱਛਾ ਅਨੁਸਾਰ ‘ਉੱਚਾ ਦਰ ਬਾਬੇ ਨਾਨਕ ਦਾ’ ਵਿਚ ਲਿਜਾ ਕੇ ਉਨ੍ਹਾਂ ਦੇ ਨਾਂ ’ਤੇ ਬਰੋਟੇ ਦਾ ਬੂਟਾ ਲਾਇਆ ਗਿਆ। ਇਸ ਮੌਕੇ ਹਰ ਅੱਖ ਨਮ ਸੀ। ਕੈਂਪਸ ’ਚ ਕੰਮ ਕਰਦੇ ਸਮੂਹ ਅਧਿਕਾਰੀ ਤੇ ਹੋਰ ਸੇਵਾਦਾਰ ਸ. ਜੋਗਿੰਦਰ ਸਿੰਘ ਹੁਰਾਂ ਨਾਲ ਜੁੜੀਆਂ ਆਪੋ-ਅਪਣੀਆਂ ਯਾਦਾਂ ਸਾਂਝੀਆਂ ਕਰ ਰਹੇ ਸਨ।
ਬੀਬਾ ਨਿਮਰਤ ਕੌਰ ਨੇ ਦਸਿਆ ਕਿ ਸਰਦਾਰ ਜੋਗਿੰਦਰ ਸਿੰਘ ਦਾ ਜੀਵਨ ਬਾਬੇ ਨਾਨਕ ਦੀ ਸਿੱਖੀ ਦੇ ਅਸੂਲਾਂ ਮੁਤਾਬਕ ਬਹੁਤ ਸਾਦਗੀ ਵਾਲਾ ਜੀਵਨ ਸੀ ਤੇ ਉਨ੍ਹਾਂ ਦੀ ਇੱਛਾ ਸੀ ਕਿ ਉਨ੍ਹਾਂ ਦੀ ਵਿਦਾਇਗੀ ਵੀ ਉਸੇ ਸਾਦਗੀ ਨਾਲ ਹੋਵੇ। ਉਨ੍ਹਾਂ ਦਾ ਮੰਨਣਾ ਸੀ ਕਿ ਸਰੀਰ ਦੀ ਵਿਦਾਇਗੀ ਦੇ ਨਾਲ, ਅਰਦਾਸ ਇਕ ਵਾਰ ਹੀ ਹੁੰਦੀ ਹੈ ਅਤੇ ਉਨ੍ਹਾਂ ਨੇ ਭੋਗ ਪਾਉਣ ਦੀ ਸਖ਼ਤ ਮਨਾਹੀ ਦੀ ਹਦਾਇਤ ਕੀਤੀ ਸੀ।
ਉਨ੍ਹਾਂ ਦੀਆਂ ਇੱਛਾਵਾਂ ਪ੍ਰਵਾਰ ਵਲੋਂ ਪ੍ਰਵਾਨ ਕੀਤੀਆਂ ਗਈਆਂ ਹਨ। ਉਨ੍ਹਾਂ ਅੱਗੇ ਕਿਹਾ ਕਿ ਉਨ੍ਹਾਂ ਦੇ ਪਿਤਾ ਦੀ ਹਰ ਇੱਛਾ ਨੂੰ ਉਨ੍ਹਾਂ ਦੀ ਮਰਜ਼ੀ ਮੁਤਾਬਕ ਹੀ
ਇੰਨ-ਬਿੰਨ ਪੂਰਾ ਕੀਤਾ ਜਾ ਰਿਹਾ ਹੈ। ਬੀਤੇ ਸੋਮਵਾਰ ਦੇ ਦਿਨ ਸਿੱਖੀ ਸੋਚ ਮੁਤਾਬਕ ਸਾਦਗੀ ਨਾਲ ਸਸਕਾਰ ਤੇ ਅੰਤਮ ਅਰਦਾਸ ਕੀਤੀ ਗਈ ਸੀ। ਉਹ ਅਕਸਰ ਆਖਿਆ ਕਰਦੇ ਸਨ ਕਿ ਜਦ ਮੇਰਾ ਸਰੀਰ ਅਕਾਲ ਪੁਰਖ ਦੇ ਘਰ ਚਲਾ ਜਾਵੇ ਤੇ ਫਿਰ ਇਸ ਦੁਨੀਆਂ ਵਿਚ ਉਨ੍ਹਾਂ ਦੇ ਸਫ਼ਰ ਦਾ ਅੰਤ ਹੋ ਜਾਵੇਗਾ।
ਇਥੇ ਵਰਨਣਯੋਗ ਹੈ ਕਿ ‘ਉਚਾ ਦਰ ਬਾਬੇ ਨਾਨਕ’ ਦਾ ’ਚ ਹੁਣ ਸੰਗਤ ਦੀ ਆਮਦ ਨਿਤ ਵਧਦੀ ਜਾ ਰਹੀ ਹੈ। ਸਿੱਖ ਬੱਚਿਆਂ, ਔਰਤਾਂ ਤੇ ਬਜ਼ੁਰਗਾਂ ਸਮੇਤ ਆਮ ਲੋਕ ਕੈਂਪਸ ’ਚ ਆ ਕੇ ਅਨੁਭਵ ਸਾਂਝੇ ਕਰਦੇ ਹਨ। ਉਨ੍ਹਾਂ ’ਚੋਂ ਬਹੁਤਿਆਂ ਨੂੰ ਜਾਪਦਾ ਹੈ ਕਿ ਉਨ੍ਹਾਂ ਨੂੰ ਇਥੇ ਪੁਜ ਕੇ ਮਾਨਸਿਕ ਸ਼ਾਂਤੀ ਤੇ ਤਸੱਲੀ ਮਿਲੀ ਹੈ। ਨਵੀਂ ਪੀੜ੍ਹੀ ਨੂੰ ਇਥੇ ਖ਼ਾਸ ਤੌਰ ’ਤੇ ਸਿੱਖ ਪੰਥ ਦੇ ਬਾਨੀ ਸ੍ਰੀ ਗੁਰੂ ਨਾਨਕ ਦੇਵ ਜੀ ਬਾਰੇ ਬਹੁਤ ਸਾਰੀਆਂ ਨਵੀਂਆਂ ਗੱਲਾਂ ਸਿੱਖਣ ਤੇ ਸਮਝਣ ਨੂੰ ਮਿਲਦੀਆਂ ਹਨ। ਬੱਚਿਆਂ ਦੀ ਦਿਲਚਸਪੀ ਖ਼ਾਸ ਤੌਰ ’ਤੇ ਗੁਰੂ ਸਾਹਿਬ ਬਾਰੇ ਨਿਵੇਕਲੀ ਜਾਣਕਾਰੀ ਨਾਲ ਭਰਪੂਰ ਸਿੱਖ ਇਤਿਹਾਸ ਬਾਰੇ ਦਸਤਾਵੇਜ਼ੀ ਫ਼ਿਲਮਾਂ ਵੇਖਣ ’ਚ ਵਿਖਾਈ ਦਿੰਦੀ ਹੈ।
ਇਸ ਦਾ ਅਜਾਇਬਘਰ ਅਨਮੋਲ ਹੈ। ਇਥੋਂ ਦੇ ਬਾਗ਼-ਬਗ਼ੀਚੇ ਅੱਖਾਂ ਨੂੰ ਮੋਹੰਦੇ ਹਨ। ਅੱਜ ਇਥੇ ਇਕ ਹੋਰ ਯਾਦਗਾਰੀ ਬੂਟੇ ਦਾ ਵਾਧਾ ਹੋ ਗਿਆ ਹੈ, ਜੋ ਪ੍ਰਫ਼ੁਲਤ ਹੋ ਕੇ ਵਿਸ਼ਾਲ ਬੋਹੜ ਦਾ ਰੂਪ ਅਖ਼ਤਿਆਰ ਕਰੇਗਾ ਅਤੇ ਹਮੇਸ਼ਾ ‘ਉਚਾ ਦਰ ਬਾਬੇ ਨਾਨਕ ਦਾ’ ਦੇ ਬਾਨੀ ਤੇ ਬਾਬਾ ਬੋਹੜ ਸਰਦਾਰ ਜੋਗਿੰਦਰ ਸਿੰਘ ਦੀ ਯਾਦ ਦਿਵਾਉਂਦਾ ਰਹੇਗਾ।
