ਇਨਾਮ ਨਾ-ਟ੍ਰਾਂਸਫਰ ਯੋਗ ਹੋਵੇਗਾ ਅਤੇ ਨਕਦ ਵਿਚ ਦਾਅਵਾ ਨਹੀਂ ਕੀਤਾ ਜਾ ਸਕਦਾ
ਨਵੀਂ ਦਿੱਲੀ : ਸਰਕਾਰੀ ਮਲਕੀਅਤ ਵਾਲੀ NHAI ਨੇ ਇਕ ਵਿਸ਼ੇਸ਼ ਮੁਹਿੰਮ ਸ਼ੁਰੂ ਕੀਤੀ ਹੈ ਜੋ 31 ਅਕਤੂਬਰ, 2025 ਤਕ ਹਾਈਵੇਅ ਉਪਭੋਗਤਾਵਾਂ ਨੂੰ ਟੋਲ ਪਲਾਜ਼ਿਆਂ ਉਤੇ ਗੰਦੇ ਪਖਾਨਿਆਂ ਦੀ ਰੀਪੋਰਟ ਕਰਨ ਅਤੇ ਇਨਾਮ ਵਜੋਂ ਉਨ੍ਹਾਂ ਦੇ ਫਾਸਟੈਗ ਖਾਤੇ ਵਿਚ 1,000 ਰੁਪਏ ਪ੍ਰਾਪਤ ਕਰਨ ਲਈ ਉਤਸ਼ਾਹਤ ਕਰਦੀ ਹੈ।
ਹਾਈਵੇਅ ਉਪਭੋਗਤਾ ‘ਰਾਜਮਾਰਗਯਾਤਰਾ’ ਐਪ ਦੇ ਨਵੀਨਤਮ ਸੰਸਕਰਣ ਰਾਹੀਂ ਜੀਓ-ਟੈਗ ਕੀਤੀਆਂ ਤਸਵੀਰਾਂ ਅਪਲੋਡ ਕਰ ਸਕਦੇ ਹਨ ਅਤੇ ਉਪਭੋਗਤਾ ਦਾ ਨਾਮ, ਸਥਾਨ, ਵਾਹਨ ਰਜਿਸਟ੍ਰੇਸ਼ਨ ਨੰਬਰ ਅਤੇ ਮੋਬਾਈਲ ਨੰਬਰ ਵਰਗੇ ਵੇਰਵੇ ਪ੍ਰਦਾਨ ਕਰ ਸਕਦੇ ਹਨ। ਅਜਿਹੀਆਂ ਘਟਨਾਵਾਂ ਦੀ ਰੀਪੋਰਟ ਕਰਨ ਵਾਲੇ ਹਰ ਵਾਹਨ ਰਜਿਸਟ੍ਰੇਸ਼ਨ ਨੰਬਰ (ਵੀ.ਆਰ.ਐਨ.) ਨੂੰ ਫਾਸਟੈਗ ਰੀਚਾਰਜ ਦੇ ਰੂਪ ਵਿਚ 1,000 ਰੁਪਏ ਦੇ ਇਨਾਮ ਲਈ ਯੋਗ ਹੋਵੇਗਾ, ਜੋ ਉਪਭੋਗਤਾ ਵਲੋਂ ਪ੍ਰਦਾਨ ਕੀਤੇ ਗਏ ਲਿੰਕਡ ਵੀ.ਆਰ.ਐਨ. ਵਿਚ ਜਮ੍ਹਾ ਕੀਤਾ ਜਾਵੇਗਾ।
ਇਨਾਮ ਨਾ-ਟ੍ਰਾਂਸਫਰ ਯੋਗ ਹੋਵੇਗਾ ਅਤੇ ਨਕਦ ਵਿਚ ਦਾਅਵਾ ਨਹੀਂ ਕੀਤਾ ਜਾ ਸਕਦਾ। ਇਹ ਪਹਿਲ ਦੇਸ਼ ਭਰ ਦੇ ਸਾਰੇ ਕੌਮੀ ਰਾਜਮਾਰਗਾਂ ਉਤੇ 31 ਅਕਤੂਬਰ, 2025 ਤਕ ਜਾਰੀ ਰਹੇਗੀ।
ਬਿਆਨ ਅਨੁਸਾਰ, ਇਹ ਮੁਹਿੰਮ ਸਿਰਫ NHAI ਦੇ ਅਧਿਕਾਰ ਖੇਤਰ ਵਿਚ ਨਿਰਮਿਤ, ਸੰਚਾਲਿਤ ਜਾਂ ਰੱਖ-ਰਖਾਅ ਵਾਲੇ ਪਖਾਨਿਆਂ ਉਤੇ ਲਾਗੂ ਹੋਵੇਗੀ। ਪ੍ਰਚੂਨ ਫਿਊਲ ਸਟੇਸ਼ਨਾਂ, ਢਾਬਿਆਂ ਜਾਂ ਹੋਰ ਜਨਤਕ ਸਹੂਲਤਾਂ ਉਤੇ ਸਥਿਤ ਹੋਰ ਪਖਾਨੇ ਜੋ NHAI ਦੇ ਕੰਟਰੋਲ ਅਧੀਨ ਨਹੀਂ ਹਨ, ਨੂੰ ਬਾਹਰ ਰੱਖਿਆ ਗਿਆ ਹੈ।
ਇਸ ਵਿਚ ਕਿਹਾ ਗਿਆ ਹੈ ਕਿ ਹਰ ਵੀ.ਆਰ.ਐਨ. ਪੂਰੀ ਯੋਜਨਾ ਦੀ ਮਿਆਦ ਦੇ ਦੌਰਾਨ ਸਿਰਫ ਇਕ ਇਨਾਮ ਲਈ ਯੋਗ ਹੋਵੇਗਾ। ਨਾਲ ਹੀ, ਹਰ ਐੱਨ.ਐੱਚ. ਪਖਾਨਾ ਸਹੂਲਤ ਪ੍ਰਤੀ ਦਿਨ ਸਿਰਫ ਇਕ ਵਾਰ ਇਨਾਮ ਉਤੇ ਵਿਚਾਰ ਕਰਨ ਦੇ ਯੋਗ ਹੋਵੇਗੀ, ਚਾਹੇ ਉਸ ਸਥਾਨ ਲਈ ਪ੍ਰਾਪਤ ਰੀਪੋਰਟਾਂ ਦੀ ਗਿਣਤੀ ਕਿੰਨੀ ਵੀ ਹੋਵੇ।
ਜੇਕਰ ਇਕੋ ਦਿਨ ਇਕੋ ਪਖਾਨੇ ਲਈ ਕਈ ਰੀਪੋਰਟਾਂ ਪ੍ਰਾਪਤ ਹੁੰਦੀਆਂ ਹਨ, ਤਾਂ ਰਾਜਮਾਰਗਯਾਤਰਾ ਐਪ ਰਾਹੀਂ ਰੀਪੋਰਟ ਕੀਤੀ ਗਈ ਪਹਿਲੀ ਜਾਇਜ਼ ਤਸਵੀਰ ਨੂੰ ਹੀ ਪੁਰਸਕਾਰ ਲਈ ਯੋਗ ਮੰਨਿਆ ਜਾਵੇਗਾ।
ਬਿਆਨ ’ਚ ਕਿਹਾ ਗਿਆ ਹੈ ਕਿ ਐਪ ਰਾਹੀਂ ਖਿੱਚੀਆਂ ਗਈਆਂ ਸਪੱਸ਼ਟ, ਜੀਓ-ਟੈਗ ਅਤੇ ਟਾਈਮ-ਸਟੈਂਪਡ ਤਸਵੀਰਾਂ ਉਤੇ ਹੀ ਵਿਚਾਰ ਕੀਤਾ ਜਾਵੇਗਾ। ਕਿਸੇ ਵੀ ਹੇਰਾਫੇਰੀ, ਡੁਪਲੀਕੇਟ, ਜਾਂ ਪਹਿਲਾਂ ਰੀਪੋਰਟ ਕੀਤੇ ਚਿੱਤਰਾਂ ਨੂੰ ਅਮਨਜ਼ੂਰ ਕਰ ਦਿਤਾ ਜਾਵੇਗਾ। ਜਿੱਥੇ ਵੀ ਜ਼ਰੂਰੀ ਹੋਵੇ, ਐਂਟਰੀਆਂ ਦੀ ਤਸਦੀਕ ਅਲ-ਅਸਿਸਟਿਡ ਸਕ੍ਰੀਨਿੰਗ ਅਤੇ ਮੈਨੂਅਲ ਵੈਲੀਡੇਸ਼ਨ ਵਲੋਂ ਕੀਤੀ ਜਾਵੇਗੀ।
