ਭਾਰਤ ਅਤੇ ਯੂਰਪ ਵਿਚਕਾਰ ਵਪਾਰ ਨੂੰ 40 ਫ਼ੀ ਸਦੀ ਤੇਜ਼ ਹੋਵੇਗਾ
ਨਵੀਂ ਦਿੱਲੀ: ਭਾਰਤ-ਮਿਡਲ ਈਸਟ-ਯੂਰਪ ਆਰਥਕ ਗਲਿਆਰਾ ਛੇਤੀ ਹੀ ਸ਼ੁਰੂ ਕੀਤਾ ਜਾਵੇਗਾ ਜਿਸ ’ਚ ਜਹਾਜ਼ਰਾਨੀ ਅਤੇ ਰੇਲਵੇ ਲਿੰਕ ਸ਼ਾਮਲ ਹੋਣਗੇ। ਅਪਣੀ ਕਿਸਮ ਦਾ ਪਹਿਲਾ ਆਰਥਕ ਗਲਿਆਰਾ ਭਾਰਤ, ਯੂ.ਏ.ਈ., ਸਾਊਦੀ ਅਰਬ, ਈ.ਯੂ., ਫਰਾਂਸ, ਇਟਲੀ, ਜਰਮਨੀ ਅਤੇ ਅਮਰੀਕਾ ਨੂੰ ਸ਼ਾਮਲ ਕਰਨ ਵਾਲੇ ਸਹਿਯੋਗ, ਸੰਪਰਕ ਅਤੇ ਬੁਨਿਆਦੀ ਢਾਂਚੇ ’ਤੇ ਇਕ ਇਤਿਹਾਸਕ ਪਹਿਲਕਦਮੀ ਹੋਵੇਗੀ।
ਅਮਰੀਕੀ ਰਾਸ਼ਟਰਪਤੀ ਜੋ ਬਾਈਡਨ, ਭਾਰਤ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਯੂਰਪੀਅਨ ਕਮਿਸ਼ਨ ਦੇ ਪ੍ਰਧਾਨ ਉਰਸੁਲਾ ਵਾਨ ਡੇਰ ਲੇਅਨ ਨੇ ਵਿਸ਼ਵ ਦੀਆਂ ਚੋਟੀ ਦੀਆਂ ਅਰਥਵਿਵਸਥਾਵਾਂ ਦੇ ਜੀ20 ਸਾਲਾਨਾ ਸਮੂਹ ਦੇ ਦੌਰਾਨ ਇਸ ਪ੍ਰਾਜੈਕਟ ਦਾ ਐਲਾਨ ਕੀਤਾ।
ਮੋਦੀ ਨੇ ‘ਐਕਸ’ ’ਤੇ ਲਿਖਿਆ, ‘‘ਸਾਂਝੀਆਂ ਉਮੀਦਾਂ ਅਤੇ ਸੁਪਨਿਆਂ ਦੀ ਯਾਤਰਾ ਨੂੰ ਸੰਜੋਂਦਿਆਂ, ਭਾਰਤ-ਮੱਧ ਪੂਰਬ-ਯੂਰਪ ਆਰਥਕ ਗਲਿਆਰਾ ਸਹਿਯੋਗ, ਨਵੀਨਤਾ ਅਤੇ ਸਾਂਝੀ ਪ੍ਰਗਤੀ ਦੀ ਇਕ ਜੋਤ ਬਣਨ ਦਾ ਵਾਅਦਾ ਕਰਦਾ ਹੈ। ਜਿਵੇਂ ਕਿ ਇਤਿਹਾਸ ਸਾਹਮਣੇ ਆ ਰਿਹਾ ਹੈ, ਇਹ ਗਲਿਆਰਾ ਮਹਾਂਦੀਪਾਂ ’ਚ ਮਨੁੱਖੀ ਯਤਨਾਂ ਅਤੇ ਏਕਤਾ ਦਾ ਸਬੂਤ ਬਣ ਸਕਦਾ ਹੈ।’’
ਇਹ ਪ੍ਰਾਜੈਕਟ ਆਲਮੀ ਬੁਨਿਆਦੀ ਢਾਂਚਾ ਨਿਵੇਸ਼ ਲਈ ਭਾਈਵਾਲੀ ਨਾਮਕ ਪਹਿਲਕਦਮੀ ਦਾ ਹਿੱਸਾ ਹੈ।
ਭਾਰਤ ਮੰਡਪਮ ਵਿਖੇ ਗਲੋਬਲ ਬੁਨਿਆਦੀ ਢਾਂਚਾ ਨਿਵੇਸ਼ ਅਤੇ ਭਾਰਤ-ਮੱਧ ਪੂਰਬ-ਯੂਰਪ ਆਰਥਿਕ ਗਲਿਆਰਾ ਪ੍ਰੋਗਰਾਮ (PGII) ਲਈ ਸਾਂਝੇਦਾਰੀ ’ਤੇ ਉਰਸੁਲਾ ਵਾਨ ਡੇਰ ਲੇਅਨ ਨੇ ਕਿਹਾ, ‘‘ਜਦੋਂ ਤੋਂ ਅਸੀਂ PGII ਦੀ ਸ਼ੁਰੂਆਤ ਕੀਤੀ ਹੈ, ਵਿਸ਼ਵ ਦੇ ਨੇਤਾਵਾਂ, ਪ੍ਰਮੁੱਖ ਅਰਥਚਾਰਿਆਂ ਵਲੋਂ ਨਿਵੇਸ਼ ਕਰਨ ਲਈ ਇਕ ਸੰਯੁਕਤ ਦ੍ਰਿਸ਼ਟੀਕੋਣ ਹੈ। ਬੁਨਿਆਦੀ ਢਾਂਚਾ ਜਿਸ ਦੀ ਘੱਟ ਅਤੇ ਮੱਧ ਆਮਦਨ ਵਾਲੇ ਦੇਸ਼ਾਂ ਨੂੰ ਲੋੜ ਹੈ। ਅਤੇ ਦੋ ਸਾਲਾਂ ਵਿਚ ਹੋਰ ਵੱਡੇ ਪੈਮਾਨੇ ਦੇ ਪ੍ਰਾਜੈਕਟ ਰੋਸ਼ਨੀ ਵੇਖ ਰਹੇ ਹਨ. ਅਤੇ ਅੱਜ ਅਸੀਂ ਉਨ੍ਹਾਂ ’ਚੋਂ ਦੋ ਪੇਸ਼ ਕਰ ਰਹੇ ਹਾਂ।
‘‘ਪਹਿਲਾਂ, ਭਾਰਤ-ਮਿਡਲ ਈਸਟ-ਯੂਰਪ ਆਰਥਕ ਗਲਿਆਰਾ। ਇਹ ਇਤਿਹਾਸਕ ਹੈ। ਇਹ ਭਾਰਤ, ਅਰਬ ਦੀ ਖਾੜੀ ਅਤੇ ਯੂਰਪ ਵਿਚਕਾਰ ਰੇਲ ਲਿੰਕ ਦੇ ਨਾਲ ਹੁਣ ਤਕ ਦਾ ਸਭ ਤੋਂ ਵੱਧ ਸਿੱਧਾ ਸੰਪਰਕ ਹੋਵੇਗਾ ਜੋ ਭਾਰਤ ਅਤੇ ਯੂਰਪ ਵਿਚਕਾਰ ਵਪਾਰ ਨੂੰ 40 ਫ਼ੀ ਸਦੀ ਤੇਜ਼ ਕਰੇਗਾ।
ਉਨ੍ਹਾਂ ਇਹ ਵੀ ਕਿਹਾ ਕਿ ਏਸ਼ੀਆ, ਮਿਡਲ ਈਸਟ ਅਤੇ ਯੂਰਪ ਵਿਚਕਾਰ ਸਵੱਛ ਊਰਜਾ ਵਪਾਰ ਨੂੰ ਉਤਸ਼ਾਹਿਤ ਕਰਨ ਲਈ ਬਿਜਲੀ ਦੀ ਕੇਬਲ ਅਤੇ ਸਾਫ਼ ਹਾਈਡ੍ਰੋਜਨ ਪਾਈਪਲਾਈਨ ਵਿਛਾਉਣ ਬਾਰੇ ਵੀ ਦਸਿਆ।
ਇਸ ਦੌਰਾਨ, ਬਾਈਡਨ ਨੇ ਕਿਹਾ, ‘‘ਇਹ ਅਸਲ ’ਚ ਵੱਡੀ ਗੱਲ ਹੈ। ਮੈਂ ਪ੍ਰਧਾਨ ਮੰਤਰੀ ਦਾ ਧੰਨਵਾਦ ਕਰਨਾ ਚਾਹੁੰਦਾ ਹਾਂ। ਇਕ ਧਰਤੀ, ਇਕ ਪਰਿਵਾਰ, ਇਕ ਭਵਿੱਖ ਜੋ ਇਸ ਜੀ20 ਸਿਖਰ ਸੰਮੇਲਨ ਦਾ ਫੋਕਸ ਹੈ। ਅਤੇ ਕਈ ਤਰੀਕਿਆਂ ਨਾਲ, ਇਹ ਇਸ ਸਾਂਝੇਦਾਰੀ ਦਾ ਕੇਂਦਰ ਵੀ ਹੈ ਜਿਸ ਬਾਰੇ ਅਸੀਂ ਅੱਜ ਗੱਲ ਕਰ ਰਹੇ ਹਾਂ।’’
ਇਟਲੀ ਦੇ ਪ੍ਰਧਾਨ ਮੰਤਰੀ ਜੌਰਜੀਆ ਮੇਲੋਨੀ ਨੇ ਕਿਹਾ, ‘‘ਅਸੀਂ ਘੱਟ ਅਤੇ ਮੱਧ-ਆਮਦਨੀ ਵਾਲੇ ਦੇਸ਼ਾਂ ’ਚ ਬਿਹਤਰ ਭਵਿੱਖ ਲਈ ਬਿਹਤਰ ਬੁਨਿਆਦੀ ਢਾਂਚਾ ਬਣਾਉਣ ਲਈ ਵਚਨਬੱਧ ਹਾਂ।’’ ਉਨ੍ਹਾਂ ਕਿਹਾ ਕਿ ਅਸੀਂ ਨਵੇਂ ਮੌਕੇ ਅਤੇ ਖੁਸ਼ਹਾਲੀ ਪੈਦਾ ਕਰਨ ਲਈ ਇਨ੍ਹਾਂ ਦੇਸ਼ਾਂ ਨਾਲ ਬਰਾਬਰੀ ਨਾਲ ਸਹਿਯੋਗ ਕਰਨ ਲਈ ਵਚਨਬੱਧ ਹਾਂ।
ਇਹ ਵਿਕਾਸ ਚੱਲ ਰਹੇ ਜੀ-20 ਸੰਮੇਲਨ ਦੇ ਦੌਰਾਨ ਹੋਇਆ ਹੈ, ਜਿਸ ਨੇ ਭਾਰਤ ਲਈ ਇਕ ਵੱਡੀ ਕੂਟਨੀਤਕ ਸਫਲਤਾ ’ਚ, ਇਕ ਸਾਂਝੇ ਐਲਾਨਾਮੇ ’ਤੇ ਸਹਿਮਤੀ ਪ੍ਰਗਟਾਈ ਹੈ।
