ਬਿਹਾਰ ਚੋਣਾਂ ਲਈ ਉਮੀਦਵਾਰਾਂ ਦੀ ਪਛਾਣ ਲਈ ਸਰਵੇਖਣ ਜਾਰੀ
ਪਟਨਾ : ਜਨਤਾ ਦਲ ਨੂੰ ਵੰਡ ਕੇ ਸਥਾਪਤ ਕੀਤੀ ਗਈ ਪਾਰਟੀ ਰਾਸ਼ਟਰੀ ਜਨਤਾ ਦਲ (ਆਰ.ਜੇ.ਡੀ.) ਦੇ ਕੌਮੀ ਪ੍ਰਧਾਨ ਲਾਲੂ ਪ੍ਰਸਾਦ ਯਾਦਵ ਨੂੰ ਸਨਿਚਰਵਾਰ ਨੂੰ ਮੁੜ ਕੌਮੀ ਪ੍ਰਧਾਨ ਚੁਣ ਲਿਆ ਗਿਆ।
ਪਾਰਟੀ ਦੀ 28ਵੀਂ ਵਰ੍ਹੇਗੰਢ ਉਤੇ ਮੁੜ ਚੋਣ ਤੋਂ ਬਾਅਦ ਪਾਰਟੀ ਦੀ ਕੌਮੀ ਪ੍ਰੀਸ਼ਦ ਨੂੰ ਸੰਬੋਧਨ ਕਰਦਿਆਂ 78 ਸਾਲ ਦੇ ਨੇਤਾ ਨੇ ਕਿਹਾ ਕਿ ਬਿਹਾਰ ’ਚ ਹੋਣ ਵਾਲੀਆਂ ਵਿਧਾਨ ਸਭਾ ਚੋਣਾਂ ਲਈ ਢੁਕਵੇਂ ਉਮੀਦਵਾਰਾਂ ਦੀ ਪਛਾਣ ਕਰਨ ਲਈ ਸਰਵੇਖਣ ਕੀਤਾ ਜਾ ਰਿਹਾ ਹੈ।
ਉਨ੍ਹਾਂ ਕਿਹਾ, ‘‘ਤੁਹਾਡੇ ’ਚੋਂ ਉਮੀਦਵਾਰਾਂ ਨੂੰ ਚੁਣਨ ਲਈ ਇਕ ਸਰਵੇਖਣ ਚੱਲ ਰਿਹਾ ਹੈ। ਮੈਂ ਤੇਜਸਵੀ ਨਾਲ ਸਲਾਹ-ਮਸ਼ਵਰਾ ਕਰ ਕੇ ਅੰਤਿਮ ਫੈਸਲਾ ਲਵਾਂਗਾ। ਮੈਂ ਤੇਜਸਵੀ ਨੂੰ ਇਹ ਜ਼ਿੰਮੇਵਾਰੀ ਸੌਂਪੀ ਹੈ ਅਤੇ ਤੁਹਾਨੂੰ ਸਾਰਿਆਂ ਨੂੰ ਅਪੀਲ ਕਰਦਾ ਹਾਂ ਕਿ ਉਹ ਚੋਣਾਂ ਜਿੱਤਣ ਲਈ ਹਰ ਸੰਭਵ ਕੋਸ਼ਿਸ਼ ਕਰਨ।’’
ਸੀਨੀਅਰ ਨੇਤਾ ਅਪਣੇ 36 ਸਾਲ ਦੇ ਬੇਟੇ ਤੋਂ ਖੁਸ਼ ਨਜ਼ਰ ਆ ਰਹੇ ਸਨ ਅਤੇ ਉਨ੍ਹਾਂ ਨੇ ਕਿਹਾ, ‘‘ਮੈਨੂੰ ਉਨ੍ਹਾਂ ਤੋਂ ਨਿਯਮਤ ਤੌਰ ਉਤੇ ਜਾਣਕਾਰੀ ਮਿਲਦੀ ਰਹਿੰਦੀ ਹੈ। ਉਹ ਹਮੇਸ਼ਾ ਰਾਜ ਦੇ ਦੂਰ-ਦੁਰਾਡੇ ਕੋਨਿਆਂ ਦੀ ਯਾਤਰਾ ਕਰਦੇ ਰਹਿੰਦੇ ਹਨ। ਕਈ ਵਾਰ ਮੈਨੂੰ ਵਾਪਸੀ ਉਤੇ ਹੀ ਉਨ੍ਹਾਂ ਦੇ ਦੌਰਿਆਂ ਬਾਰੇ ਪਤਾ ਲਗਦਾ ਹੈ।’’
ਉਨ੍ਹਾਂ ਨੇ ਅਪਣੀ ਪਤਨੀ ਰਾਬੜੀ ਦੇਵੀ ਦਾ ਵੀ ਧੰਨਵਾਦ ਕੀਤਾ, ਜਿਨ੍ਹਾਂ ਨੇ ਚਾਰਾ ਘਪਲੇ ’ਚ ਸੀ.ਬੀ.ਆਈ. ਦੀ ਚਾਰਜਸ਼ੀਟ ਤੋਂ ਬਾਅਦ ਉਨ੍ਹਾਂ ਨੂੰ ਬਿਹਾਰ ਦੇ ਮੁੱਖ ਮੰਤਰੀ ਦੇ ਅਹੁਦੇ ਤੋਂ ਅਸਤੀਫਾ ਦੇਣ ਲਈ ਮਜਬੂਰ ਕੀਤਾ ਸੀ। ਉਨ੍ਹਾਂ ਕਿਹਾ, ‘‘ਮੈਂ ਸਮਰਥਨ ਦਾ ਥੰਮ੍ਹ ਬਣਨ ਲਈ ਉਸ ਦਾ ਧੰਨਵਾਦੀ ਹਾਂ। ਜਦੋਂ ਮੈਂ ਉਪਲਬਧ ਨਹੀਂ ਸੀ ਤਾਂ ਉਸ ਨੇ ਸੱਭ ਕੁੱਝ ਸੰਭਾਲਿਆ। ਪਿਛਲੇ ਕੁੱਝ ਸਮੇਂ ਤੋਂ ਮੇਰੀ ਸਿਹਤ ਖਰਾਬ ਰਹੀ ਹੈ ਅਤੇ ਉਹ ਹੀ ਮੇਰੀ ਦੇਖਭਾਲ ਕਰਦੀ ਹੈ।’’
ਅਪਣੀ ਕੁਰਸੀ ਉਤੇ ਬੈਠ ਕੇ ਕਮਜ਼ੋਰ ਆਵਾਜ਼ ’ਚ ਬੋਲਣ ਵਾਲੇ ਕਰਿਸ਼ਮਾਈ ਨੇਤਾ ਉਤੇ ਬੁਢਾਪੇ ਅਤੇ ਕਈ ਬੀਮਾਰੀਆਂ ਦਾ ਅਸਰ ਪਿਆ ਪਰ ਉਨ੍ਹਾਂ ਨੇ ਜ਼ੋਰ ਦੇ ਕੇ ਕਿਹਾ, ‘‘ਮੈਂ ਪਾਰਟੀ ਨੂੰ ਨਿਰਾਸ਼ ਨਹੀਂ ਹੋਣ ਦੇਵਾਂਗਾ। ਮੈਂ ਅਪਣੇ ਕਾਮਿਆਂ ਲਈ ਜੋ ਵੀ ਲੋੜੀਂਦਾ ਹੈ, ਉਹ ਕਰਨ ਲਈ ਹਾਂ, ਅਪਣੀ ਤੰਦਰੁਸਤੀ ਦੀ ਪਰਵਾਹ ਕੀਤੇ ਬਿਨਾਂ।’’
