ਇਰਾਨ-ਇਜ਼ਰਾਈਲ 'ਚ ਚੱਲ ਰਹੀ ਜੰਗ ਕਾਰਨ ਉਡਾਣਾਂ ਕੀਤੀਆਂ ਗਈਆਂ ਰੱਦ
ਰਾਜਾਸਾਂਸੀ : ਅਮਰੀਕਾ-ਇਜ਼ਰਾਈਲ ਤੇ ਅਰਬ ਮੁਲਕਾਂ ਦਰਮਿਆਨ ਜੰਗ ਦੇ ਚਲਦਿਆਂ ਅੰਮ੍ਰਿਤਸਰ ਦੇ ਸ੍ਰੀ ਗੁਰੂ ਰਾਮਦਾਸ ਜੀ ਕੌਮਾਂਤਰੀ ਹਵਾਈ ਅੱਡਾ ਰਾਜਾਸਾਂਸੀ ਵਿਖੇ ਅੱਜ ਮੁੜ 12 ਉਡਾਣਾਂ ਰੱਦ ਹੋ ਗਈਆਂ। ਰੱਦ ਉਡਾਣਾਂ ਸੰਬੰਧੀ ਜਾਣਕਾਰੀ ਸਾਂਝੀ ਕਰਦਿਆਂ ਅੰਮ੍ਰਿਤਸਰ ਹਵਾਈ ਅੱਡੇ ਦੇ ਡਾਇਰੈਕਟਰ ਭੁਪਿੰਦਰ ਸਿੰਘ ਨੇ ਦੱਸਿਆ ਕਿ ਅੱਜ ਮੁੜ ਉਕਤ ਲੱਗੀ ਜੰਗ ਦੌਰਾਨ 1 ਘਰੇਲੂ ਤੇ 11 ਕੌਮਾਂਤਰੀ ਉਡਾਣਾਂ ਰੱਦ ਹੋਈਆਂ ਹਨ। ਰੱਦ ਹੋਈਆਂ ਉਡਾਣਾਂ ’ਚ 1 ਦਿੱਲੀ ਤੋਂ ਅੰਮ੍ਰਿਤਸਰ ਅਤੇ 2 ਦੋਹਾ ਕਤਰ, 4 ਏਅਰ ਇੰਡੀਆ ਐਕਸਪ੍ਰੈਸ, 2 ਸਪਾਈਸਜੈੱਟ, 2 ਇੰਡੀਗੋ ਤੇ 1 ਏਅਰ ਇੰਡੀਆ ਦੀਆਂ ਉਡਾਣਾਂ ਜੋ ਦੋਹਾ, ਦੁਬਈ, ਸ਼ਾਰਜਾਹ ਤੇ ਲੰਡਨ ਅੰਮ੍ਰਿਤਸਰ ਦਰਮਿਆਨ ਚਲਣੀਆਂ ਸਨ, ਰੱਦ ਕਰ ਦਿੱਤੀਆਂ ਗਈਆਂ।
ਉਨ੍ਹਾਂ ਦੱਸਿਆ ਕਿ ਇਹਨਾਂ ਉਡਾਣਾਂ ਦੇ ਰੱਦ ਦੀ ਸੂਚਨਾ ਹਵਾਈ ਕੰਪਨੀਆਂ ਵਲੋਂ ਯਾਤਰੀਆਂ ਨੂੰ ਇਕ ਦਿਨ ਪਹਿਲਾਂ ਹੀ ਦੇ ਦਿੱਤੀ ਗਈ ਸੀ। ਉਹਨਾਂ ਘਰੇਲੂ ਉਡਾਣਾਂ ਦੀ ਗੱਲ ਕਰਦਿਆਂ ਕਿਹਾ ਕਿ ਅੰਮ੍ਰਿਤਸਰ ਹਵਾਈ ਤੋਂ ਸਾਰੀਆਂ ਉਡਾਣਾਂ ਆਪਣੇ ਨਿਰਧਾਰਿਤ ਸਮੇਂ ਨਾਲ ਸਹੀ ਚੱਲ ਰਹੀਆਂ ਹਨ ਕਿਉਂਕਿ ਘਰੇਲੂ ਸੈਕਟਰ ਬਿਲਕੁਲ ਸਹੀ ਤੇ ਸੁਰੱਖਿਅਤ ਹੈ। ਉਨ੍ਹਾਂ ਉਕਤ ਉਡਾਣਾਂ ਰਾਹੀਂ ਸਫਰ ਕਰਨ ਵਾਲੇ ਸਮੂਹ ਯਾਤਰੀਆਂ ਨੂੰ ਸੰਦੇਸ਼ ਦਿੰਦਿਆਂ ਕਿਹਾ ਕਿ ਜਿਨਾਂ ਚਿਰ ਜੰਗ ਦਾ ਮਾਹੌਲ ਸ਼ਾਂਤ ਨਹੀਂ ਹੁੰਦਾ ਉਨਾਂ ਸਮਾਂ ਯਾਤਰੀ ਆਪਣੇ ਸਫਰ ਲਈ ਕੋਈ ਯੋਜਨਾ ਨਾ ਬਣਾਉਣ।
