ਮਲਾਈ ਦਾ ਫ਼ੇਸਪੈਕ ਚਿਹਰੇ ਨੂੰ ਜਿੰਨੀ ਨਮੀ ਅਤੇ ਨਿਖਾਰ ਦੇ ਸਕਦਾ ਹੈ, ਕੋਈ ਮਹਿੰਗੀ ਕਰੀਮ ਨਹੀਂ ਦੇ ਸਕਦੀ
Using a cream face pack Beauty Tips: ਮਲਾਈ ਦਾ ਫ਼ੇਸਪੈਕ ਔਰਤਾਂ ਦੀ ਚਮੜੀ ਲਈ ਬਹੁਤ ਫ਼ਾਇਦੇਮੰਦ ਹੈ, ਜੋ ਚਮੜੀ ਨੂੰ ਮੁਲਾਇਮ ਅਤੇ ਬੇਦਾਗ਼ ਬਣਾਉਂਦਾ ਹੈ। ਮਲਾਈ ਦਾ ਫ਼ੇਸਪੈਕ ਚਿਹਰੇ ਨੂੰ ਜਿੰਨੀ ਨਮੀ ਅਤੇ ਨਿਖਾਰ ਦੇ ਸਕਦਾ ਹੈ, ਕੋਈ ਮਹਿੰਗੀ ਕਰੀਮ ਨਹੀਂ ਦੇ ਸਕਦੀ। ਇਸੇ ਲਈ ਅੱਜ ਅਸੀਂ ਤੁਹਾਨੂੰ ਦਸਾਂਗੇ ਕਿ ਮਲਾਈ ਦਾ ਤੁਸੀਂ ਅਪਣੇ ਚਿਹਰੇ ’ਤੇ ਕਿਸ ਤਰ੍ਹਾਂ ਇਸਤੇਮਾਲ ਕਰ ਸਕਦੇ ਹੋ:
ਧੁੱਪ ਕਾਰਨ ਜੇਕਰ ਤੁਹਾਡਾ ਚਿਹਰਾ ਖ਼ਰਾਬ ਹੋ ਗਿਆ ਹੈ ਤਾਂ ਤੁਸੀਂ ਮਲਾਈ ਦੀ ਵਰਤੋਂ ਕਰੋ। ਚਾਹੋ ਤਾਂ ਤੁਸੀਂ ਮਲਾਈ ਨੂੰ ਇੰਜ ਹੀ ਚਿਹਰੇ ’ਤੇ ਲਾ ਕੇ 10 ਮਿੰਟ ਲਈ ਛੱਡ ਦਿਉ ਜਾਂ ਇਸ ਵਿਚ ਵੇਸਣ ਮਿਲਾ ਕੇ ਪੇਸਟ ਤਿਆਰ ਕਰੋ ਅਤੇ ਇਸ ਨੂੰ ਚਿਹਰੇ ’ਤੇ ਲਗਾਉ। 15-20 ਮਿੰਟ ਬਾਅਦ ਪਾਣੀ ਨਾਲ ਚਿਹਰਾ ਧੋ ਲਉ। ਚੰਗੇ ਨਤੀਜੇ ਲਈ ਹਫ਼ਤੇ ਵਿਚ ਦੋ ਵਾਰ ਫੇਸਪੈਕ ਲਗਾਉ।
ਮਲਾਈ ਵਧੀਆ ਮਾਇਸਚੁਰਾਈਜ਼ਰ ਹੈ। ਇਸ ਲਈ ਖੁਸ਼ਕ ਚਮੜੀ ਵਾਲਿਆਂ ਨੂੰ ਮਲਾਈ ਜ਼ਰੂਰ ਲਗਾਉਣੀ ਚਾਹੀਦੀ ਹੈ। ਮਲਾਈ ਵਿਚ ਸ਼ਹਿਦ ਮਿਲਾ ਕੇ ਚਿਹਰੇ ’ਤੇ ਲਗਾਉ ਅਤੇ 20 ਮਿੰਟ ਲਈ ਛੱਡ ਦਿਉ। ਫਿਰ ਠੰਢੇ ਪਾਣੀ ਨਾਲ ਚਿਹਰਾ ਧੋ ਲਉ। ਖੁਸ਼ਕ ਚਮੜੀ ਵਾਲਿਆਂ ਨੂੰ ਇਸ ਫ਼ੇਸਪੈਕ ਦੀ ਵਰਤੋਂ ਜ਼ਰੂਰ ਕਰਨੀ ਚਾਹੀਦੀ ਹੈ।
ਮਲਾਈ ਕਲੀਂਜ਼ਰ ਦਾ ਕੰਮ ਕਰਦੀ ਹੈ। ਇਸ ਲਈ 1 ਚਮਚਾ ਮਲਾਈ ਵਿਚ 1 ਚਮਚਾ ਨਿੰਬੂ ਦਾ ਰਸ ਮਿਲਾ ਕੇ ਚਿਹਰੇ ਦੀ 4-5 ਮਿੰਟ ਤਕ ਮਸਾਜ ਕਰੋ। ਕੁੱਝ ਦੇਰ ਇੰਜ ਹੀ ਰਹਿਣ ਦਿਉ, ਫਿਰ ਗਿੱਲੇ ਰੂੰ ਨਾਲ ਚਿਹਰਾ ਸਾਫ਼ ਕਰ ਲਉ, ਜਿਸ ਨਾਲ ਫ਼ਾਇਦਾ ਹੋਵੇਗਾ। 1 ਕੱਪ ਮਲਾਈ ਵਿਚ ਥੋੜ੍ਹਾ ਜਿਹਾ ਕੇਸਰ ਪਾ ਕੇ ਪੇਸਟ ਬਣਾ ਲਉ ਅਤੇ ਇਸ ਨੂੰ ਪੂਰੇ ਸਰੀਰ ’ਤੇ ਲਗਾਉ। ਫਿਰ ਅੱਧੇ ਘੰਟੇ ਬਾਅਦ ਨਹਾ ਲਉ। ਚਮੜੀ ਮੱਖਣ ਵਾਂਗ ਮੁਲਾਇਮ ਹੋ ਜਾਏਗੀ।
ਜੇ ਤੁਹਾਡੀ ਚਮੜੀ ਦੀ ਰੰਗਤ ਫਿੱਕੀ ਪੈ ਗਈ ਅਤੇ ਨਿਖਾਰ ਵੀ ਚਲਾ ਗਿਆ ਹੈ ਤਾਂ ਮਲਾਈ ਵਿਚ ਹਲਦੀ ਅਤੇ ਵੇਸਣ ਮਿਲਾ ਕੇ ਪੇਸਟ ਬਣਾਉ ਅਤੇ ਇਸ ਨੂੰ ਚਿਹਰੇ ’ਤੇ ਲਾ ਕੇ 15 ਮਿੰਟ ਤਕ ਛੱਡ ਦਿਉ। ਉਸ ਦੇ ਬਾਅਦ ਪਾਣੀ ਨਾਲ ਧੋ ਲਉ। ਇਕ ਚਮਚਾ ਮਲਾਈ ਵਿਚ 10 ਬੂੰਦਾਂ ਆਲਿਵ ਤੇਲ ਪਾ ਕੇ ਮਿਕਸ ਕਰੋ। ਇਸ ਪੇਸਟ ਨੂੰ ਚਿਹਰੇ ’ਤੇ ਲਗਾ ਕੇ 10 ਮਿੰਟ ਲਈ ਛੱਡ ਦਿਉ। ਫਿਰ ਪਾਣੀ ਨਾਲ ਚਿਹਰਾ ਧੋ ਲਉ। ਚਮੜੀ ਕੋਮਲ ਹੋ ਜਾਏਗੀ।
ਇਕ ਚਮਚਾ ਮਲਾਈ ਵਿਚ ਇਕ ਚਮਚਾ ਚੌਲਾਂ ਦਾ ਆਟਾ ਪਾ ਕੇ 10 ਬੂੰਦਾਂ ਬਾਦਾਮ ਦਾ ਤੇਲ ਪਾ ਕੇ ਪੇਸਟ ਬਣਾਉ। ਇਸ ਪੇਸਟ ਨੂੰ ਚਿਹਰੇ ’ਤੇ ਲਾ ਕੇ ਸੁਕਣ ਦਿਉ। ਫਿਰ ਹਲਕਾ ਪਾਣੀ ਲਗਾ ਕੇ ਸਕ੍ਰਬ ਦੀ ਤਰ੍ਹਾਂ ਪੈਕ ਨੂੰ ਉਤਾਰੋ। ਇਸ ਨਾਲ ਖੁਸ਼ਕ ਚਮੜੀ ਬਾਹਰ ਨਿਕਲ ਜਾਏਗੀ ਅਤੇ ਚਮੜੀ ’ਚ ਨਿਖਾਰ ਆਏਗਾ।
