ਇਕ ਲੜਕੀ ਨੇ ਅਜਿਹੀ ਹੀ ਮਿਸਾਲ ਕਾਇਮ ਕੀਤੀ ਹੈ ਜਿਸ ਨੇ...
ਚੰਡੀਗੜ੍ਹ: ਪੰਜਾਬ ਵਿਚ ਇਸ ਸਮੇਂ ਕਿਸਾਨ ਅਪਣੀ ਕਣਕ ਦੀ ਸਾਂਭ ਸੰਭਾਲ ਕਰ ਰਿਹਾ ਹੈ। ਇਸ ਤੋਂ ਇਲਾਵਾ ਉਸ ਨੇ ਪਸ਼ੂਆਂ ਲਈ ਤੂੜੀ ਦਾ ਪ੍ਰਬੰਧ ਵੀ ਕਰਨਾ ਹੁੰਦਾ ਹੈ। ਇਹ ਸਾਰਾ ਕੰਮ ਵੈਸੇ ਤਾਂ ਆਦਮੀ ਵੱਲੋਂ ਕੀਤਾ ਜਾਂਦਾ ਹੈ ਪਰ ਕੀ ਕਦੇ ਕੋਈ ਲੜਕੀ ਵੀ ਇਹ ਕੰਮ ਕਰ ਸਕਦੀ ਹੈ। ਹਾਂ ਜੀ, ਇਕ ਲੜਕੀ ਵੀ ਇਹ ਸਾਰੇ ਕੰਮ ਕਰ ਸਕਦੀ ਹੈ। ਅੱਜ ਦੇ ਯੁੱਗ ਵਿਚ ਲੜਕੀਆਂ ਕਿਸੇ ਕੰਮ ਵਿਚ ਮੁੰਡਿਆਂ ਤੋਂ ਪਿੱਛੇ ਨਹੀਂ ਹਨ।
Photo
ਇਕ ਲੜਕੀ ਨੇ ਅਜਿਹੀ ਹੀ ਮਿਸਾਲ ਕਾਇਮ ਕੀਤੀ ਹੈ ਜਿਸ ਨੇ ਅਪਣੇ ਪਿਤਾ ਦੀ ਤੂੜੀ ਬਣਵਾਉਣ ਵਿਚ ਮਦਦ ਕਰ ਕੇ ਸਭ ਦਾ ਦਿਲ ਜਿੱਤ ਲਿਆ ਹੈ। ਇਹਨਾਂ ਪਿਓ-ਧੀ ਨਾਲ ਸਪੋਕਸਮੈਨ ਚੈਨਲ ਦੇ DM ਨਿਰਮਤ ਕੌਰ ਵੱਲੋਂ ਇੰਟਰਵਿਊ ਰਾਹੀਂ ਰਾਬਤਾ ਕਾਇਮ ਕੀਤਾ ਗਿਆ। ਇਸ ਇੰਟਰਵਿਊ ਵਿਚ ਉਹਨਾਂ ਦੀ ਜ਼ਿੰਦਗੀ ਅਤੇ ਉਹਨਾਂ ਦੀ ਧੀ ਵੱਲੋਂ ਕੀਤੀ ਗਈ ਮਦਦ ਸਬੰਧੀ ਗੱਲਬਾਤ ਕੀਤੀ ਗਈ। ਇਸ ਵਿਅਕਤੀ ਦਾ ਨਾਮ ਦਵਿੰਦਰ ਸਿੰਘ ਹੈ ਅਤੇ ਉਹਨਾਂ ਦੀ ਬੇਟੀ ਦਾ ਨਾਮ ਰਿਪਨ ਹੈ।
Photo
ਦਵਿੰਦਰ ਸਿੰਘ ਨੇ ਦਸਿਆ ਕਿ ਉਹ ਖੇਤਾਂ ਵਿਚ ਕੰਮ ਕਰ ਰਿਹਾ ਸੀ ਤਾਂ ਉਸ ਦੀ ਬੇਟੀ ਐਕਟਿਵਾ ਤੇ ਉਸ ਕੋਲ ਆਈ ਤੇ ਉਸ ਨੂੰ ਪੁੱਛਣ ਲੱਗੀ ਕਿ ਉਹ ਕਿਵੇਂ ਮਿੱਟੀ ਨਾਲ ਮਿੱਟੀ ਹੋ ਕੇ ਕੰਮ ਕਰ ਰਹੇ ਹਨ। ਇਹ ਕਿੰਨਾ ਔਖਾ ਕੰਮ ਹੈ। ਪਰ ਉਸ ਦੇ ਪਿਤਾ ਨੇ ਉਸ ਨੂੰ ਸਮਝਾਇਆ ਕਿ ਇਹ ਤਾਂ ਜੱਟਾਂ ਦੀ ਕਿਸਮਤ ਹੈ, ਸਾਨੂੰ ਇਹੀ ਸਭ ਕਰਨਾ ਪੈਂਦਾ ਹੈ ਤਾਂ ਉਸ ਦੀ ਬੇਟੀ ਨੇ ਅਪਣੇ ਪਿਤਾ ਨੂੰ ਕਿਹਾ ਕਿ ਉਹ ਆਰਾਮ ਕਰਨ ਤੇ ਉਹਨਾਂ ਦੀ ਥਾਂ ਉਹ ਆਪ ਟਰੈਕਟਰ ਚਲਾਵੇਗੀ। ਇਹ ਗਲ ਸੁਣ ਕੇ ਉਸ ਦਾ ਪਿਤਾ ਹੈਰਾਨ ਰਹਿ ਗਿਆ ਤੇ ਉਸ ਦੀ ਖੁਸ਼ੀ ਦਾ ਟਿਕਾਣਾ ਨਾ ਰਿਹਾ।
Photo
ਫਿਰ ਉਸ ਨੇ ਅਪਣੀ ਬੇਟੀ ਨੂੰ ਟਰੈਕਟਰ ਚਲਾਉਣ ਬਾਰੇ ਦਸਿਆ ਕਿ ਟਰੈਕਟਰ ਕਿਵੇਂ ਚਲਾਇਆ ਜਾਂਦਾ ਹੈ। ਇਸ ਤੋਂ ਬਾਅਦ ਉਸ ਦੀ ਧੀ ਨੇ ਤੂੜੀ ਬਣਾਉਣਾ ਸ਼ੁਰੂ ਕਰ ਦਿੱਤਾ। ਇਸ ਸਮੇਂ ਉਸ ਦੇ ਪਿਤਾ ਨੇ ਉਸ ਦੀ ਵੀਡੀਉ ਬਣਾਈ ਤੇ ਉਸ ਦੀ ਰੱਜ ਕੇ ਤਾਰੀਫ ਕੀਤੀ ਕਿ ਧੀਆਂ ਪੁੱਤਾਂ ਨਾਲੋਂ ਘਟ ਨਹੀਂ ਹਨ।
Photo
ਗੱਲਬਾਤ ਦੌਰਾਨ ਰਿਪਨ ਨੇ ਦਸਿਆ ਕਿ ਉਹ ਅੱਠਵੀਂ ਜਮਾਤ ਵਿਚ ਪੜ੍ਹਦੀ ਹੈ ਤੇ ਉਹ ਖੇਤ ਤੋਂ ਘਰ ਆ ਕੇ ਅਪਣੀ ਮਾਂ ਦੀ ਮਦਦ ਵੀ ਕਰਦੀ ਹੈ। ਉਸ ਨੇ ਅੱਗੇ ਵੀ ਖੇਤੀ ਕਰਨ ਬਾਰੇ ਸੋਚਿਆ ਹੋਇਆ ਹੈ ਕਿ ਝੋਨੇ ਦੀ ਫ਼ਸਲ ਵੇਲੇ ਵੀ ਉਹ ਅਪਣੇ ਪਿਤਾ ਨਾਲ ਖੇਤਾ ਵਿਚ ਕੰਮ ਕਰੇਗੀ।
Photo
ਉਹਨਾਂ ਅੱਗੇ ਕਿਹਾ ਕਿ ਲੋਕ ਅਕਸਰ ਧੀ ਨੂੰ ਪੱਥਰ ਮੰਨਦੇ ਹਨ ਕਿ ਇਸ ਤੋਂ ਕੀ ਕਰਵਾਉਣਾ ਹੈ, ਇਸ ਨੂੰ ਕੁੱਖ ਵਿਚ ਹੀ ਮਾਰ ਦਿੱਤਾ ਜਾਵੇ ਇਸ ਦੀ ਥਾਂ ਤੇ ਪੁੱਤ ਜਨਮ ਲੈ ਲੈਂਦਾ। ਉਹ ਘਰ ਦਾ ਵਾਰਸ ਹੁੰਦਾ ਹੈ ਉਸ ਨਾਲ ਹੀ ਪੀੜ੍ਹੀ ਵਧੇਗੀ। ਪਰ ਉਹ ਇਸ ਸਭ ਤੇ ਖਿਲਾਫ ਹਨ। ਉਹਨਾਂ ਦੀਆਂ ਦੋ ਧੀਆਂ ਅਤੇ ਇਕ ਪੁੱਤ ਹੈ। ਪਰ ਉਹਨਾਂ ਨੇ ਧੀਆਂ ਅਤੇ ਪੁੱਤਾਂ ਵਿਚ ਕਦੇ ਕੋਈ ਫਰਕ ਨਹੀਂ ਕੀਤਾ ਸਗੋਂ ਉਹਨਾਂ ਨੂੰ ਅੱਗੇ ਆਉਣ ਦਾ ਹਮੇਸ਼ਾ ਮੌਕਾ ਦਿੱਤਾ ਹੈ।
ਉਹਨਾਂ ਨੇ ਸਪੋਕਸਮੈਨ ਚੈਨਲ ਰਾਹੀਂ ਇਕ ਬੇਨਤੀ ਵੀ ਕੀਤੀ ਹੈ ਕਿ ਉਹਨਾਂ ਦੀ ਓਰਗੈਨਿਕ ਫ਼ਸਲ ਦੀ ਸਾਂਭ ਸੰਭਾਲ ਕੀਤੀ ਜਾਵੇ, ਉਹਨਾਂ ਨੂੰ ਫ਼ਸਲ ਮੰਡੀਆਂ ਵਿਚ ਸੁੱਟ ਕੇ ਨਾ ਆਉਣੀ ਪਵੇ ਸਗੋਂ ਖੜ੍ਹੀ ਫ਼ਸਲ ਦਾ ਹੀ ਮੁੱਲ ਪੈਣਾ ਚਾਹੀਦਾ ਹੈ ਤਾਂ ਹੀ ਉਹ ਅੱਗੇ ਇਸ ਦਾ ਵਿਕਾਸ ਕਰ ਸਕਦੇ ਹਨ।
ਇਸ ਦੇ ਨਾਲ ਹੀ ਉਹਨਾਂ ਨੇ ਲੋਕਾਂ ਨੂੰ ਸੁਨੇਹਾ ਦਿੱਤਾ ਕਿ ਲੜਕੀਆਂ ਅਤੇ ਲੜਕਿਆਂ ਵਿਚ ਕਦੇ ਵੀ ਭੇਦ-ਭਾਵ ਨਹੀਂ ਕਰਨਾ ਚਾਹੀਦਾ ਸਗੋਂ ਉਹਨਾਂ ਨੂੰ ਹੌਂਸਲਾ ਦੇਣਾ ਚਾਹੀਦਾ ਹੈ ਕਿ ਉਹ ਮੁੰਡਿਆਂ ਨਾਲੋਂ ਘਟ ਨਹੀਂ ਹਨ ਤੇ ਉਹਨਾਂ ਨੂੰ ਵੀ ਸਾਰੇ ਕੰਮ-ਕਾਜ ਕਰਨ ਦਾ ਹੱਕ ਹੈ।
Punjabi News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ।
