ਨਵੀਂ ਦਿੱਲੀ: ਦਿੱਲੀ ਦੇ ਕਰਾਵਲ ਨਗਰ ਤੋਂ ਦਿਲ ਦਹਿਲਾ ਦੇਣ ਵਾਲੀ ਖ਼ਬਰ ਸਾਹਮਣੇ ਆਈ ਹੈ ਜਿਥੇ ਇਕ ਪਿਤਾ ਨੇ ਅਪਣੀ ਧੀ ਦਾ ਦਰਦਨਾਕ ਕਤਲ ਕਰ ਦਿਤਾ। ਮੀਡੀਆ ਰਿਪੋਰਟ ਮੁਤਾਬਕ ਨਾਬਾਲਗ਼ ਧੀ ਦੇ ਇਕ ਮੁੰਡੇ ਨਾਲ ਮਿਲਣ 'ਤੇ ਕੁੜੀ ਦੇ ਪਿਤਾ ਨੂੰ ਇਤਰਾਜ਼ ਸੀ। ਇਸ ਗੱਲ ਤੋਂ ਖ਼ਫ਼ਾ ਹੋ ਕੇ ਪਿਤਾ ਨੇ ਧੀ ਦੀ ਗਲਾ ਕੱਟ ਕੇ ਹਤਿਆ ਕਰ ਦਿਤੀ। ਮਾਮਲਾ ਸਾਹਮਣੇ ਆਉਣ ਤੋਂ ਬਾਅਦ ਪੁਲਿਸ ਨੇ ਆਰੋਪੀ ਪਿਤਾ ਨੂੰ ਗਿਰਫ਼ਤਾਰ ਕਰ ਲਿਆ ਹੈ। ਜਿਥੇ ਆਰੋਪੀ ਪਿਤਾ ਨੇ ਅਪਣਾ ਗੁਨਾਹ ਕਬੂਲ ਕਰ ਲਿਆ ਹੈ।
ਮੀਡੀਆ ਮੁਤਾਬਕ ਪੁਲਿਸ ਨੇ ਦਸਿਆ ਕਿ 13 ਸਾਲ ਦੀ ਧੀ 7 ਮਾਰਚ ਦੀ ਸ਼ਾਮ ਘਰ ਤੋਂ ਮੋਮੋਜ਼ ਲੈਣ ਦੇ ਬਹਾਨੇ ਨਿਕਲੀ ਸੀ। ਜਿਸ ਤੋਂ ਬਾਅਦ ਪਿਤਾ ਨੂੰ ਧੀ ਦੇ ਇਕੱਲੀ ਜਾਣ 'ਤੇ ਸ਼ੱਕ ਹੋਇਆ ਕਿਉਂਕਿ 7ਵੀ ਕਲਾਸ 'ਚ ਪੜ੍ਹਨ ਵਾਲੀ ਧੀ ਅਕਸਰ ਅਪਣੇ ਛੋਟੇ ਭਰਾ ਨਾਲ ਹੀ ਜਾਂਦੀ ਸੀ। ਜਿਵੇਂ ਹੀ ਧੀ ਘਰ ਤੋਂ ਬਾਹਰ ਨਿਕਲੀ ਤਾਂ ਪਿਤਾ ਨੇ ਧੀ ਦਾ ਪਿਛਾ ਕੀਤਾ। ਪਿਤਾ ਨੇ ਧੀ ਨੂੰ ਇਕ ਮੁੰਡੇ ਦੇ ਨਾਲ ਦੇਖਿਆ।
ਹਾਲਾਂਕਿ ਪਿਤਾ ਨੂੰ ਦੇਖ ਕੇ ਮੁੰਡਾ ਭੱਜ ਗਿਆ ਪਰ 40 ਸਾਲ ਦਾ ਸੁਦੇਸ਼ (ਪਿਤਾ) ਨੇ ਧੀ ਨੂੰ ਬਾਇਕ 'ਤੇ ਬਿਠਾਇਆ ਅਤੇ ਟਰਾਨਿਕਾ ਸਿਟੀ ਲੈ ਗਿਆ। ਜਿਥੇ ਆਰੋਪੀ ਨੇ ਚਾਕੂ ਨਾਲ ਧੀ ਦੀ ਗਲਾ ਕੱਟ ਕੇ ਹਤਿਆ ਕਰ ਦਿਤੀ। ਇੰਨਾ ਹੀ ਨਹੀਂ, ਆਰੋਪੀ ਨੇ ਧੀ ਦੀ ਲਾਸ਼ ਨੂੰ ਕਿਸੇ ਖੱਡੇ 'ਚ ਸੁੱਟ ਦਿਤਾ ਅਤੇ ਘਰ ਪਰਤ ਆਇਆ।
ਪੁਲਿਸ 'ਚ ਸ਼ਿਕਾਇਤ ਦਰਜ ਹੋਣ ਦੇ ਬਾਅਦ ਆਰੋਪੀ ਨੇ ਦਸਿਆ ਕਿ ਉਹ ਮੁੰਡੇ ਨੂੰ ਮਾਰ ਦੇਣਾ ਚਾਹੁੰਦਾ ਸੀ ਅਤੇ ਉਸ ਨੂੰ ਨਹੀਂ ਪਸੰਦ ਸੀ ਕਿ ਉਸ ਦੀ ਧੀ ਉਸ ਮੁੰਡੇ ਨਾਲ ਗੱਲ ਕਰੇ। ਉਸ ਨੂੰ ਕਈ ਵਾਰ ਮੁੰਡੇ ਨਾਲ ਗੱਲ ਕਰਨ ਤੋਂ ਮਨਾ ਵੀ ਕੀਤਾ ਸੀ ਪਰ ਧ ਨਹੀਂ ਮੰਨੀ। 7 ਮਾਰਚ ਨੂੰ ਜਦੋਂ ਧੀ ਨੂੰ ਇਕੱਲੀ ਜਾਂਦੀ ਦੇਖਿਆ ਤਾਂ ਉਸ ਨੂੰ ਸ਼ੱਕ ਹੋ ਗਿਆ ਅਤੇ ਕੁੜੀ ਦੇ ਘਰ ਤੋਂ ਨਿਕਲਦੇ ਹੀ ਉਸ ਨੇ ਰਸੋਈ 'ਚੋਂ ਚਾਕੂ ਚੁਕਿਆ ਅਤੇ ਇਸ ਘਟਨਾ ਨੂੰ ਅੰਜਾਮ ਦੇ ਦਿਤਾ।
