Way of living
ਆਉਂਦੀ ਏ ਮੈਨੂੰ ਜੀਣ ਦੀ ਅਦਾ
ਆਉਂਦੀ ਏ ਮੈਨੂੰ ਜੀਣ ਦੀ ਅਦਾ,
ਦਿਲ ਟੁੱਟੇ ਤੇ ਵੀ ਮੁਸਕਰਾ ਹੀ ਲਵਾਂਗੀ।
ਮੇਰਾ ਫ਼ਿਕਰ ਕਰੀਂ ਨਾ, ਮੈਂ ਪਾਣੀ ਵਰਗੀ ਆਂ,
ਲੰਘਣ ਲਈ ਰਾਹ ਬਣਾ ਹੀ ਲਵਾਂਗੀ।
ਮੈਨੂੰ ਆਉਂਦੇ ਬਦਲਣੇ ਹਵਾਵਾਂ ਦੇ ਰੁਖ ਵੀ,
ਹਨੇਰੀਆਂ 'ਚ ਦੀਵਾ ਜਗਾ ਹੀ ਲਵਾਂਗੀ।
ਮੈਨੂੰ ਤੋੜੀਂ ਕੁੱਝ ਐਦਾਂ ਕਿ ਚੂਰ ਹੋ ਜਾਵਾਂ,
ਜੋੜ ਕਤਰੇ ਮੈਂ ਸਾਗਰ ਵਹਾ ਹੀ ਲਵਾਂਗੀ।
ਕੀ ਹੋਇਆ ਜੇ ਮੇਰੇ ਹਿੰਸੇ ਤਾਰੇ ਨੀ ਆਏ,
ਉਮੀਦਾਂ ਦੇ ਅੰਬਰ ਚਮਕਾ ਹੀ ਲਵਾਂਗੀ।
ਮਿਲਦੀ ਏ ਇੱਥੇ ਸਦਾ ਸੱਚ ਨੂੰ ਫਾਂਸੀ,
ਗੱਲ ਸੱਚੀ ਮੈਂ ਤਾਂ ਵੀ ਸੁਣਾ ਹੀ ਦਵਾਂਗੀ।
ਤੇਰੀ ਦੁਨੀਆਂ ਮੇਰੇ ਨਾਲ ਸਦਾ ਰੁੱਸੀ ਰਹੀ ਏ,
ਮੇਰੇ ਮੌਲਾ ਮੈਂ ਤੈਨੂੰ ਮਨਾ ਹੀ ਲਵਾਂਗੀ।
-ਸੁਖਜੀਵਨ ਕੁਲਬੀਰ ਸਿੰਘ,
ਸੰਪਰਕ : 72409-23044
