ਗ੍ਰੈਮੀ ਪੁਰਸਕਾਰਾਂ 'ਚ ਸਿਰਜਿਆ ਗਿਆ ਇਤਿਹਾਸ
ਲਾਸ ਏਂਜਲਸ: 68ਵੇਂ ਸਾਲਾਨਾ ਗ੍ਰੈਮੀ ਪੁਰਸਕਾਰ ’ਚ ਉਸ ਸਮੇਂ ਨਵਾਂ ਇਤਿਹਾਸ ਸਿਰਜਿਆ ਗਿਆ ਜਦੋਂ ਤਿੱਬਤੀ ਅਧਿਆਤਮਕ ਆਗੂ ਦਲਾਈ ਲਾਮਾ ਨੇ ਸੁਪਰੀਮ ਕੋਰਟ ਦੇ ਜੱਜ ਕੇਤਨਜੀ ਬ੍ਰਾਊਨ ਜੈਕਸਨ ਨੂੰ ਹਰਾ ਕੇ ਆਡੀਓ ਬੁੱਕ, ਬਿਰਤਾਂਤ ਅਤੇ ਕਹਾਣੀ ਸੁਣਾਉਣ ਦੀ ਰੀਕਾਰਡਿੰਗ ਲਈ ਅਪਣਾ ਪਹਿਲਾ ਗ੍ਰੈਮੀ ਪੁਰਸਕਾਰ ਜਿੱਤਿਆ। ਦਲਾਈ ਲਾਮਾ, ਤੇਨਜ਼ਿਨ ਗਯਾਤਸੋ ਨੇ ਲਾਸ ਏਂਜਲਸ ਵਿਚ 68ਵੇਂ ਸਾਲਾਨਾ ਗ੍ਰੈਮੀ ਪੁਰਸਕਾਰਾਂ ਵਿਚ ਅਪਣੀ ਬੋਲੀ ਗਈ ਸ਼ਬਦ ਐਲਬਮ, ‘ਮੈਡੀਟੇਸ਼ਨਜ਼: ਦਿ ਰਿਫਲੈਕਸ਼ਨ ਆਫ ਹਿਜ਼ ਹੋਲੀਨੇਸ ਦਿ ਦਲਾਈ ਲਾਮਾ’ ਲਈ ਬਿਹਤਰੀਨ ਆਡੀਓ ਬੁੱਕ, ਬਿਰਤਾਂਤ ਅਤੇ ਕਹਾਣੀ ਸੁਣਾਉਣ ਦੀ ਰੀਕਾਰਡਿੰਗ ਦੀ ਸ਼੍ਰੇਣੀ ਵਿਚ ਅਪਣਾ ਪਹਿਲਾ ਗ੍ਰੈਮੀ ਜਿੱਤਿਆ।
ਇਹ ਨਹੀਂ ਮਸ਼ਹੂਰ ਕੇਪੌਪ ਸੰਗੀਤ ਨੂੰ ਵੀ ਇਸ ਵਾਰੀ ਇਤਿਹਾਸਕ ਸਫ਼ਲਤਾ ਮਿਲੀ ਜਦੋਂ ‘ਕੇਪੋਪ ਡੀਮੋਨ ਹੰਟਰਜ਼’ ਫ਼ਿਲਮ ਦੇ ‘ਗੋਲਡਨ’ ਗੀਤ ਨੇ ਦ੍ਰਿਸ਼ ਮੀਡੀਆ ਲਈ ਲਿਖੇ ਗੀਤ ਲਈ ਆਪਣਾ ਪਹਿਲਾ ਗ੍ਰੈਮੀ ਪੁਰਸਕਾਰ ਜਿੱਤਿਆ। ਗੀਤਕਾਰਾਂ ਨੇ ਅੰਗਰੇਜ਼ੀ ਅਤੇ ਕੋਰੀਆਈ ਦੋਹਾਂ ਭਾਸ਼ਾਵਾਂ ਵਿਚ ਅਪਣਾ ਸਵੀਕ੍ਰਿਤੀ ਭਾਸ਼ਣ ਦਿਤਾ, ਜਿਸ ਵਿਚ ਗਾਣੇ ਦੀ ਦੋਭਾਸ਼ੀ ਅਪੀਲ ਨੂੰ ਉਜਾਗਰ ਕੀਤਾ ਗਿਆ।
ਸੰਗੀਤ ਫਿਲਮ ਦਾ ਪੁਰਸਕਾਰ ‘ਮਿਊਜ਼ਿਕ ਫਾਰ ਜੌਨ ਵਿਲੀਅਮਜ਼’ ਨੂੰ ਦਿਤਾ ਗਿਆ, ਜਿਸ ਦਾ ਅਰਥ ਹੈ ਕਿ ਨਿਰਦੇਸ਼ਕ ਸਟੀਵਨ ਸਪੀਲਬਰਗ ਨੇ ਅਧਿਕਾਰਤ ਤੌਰ ਉਤੇ ਅਪਣਾ ਪਹਿਲਾ ਗ੍ਰੈਮੀ ਜਿੱਤਿਆ ਹੈ। ਇਹ ਉਨ੍ਹਾਂ ਨੂੰ ਇਕ ਈ.ਜੀ.ਓ.ਟੀ. ਜੇਤੂ ਬਣਾਉਂਦਾ ਹੈ - ਇਕ ਐਮੀ, ਗ੍ਰੈਮੀ, ਟੋਨੀ ਅਤੇ ਆਸਕਰ ਪੁਰਸਕਾਰ ਜਿੱਤਣ ਵਾਲਾ ਕਲਾਕਾਰ।
ਇਸ ਵੱਕਾਰੀ ਕੌਮਾਂਤਰੀ ਮਾਨਤਾ ਉਤੇ ਪ੍ਰਤੀਕਿਰਿਆ ਦਿੰਦੇ ਹੋਏ ਦਲਾਈ ਲਾਮਾ ਨੇ ਧੰਨਵਾਦ ਅਤੇ ਨਿਮਰਤਾ ਦਾ ਪ੍ਰਗਟਾਵਾ ਕਰਦਿਆਂ ਕਿਹਾ ਕਿ ਉਹ ਇਸ ਪੁਰਸਕਾਰ ਨੂੰ ਨਿੱਜੀ ਪ੍ਰਾਪਤੀ ਵਜੋਂ ਨਹੀਂ ਵੇਖਦੇ । ਦਲਾਈ ਲਾਮਾ ਨੇ ਅਪਣੀ ਜਿੱਤ ਨੂੰ ਕੋਈ ਨਿੱਜੀ ਪ੍ਰਾਪਤੀ ਨਹੀਂ ਦਸਿਆ ਅਤੇ ਕਿਹਾ ਕਿ ਇਹ ਇਕ ਸਾਂਝੀ ਵਿਸ਼ਵਵਿਆਪੀ ਜ਼ਿੰਮੇਵਾਰੀ ਦੀ ਮਾਨਤਾ ਹੈ। ਉਨ੍ਹਾਂ ਕਿਹਾ, ‘‘ਮੈਂ ਇਹ ਮਾਨਤਾ ਸ਼ੁਕਰਗੁਜ਼ਾਰੀ ਅਤੇ ਨਿਮਰਤਾ ਨਾਲ ਪ੍ਰਾਪਤ ਕਰਦਾ ਹਾਂ। ਮੈਂ ਇਸ ਨੂੰ ਨਿੱਜੀ ਚੀਜ਼ ਵਜੋਂ ਨਹੀਂ ਦੇਖਦਾ, ਬਲਕਿ ਸਾਡੀ ਸਾਂਝੀ ਵਿਸ਼ਵਵਿਆਪੀ ਜ਼ਿੰਮੇਵਾਰੀ ਦੀ ਮਾਨਤਾ ਵਜੋਂ ਵੇਖਦਾ ਹਾਂ।’’
ਉਨ੍ਹਾਂ ਕਿਹਾ, ‘‘ਮੇਰਾ ਦ੍ਰਿੜ੍ਹਤਾ ਨਾਲ ਵਿਸ਼ਵਾਸ ਹੈ ਕਿ ਸ਼ਾਂਤੀ, ਦਇਆ, ਸਾਡੇ ਵਾਤਾਵਰਣ ਦੀ ਦੇਖਭਾਲ, ਅਤੇ ਮਨੁੱਖਤਾ ਦੀ ਏਕਤਾ ਦੀ ਸਮਝ ਸਾਰੇ ਅੱਠ ਅਰਬ ਮਨੁੱਖਾਂ ਦੀ ਸਮੂਹਕ ਭਲਾਈ ਲਈ ਜ਼ਰੂਰੀ ਹੈ। ਮੈਂ ਸ਼ੁਕਰਗੁਜ਼ਾਰ ਹਾਂ ਕਿ ਇਹ ਗ੍ਰੈਮੀ ਮਾਨਤਾ ਇਨ੍ਹਾਂ ਸੰਦੇਸ਼ਾਂ ਨੂੰ ਵਧੇਰੇ ਵਿਆਪਕ ਤੌਰ ਉਤੇ ਫੈਲਾਉਣ ਵਿਚ ਸਹਾਇਤਾ ਕਰ ਸਕਦੀ ਹੈ।’’
ਚੀਨ ਨੇ ਦਲਾਈ ਲਾਮਾ ਲਈ ਗ੍ਰੈਮੀ ਐਵਾਰਡ ਦੀ ਕੀਤੀ ਆਲੋਚਨਾ
ਬੀਜਿੰਗ: ਚੀਨ ਨੇ ਦਲਾਈ ਲਾਮਾ ਨੂੰ ਦਿਤੇ ਗਏ ਗ੍ਰੈਮੀ ਪੁਰਸਕਾਰ ਦੀ ਨਿੰਦਾ ਕਰਦਿਆਂ ਕਿਹਾ ਕਿ ਉਹ ਤਿੱਬਤੀ ਅਧਿਆਤਮਕ ਆਗੂ ਨੂੰ ਚੀਨ ਵਿਰੋਧੀ ਗਤੀਵਿਧੀਆਂ ਨੂੰ ਅੰਜਾਮ ਦੇਣ ਲਈ ਇਸ ਮਾਨਤਾ ਦੀ ਵਰਤੋਂ ਕਰਨ ਦਾ ਸਖਤ ਵਿਰੋਧ ਕਰਦਾ ਹੈ। ਦਲਾਈ ਲਾਮਾ ਦੇ ਪੁਰਸਕਾਰ ਜਿੱਤਣ ਉਤੇ ਉਨ੍ਹਾਂ ਦੀ ਪ੍ਰਤੀਕਿਰਿਆ ਬਾਰੇ ਪੁੱਛੇ ਜਾਣ ਉਤੇ ਚੀਨੀ ਵਿਦੇਸ਼ ਮੰਤਰਾਲੇ ਦੇ ਬੁਲਾਰੇ ਲਿਨ ਜਿਆਨ ਨੇ ਚੀਨ ਦੇ ਦੋਸ਼ ਨੂੰ ਦੁਹਰਾਇਆ ਕਿ 90 ਸਾਲ ਦੇ ਅਧਿਆਤਮਕ ਆਗੂ ਧਰਮ ਦੇ ਨਾਂ ਉਤੇ ਵੱਖਵਾਦੀ ਗਤੀਵਿਧੀਆਂ ਕਰ ਰਹੇ ਹਨ। ਲਿਨ ਨੇ ਇੱਥੇ ਇਕ ਮੀਡੀਆ ਬ੍ਰੀਫਿੰਗ ਵਿਚ ਕਿਹਾ ਕਿ ਦਲਾਈ ਲਾਮਾ ਪੂਰੀ ਤਰ੍ਹਾਂ ਧਾਰਮਕ ਵਿਅਕਤੀ ਨਹੀਂ ਹਨ। ਉਨ੍ਹਾਂ ਕਿਹਾ, ‘‘ਉਹ ਇਕ ਸਿਆਸੀ ਜਲਾਵਤਨੀ ਹੈ ਜੋ ਧਰਮ ਦੇ ਨਾਂ ਉਤੇ ਚੀਨ ਵਿਰੋਧੀ ਵੱਖਵਾਦੀ ਗਤੀਵਿਧੀਆਂ ਲਈ ਵਚਨਬੱਧ ਹੈ।’’ ਉਨ੍ਹਾਂ ਕਿਹਾ ਕਿ ਬੀਜਿੰਗ ਸਬੰਧਤ ਪੱਖਾਂ ਦਾ ਸਖਤ ਵਿਰੋਧ ਕਰਦਾ ਹੈ ਕਿ ਉਹ ਇਸ ਪੁਰਸਕਾਰ ਨੂੰ ਚੀਨ ਵਿਰੋਧੀ ਗਤੀਵਿਧੀਆਂ ਨੂੰ ਅੰਜਾਮ ਦੇਣ ਲਈ ਇਕ ਸਾਧਨ ਵਜੋਂ ਵਰਤ ਰਹੇ ਹਨ। ਦਲਾਈ ਲਾਮਾ, ਜੋ 1959 ਵਿਚ ਤਿੱਬਤ ਛੱਡਣ ਤੋਂ ਬਾਅਦ ਧਰਮਸ਼ਾਲਾ ਵਿਚ ਜਲਾਵਤਨੀ ਵਿਚ ਰਹਿ ਰਹੇ ਹਨ, ਨੂੰ ਤਿੱਬਤ ਨੂੰ ਆਜ਼ਾਦ ਕਰਵਾਉਣ ਲਈ ਉਨ੍ਹਾਂ ਦੇ ਨਿਰੰਤਰ, ਅਹਿੰਸਕ ਸੰਘਰਸ਼ ਲਈ 1989 ਵਿਚ ਨੋਬਲ ਸ਼ਾਂਤੀ ਪੁਰਸਕਾਰ ਨਾਲ ਸਨਮਾਨਿਤ ਕੀਤਾ ਗਿਆ ਸੀ।
