ਸਟੈਂਪ ਪੇਪਰ ਖਰੀਦਣ ਜਾ ਰਹੇ ਵਿਅਕਤੀ ਨਾਲ ਵਾਪਰੀ ਘਟਨਾ, ਬਾਂਦਰ ਨੇ ਨੋਟਾਂ ਵਾਲਾ ਬੈਗ ਵਿਅਕਤੀ ਤੋਂ ਖੋਹ ਲਿਆ ਅਤੇ ਇਕ ਰੁੱਖ ਉਤੇ ਬੈਠ ਕੇ ਪੈਸੇ ਹੇਠਾਂ ਸੁੱਟ ਦਿੱਤੇ
ਬੁਲੰਦਸ਼ਹਿਰ (ਯੂ.ਪੀ.): ਇੱਥੋਂ ਦੇ ਜ਼ਿਲ੍ਹਾ ਅਦਾਲਤ ਕੰਪਲੈਕਸ ਵਿਚ ਇਕ ਬਾਂਦਰ ਨੇ ਇਕ ਵਿਅਕਤੀ ਕੋਲੋਂ ਕਰੀਬ 2 ਲੱਖ ਰੁਪਏ ਵਾਲਾ ਬੈਗ ਖੋਹ ਲਿਆ ਅਤੇ ਬਾਅਦ ਵਿਚ ਇਕ ਰੁੱਖ ਉਤੇ ਬੈਠ ਕੇ ਉਸ ਨੂੰ ਪਾੜ ਦਿਤਾ, ਜਿਸ ਕਾਰਨ ਕਰੰਸੀ ਨੋਟਾਂ ਦਾ ਮੀਂਹ ਵਰ੍ਹਨ ਲੱਗਾ। ਇਸ ਘਟਨਾ ਦੀ ਇਕ ਵੀਡੀਉ ਵੀ ਸੋਸ਼ਲ ਮੀਡੀਆ ਉਤੇ ਸਾਹਮਣੇ ਆਈ ਹੈ।
ਐਡਵੋਕੇਟ ਸੋਹਨਪਾਲ ਮੁਤਾਬਕ ਰਵਿੰਦਰ ਸਨਿਚਰਵਾਰ ਨੂੰ ਸਟੈਂਪ ਪੇਪਰ ਖਰੀਦਣ ਜਾ ਰਿਹਾ ਸੀ ਅਤੇ ਉਸ ਦੇ ਬੈਗ ’ਚ ਕਰੀਬ 2 ਲੱਖ ਰੁਪਏ ਸਨ। ਉਸ ਦੇ ਨਾਲ ਉਸ ਦਾ ਸਾਥੀ ਆਮਿਰ ਵੀ ਸੀ। ਜਦੋਂ ਬਾਂਦਰ ਨੇ ਅਚਾਨਕ ਬੈਗ ਖੋਹ ਲਿਆ ਅਤੇ ਅਦਾਲਤ ਦੇ ਅੰਦਰ ਲੱਗੇ ਇਕ ਰੁੱਖ ਉਤੇ ਚੜ੍ਹ ਗਿਆ। ਉਨ੍ਹਾਂ ਦਸਿਆ ਕਿ ਬਾਂਦਰ ਨੇ ਫਿਰ ਬੈਗ ਨੂੰ ਪਾੜ ਦਿਤਾ ਅਤੇ ਕਰੰਸੀ ਨੋਟਾਂ ਨੂੰ ਬਾਹਰ ਸੁੱਟਣਾ ਸ਼ੁਰੂ ਕਰ ਦਿਤਾ।
ਰੁੱਖ ਦੇ ਹੇਠਾਂ ਲੋਕ ਇਕੱਠੇ ਹੋ ਗਏ ਅਤੇ ਜ਼ਮੀਨ ਉਤੇ ਨੋਟ ਡਿੱਗਦੇ ਵੇਖ ਕੇ ਹੈਰਾਨ ਰਹਿ ਗਏ। ਉਨ੍ਹਾਂ ਨੇ ਖਿੱਲਰੇ ਹੋਏ ਪੈਸੇ ਇਕੱਠੇ ਕੀਤੇ ਅਤੇ ਰਵਿੰਦਰ ਨੂੰ ਵਾਪਸ ਕਰਨ ਵਿਚ ਮਦਦ ਕੀਤੀ। ਮੌਕੇ ਉਤੇ ਮੌਜੂਦ ਲੋਕਾਂ ਮੁਤਾਬਕ ਨਕਦੀ ਦੇ ਨੁਕਸਾਨ ਦੀ ਕੋਈ ਰੀਪੋਰਟ ਨਹੀਂ ਹੈ।
