ਦੱਖਣੀ ਅਫ਼ਰੀਕਾ ਨੇ 76 ਦੌੜਾਂ ਨਾਲ ਹਰਾਇਆ
ਅਹਿਮਦਾਬਾਦ: ਟੀ20 ਵਿਸ਼ਵ ਕੱਪ ’ਚ ਭਾਰਤੀ ਕ੍ਰਿਕਟ ਟੀਮ ਨੂੰ ਵੱਡਾ ਝਟਕਾ ਲਗਿਆ ਹੈ। ਟੂਰਨਾਮੈਂਟ ’ਚ ਉਸ ਦੀ ਪਹਿਲੀ ਹਾਰ ਹੋਈ ਹੈ। ਅਹਿਮਦਾਬਾਦ ਦੇ ਨਰਿੰਦਰ ਮੋਦੀ ਕ੍ਰਿਕਟ ਸਟੇਡੀਅਮ ’ਚ ਅਪਣਾ ਪਹਿਲਾ ਸੁਪਰ-8 ਮੈਚ ਖੇਡਦਿਆਂ ਭਾਰਤ ਦੀ ਟੀਮ ਦਖਣੀ ਅਫ਼ਰੀਕਾ ਤੋਂ 76 ਦੌੜਾਂ ਨਾਲ ਹਾਰ ਗਈ। ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ ਕਮਜ਼ੋਰ ਸ਼ੁਰੂਆਤ ਦੇ ਬਾਵਜੂਦ ਦਖਣੀ ਅਫ਼ਰੀਕਾ ਦੀ ਟੀਮ ਨੇ 187 ਦੌੜਾਂ ਦਾ ਮਜ਼ਬੂਤ ਸਕੋਰ ਖੜ੍ਹਾ ਕੀਤਾ। ਡੇਵਿਡ ਮਿੱਲਰ ਨੇ 35 ਗੇਂਦਾਂ ’ਤੇ ਸ਼ਾਨਦਾਰ 63 ਦੌੜਾਂ ਬਣਾਈਆਂ। ਨਵੇਂ ਖਿਡਾਰੀ ਡੀਵਾਲਡ ਬਰੇਵਿਸ ਨੇ 29 ਗੇਂਦਾਂ ’ਚ 45 ਦੌੜਾਂ ਬਣਾ ਕੇ ਉਨ੍ਹਾਂ ਦੀ ਵਧੀਆ ਸਾਥ ਦਿਤਾ। ਪਹਿਲਾਂ ਗੇਂਦਬਾਜ਼ੀ ਕਰਦਿਆਂ ਭਾਰਤ ਨੇ ਸ਼ਾਨਦਾਰ ਸ਼ੁਰੂਆਤ ਕੀਤੀ ਸੀ। ਜਸਪ੍ਰੀਤ ਬੁਮਰਾਹ ਨੇ ਅਪਣੇ ਚਾਰ ਓਵਰਾਂ ’ਚ ਸਿਰਫ਼ 15 ਦੌੜਾਂ ਦੇ ਕੇ ਤਿੰਨ ਵਿਕਟਾਂ ਲਈਆਂ ਜਦਕਿ ਅਰਸ਼ਦੀਪ ਸਿੰਘ ਨੇ 28 ਦੌੜਾਂ ਦੇ ਕੇ ਦੋ ਵਿਕਟਾਂ ਲਈਆਂ। ਪਰ ਇਸ ਤੋਂ ਬਾਅਦ ਮਿੱਲਰ ਅਤੇ ਬਰੇਵਿਸ ਨੇ ਪਾਰੀ ਨੂੰ ਸੰਭਾਲਿਆ। ਦੋਹਾਂ ਦੀ ਸਿਰਫ਼ 51 ਗੇਂਦਾਂ ’ਚ 97 ਦੌੜਾਂ ਦੀ ਸਾਂਝੇਦਾਰੀ ਨੇ ਟੀਮ ਦੀ ਤਿੰਨ ਵਿਕਟਾਂ ’ਤੇ 20 ਦੌੜਾਂ ਨਾਲ ਲੜਖੜਾਈ ਪਾਰੀ ਨੂੰ ਮਜ਼ਬੂਤੀ ਪ੍ਰਦਾਨ ਕੀਤੀ। ਅਖ਼ੀਰਲੇ ਓਵਰਾਂ ’ਚ ਟਰਿਸਟਟਨ ਸਟੱਬਸ ਨੇ 24 ਗੇਂਦਾਂ ’ਚ 44 ਦੌੜਾਂ ਬਣਾ ਕੇ ਟੀਮ ਨੂੰ 187 ਦੇ ਵਿਸ਼ਾਲ ਸਕੋਰ ਤਕ ਪਹੁੰਚਾਇਆ।
ਡੇਵਿਡ ਮਿੱਲਰ ‘ਪਲੇਅਰ ਆਫ਼ ਦ ਮੈਚ ਵੀ ਰਹੇ’। ਜਵਾਬ ’ਚ ਭਾਰਤੀ ਟੀਮ ਦੀ ਸ਼ੁਰੂਆਤ ਵੀ ਮਾੜੀ ਰਹੀ ਅਤੇ 51 ਦੌੜਾਂ ’ਤੇ ਹੀ ਉਸ ਦੀਆਂ ਪੰਜ ਵਿਕਟਾਂ ਡਿੱਗ ਗਈਆਂ। ਸਲਾਮੀ ਬੱਲੇਬਾਜ਼ ਇਸ਼ਾਨ ਕਿਸ਼ਨ ਸਿਫ਼ਰ ਦੇ ਸਕੋਰ ’ਤੇ ਆਊਟ ਹੋਏ। ਹਾਲਾਂਕਿ ਕਾਫ਼ੀ ਮੈਚਾਂ ਵਿਚ ਸਿਫ਼ਰ ’ਤੇ ਆਊਟ ਹੋ ਰਹੇ ਅਭਿਸ਼ੇਕ ਸ਼ਰਮਾ ਨੇ 15 ਦੌੜਾਂ ਬਣਾਈਆਂ। ਕਪਤਾਨ ਸੂਰਿਆ ਕੁਮਾਰ ਯਾਦਵ ਅਤੇ ਹਾਰਦਿਕ ਪਾਂਡਿਆ 18-18 ਦੌੜਾਂ ਬਣਾ ਕੇ ਆਊਟ ਹੋਏ। ਭਾਰਤ ਵਲੋਂ ਸਭ ਤੋਂ ਜ਼ਿਆਦਾ ਦੌੜਾਂ ਸ਼ਿਵਮ ਦੂਬੇ (42) ਨੇ ਬਣਾਈਆਂ। ਪੂਰੀ ਟੀਮ 111 ਦੌੜਾਂ ’ਤੇ ਆਊਟ ਹੋ ਗਈ। ਦਖਣੀ ਅਫ਼ਰੀਕਾ ਵਲੋਂ ਮਾਰਕੋ ਜੈਨਸਨ ਨੇ ਸਿਰਫ਼ 22 ਦੌੜਾਂ ਦੇ ਕੇ ਸਭ ਤੋਂ ਜ਼ਿਆਦਾ ਚਾਰ ਵਿਕਟਾਂ ਲਈਆਂ। ਭਾਰਤ ਦਾ ਅਗਲਾ ਮੈਚ ਵੀਰਵਾਰ ਨੂੰ ਜ਼ਿੰਬਾਬਵੇ ਨਾਲ ਹੋਵੇਗਾ।
