ਏਡਨ ਮਾਰਕਰਮ ਨੇ ਬਣਾਈਆਂ ਨਾਬਾਦ 86 ਦੌੜਾਂ
ਅਹਿਮਦਾਬਾਦ : ਦੱਖਣੀ ਅਫਰੀਕਾ ਨੇ ਟੀ-20 ਵਿਸ਼ਵ ਕੱਪ 2026 ਵਿੱਚ ਲਗਾਤਾਰ ਤੀਜੀ ਜਿੱਤ ਹਾਸਲ ਕੀਤੀ ਹੈ। ਟੀਮ ਨੇ ਸ਼ਨੀਵਾਰ ਨੂੰ ਤੀਜੇ ਮੈਚ ਵਿੱਚ ਨਿਊਜ਼ੀਲੈਂਡ ਨੂੰ 3 ਵਿਕਟਾਂ ਨਾਲ ਹਰਾਇਆ। ਇਸ ਜਿੱਤ ਦੇ ਨਾਲ ਟੀਮ ਗਰੁੱਪ ਡੀ ਦੀ ਸੂਚੀ ਵਿੱਚ ਪਹਿਲੇ ਸਥਾਨ 'ਤੇ ਆ ਗਈ ਹੈ । ਜਦੋਂਕਿ ਨਿਊਜ਼ੀਲੈਂਡ ਦੂਜੇ ਸਥਾਨ 'ਤੇ ਹੈ । ਦੱਖਣੀ ਅਫਰੀਕਾ ਨੇ ਅਹਿਮਦਾਬਾਦ ਦੇ ਨਰਿੰਦਰ ਮੋਦੀ ਸਟੇਡੀਅਮ ਵਿੱਚ ਟਾਸ ਜਿੱਤ ਕੇ ਗੇਂਦਬਾਜ਼ੀ ਕਰਨ ਦਾ ਫੈਸਲਾ ਕੀਤਾ । ਨਿਊਜ਼ੀਲੈਂਡ ਨੇ 20 ਓਵਰਾਂ ਵਿੱਚ 7 ਵਿਕਟਾਂ 'ਤੇ 175 ਦੌੜਾਂ ਬਣਾਈਆਂ। ਅਫਰੀਕੀ ਟੀਮ ਨੇ 176 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਦਿਆਂ 17.1 ਓਵਰਾਂ ਵਿੱਚ 3 ਵਿਕਟਾਂ 'ਤੇ ਜਿੱਤ ਪ੍ਰਾਪਤ ਕੀਤੀ ਅਤੇ ਡੇਵਿਡ ਮਿਲਰ ਨੇ ਛੱਕਾ ਮਾਰ ਕੇ ਟੀਮ ਨੂੰ ਜਿੱਤ ਦਿਵਾਈ। ਜਦੋਂ ਕਿ ਏਡਨ ਮਾਰਕਰਾਮ ਨੇ 86 ਦੌੜਾਂ ਦੀ ਨਾਬਾਦ ਪਾਰੀ ਖੇਡੀ। ਉਨ੍ਹਾਂ 44 ਗੇਂਦਾਂ ਦੀ ਆਪਣੀ ਪਾਰੀ ਵਿੱਚ 8 ਚੌਕੇ ਅਤੇ 4 ਛੱਕੇ ਲਗਾਏ।
ਮਿਲਰ ਨੇ ਨਾਬਾਦ 24 ਦੌੜਾਂ ਬਣਾਈਆਂ। ਡਿਵਾਲਡ ਬ੍ਰੀਵਿਸ (21 ਦੌੜਾਂ) ਨੂੰ ਰਾਚਿਨ ਰਵਿੰਦਰ, ਰਿਆਨ ਰਿਕਲਟਨ (21 ਦੌੜਾਂ) ਨੂੰ ਜਿੰਮੀ ਨੀਸ਼ਮ ਅਤੇ ਕੁਇੰਟਨ ਡੀ ਕੌਕ (20 ਦੌੜਾਂ) ਨੂੰ ਲੌਕੀ ਫਰਗੂਸਨ ਨੇ ਆਊਟ ਕੀਤਾ। ਕੀਵੀਆਂ ਵੱਲੋਂ ਮਾਰਕ ਚੈਪਮੈਨ ਨੇ ਸਭ ਤੋਂ ਵੱਧ 48 ਦੌੜਾਂ ਬਣਾਈਆਂ। ਡੈਰਿਲ ਮਿਸ਼ੇਲ ਨੇ 32 ਦੌੜਾਂ ਦਾ ਯੋਗਦਾਨ ਪਾਇਆ, ਜਦਕਿ ਫਿਨ ਐਲਨ ਨੇ 31 ਦੌੜਾਂ ਜੋੜੀਆਂ। ਮਾਰਕੋ ਜੈਨਸਨ ਨੇ ਚਾਰ ਵਿਕਟਾਂ ਲਈਆਂ।
