50 ਓਵਰਾਂ ਦੇ ਫਾਰਮੈਟ 'ਚ ਹੋਵੇਗਾ ਟੂਰਨਾਮੈਂਟ,
ਦੁਬਈ: ਏਸ਼ੀਅਨ ਕ੍ਰਿਕਟ ਕੌਂਸਲ (ACC) ਨੇ ਅੰਡਰ-19 ਏਸ਼ੀਆ ਕੱਪ 2026 ਦੇ ਸ਼ਡਿਊਲ ਦਾ ਐਲਾਨ ਕਰ ਦਿੱਤਾ ਹੈ। ਇਹ ਟੂਰਨਾਮੈਂਟ 5 ਨਵੰਬਰ ਤੋਂ ਓਮਾਨ ਵਿੱਚ ਸ਼ੁਰੂ ਹੋਵੇਗਾ ਅਤੇ ਇਸ ਦਾ ਫਾਈਨਲ ਮੁਕਾਬਲਾ 14 ਨਵੰਬਰ ਨੂੰ ਖੇਡਿਆ ਜਾਵੇਗਾ। ਇਸ ਵਾਰ ਖ਼ਿਤਾਬ ਲਈ 8 ਟੀਮਾਂ ਮੈਦਾਨ ਵਿੱਚ ਉਤਰਨਗੀਆਂ। ਸਾਰੇ ਮੈਚ ਮਸਕਟ ਸਥਿਤ ਓਮਾਨ ਕ੍ਰਿਕਟ ਅਕੈਡਮੀ (OCA) ਦੇ ਗਰਾਊਂਡ-1 ਅਤੇ ਗਰਾਊਂਡ-2 'ਤੇ ਖੇਡੇ ਜਾਣਗੇ।
ਭਾਰਤ ਦਾ ਸ਼ਡਿਊਲ
ਭਾਰਤੀ ਟੀਮ ਆਪਣੀ ਮੁਹਿੰਮ ਦੀ ਸ਼ੁਰੂਆਤ 6 ਨਵੰਬਰ ਨੂੰ ਨੇਪਾਲ ਵਿਰੁੱਧ ਕਰੇਗੀ। ਇਸ ਤੋਂ ਬਾਅਦ 8 ਨਵੰਬਰ ਨੂੰ ਭਾਰਤ ਦਾ ਸਾਹਮਣਾ ਚਿਰ-ਪ੍ਰਤੀਦੰਦੀ ਪਾਕਿਸਤਾਨ ਨਾਲ ਹੋਵੇਗਾ। ਗਰੁੱਪ ਸਟੇਜ ਵਿੱਚ ਭਾਰਤ ਦਾ ਆਖਰੀ ਮੈਚ 10 ਨਵੰਬਰ ਨੂੰ ਯੂ.ਏ.ਈ. (UAE) ਵਿਰੁੱਧ ਖੇਡਿਆ ਜਾਵੇਗਾ।
ਟੂਰਨਾਮੈਂਟ ਦਾ ਫਾਰਮੈਟ ਅਤੇ ਗਰੁੱਪ
ਇਹ ਟੂਰਨਾਮੈਂਟ 50-ਓਵਰਾਂ ਦੇ ਫਾਰਮੈਟ ਵਿੱਚ ਖੇਡਿਆ ਜਾਵੇਗਾ, ਜਿਸ ਵਿੱਚ ਕੁੱਲ 15 ਮੁਕਾਬਲੇ ਹੋਣਗੇ। ਟੀਮਾਂ ਨੂੰ ਦੋ ਗਰੁੱਪਾਂ ਵਿੱਚ ਵੰਡਿਆ ਗਿਆ ਹੈ:
ਗਰੁੱਪ-ਏ: ਭਾਰਤ, ਪਾਕਿਸਤਾਨ, ਯੂ.ਏ.ਈ. (UAE) ਅਤੇ ਨੇਪਾਲ
ਗਰੁੱਪ-ਬੀ: ਬੰਗਲਾਦੇਸ਼, ਅਫ਼ਗਾਨਿਸਤਾਨ, ਸ਼੍ਰੀਲੰਕਾ ਅਤੇ ਮਲੇਸ਼ੀਆ
ਟੂਰਨਾਮੈਂਟ ਦਾ ਉਦਘਾਟਨੀ ਮੈਚ 5 ਨਵੰਬਰ ਨੂੰ ਸ਼੍ਰੀਲੰਕਾ U-19 ਅਤੇ ਮਲੇਸ਼ੀਆ U-19 ਟੀਮਾਂ ਵਿਚਾਲੇ ਹੋਵੇਗਾ। ਇਸੇ ਦਿਨ ਗਰੁੱਪ-ਬੀ ਵਿੱਚ ਬੰਗਲਾਦੇਸ਼ ਅਤੇ ਅਫ਼ਗਾਨਿਸਤਾਨ ਦੀਆਂ ਟੀਮਾਂ ਵੀ ਆਹਮੋ-ਸਾਹਮਣੇ ਹੋਣਗੀਆਂ। ਦੋਵੇਂ ਮੈਚ ਸਵੇਰੇ 10:30 ਵਜੇ ਸ਼ੁਰੂ ਹੋਣਗੇ। ਸ਼੍ਰੀਲੰਕਾ-ਮਲੇਸ਼ੀਆ ਮੈਚ OCA ਗਰਾਊਂਡ-2 ਅਤੇ ਬੰਗਲਾਦੇਸ਼-ਅਫ਼ਗਾਨਿਸਤਾਨ ਮੈਚ OCA ਗਰਾਊਂਡ-1 'ਤੇ ਖੇਡਿਆ ਜਾਵੇਗਾ।
ਜ਼ਿਕਰਯੋਗ ਹੈ ਕਿ ਪਾਕਿਸਤਾਨ ਦੀ ਟੀਮ ਅੰਡਰ-19 ਏਸ਼ੀਆ ਕੱਪ ਦੀ ਮੌਜੂਦਾ ਚੈਂਪੀਅਨ ਹੈ। ਪਿਛਲੇ ਸੀਜ਼ਨ ਦੇ ਫਾਈਨਲ ਵਿੱਚ ਪਾਕਿਸਤਾਨ ਨੇ ਭਾਰਤ ਨੂੰ 191 ਦੌੜਾਂ ਨਾਲ ਹਰਾ ਕੇ ਖ਼ਿਤਾਬ ਆਪਣੇ ਨਾਂ ਕੀਤਾ ਸੀ। ਇਹ ਅੰਡਰ-19 ਏਸ਼ੀਆ ਕੱਪ ਵਿੱਚ ਪਾਕਿਸਤਾਨ ਦਾ ਦੂਜਾ ਖ਼ਿਤਾਬ ਸੀ। ਭਾਰਤ ਨੇ ਅੰਡਰ-19 ਏਸ਼ੀਆ ਕੱਪ ਦੇ ਸਭ ਤੋਂ ਵੱਧ 8 ਖ਼ਿਤਾਬ ਜਿੱਤੇ ਹਨ। ਭਾਰਤ ਨੇ ਇਹ ਟਰਾਫ਼ੀਆਂ 1989, 2003, 2012, 2013-14, 2016, 2018, 2019 ਅਤੇ 2021 ਵਿੱਚ ਆਪਣੇ ਨਾਂ ਕੀਤੀਆਂ। ਸਾਲ 2012 ਵਿੱਚ ਭਾਰਤ ਅਤੇ ਪਾਕਿਸਤਾਨ ਨੂੰ ਸੰਯੁਕਤ ਜੇਤੂ ਐਲਾਨਿਆ ਗਿਆ ਸੀ।
ਬੰਗਲਾਦੇਸ਼ ਦੀਆਂ ਲਗਾਤਾਰ ਜਿੱਤਾਂ: ਬੰਗਲਾਦੇਸ਼ ਨੇ 2023 ਅਤੇ 2024 ਵਿੱਚ ਲਗਾਤਾਰ ਦੋ ਵਾਰ ਟਰਾਫ਼ੀ 'ਤੇ ਕਬਜ਼ਾ ਕੀਤਾ। ਅਫ਼ਗਾਨਿਸਤਾਨ ਦੀ ਟੀਮ ਨੇ ਸਾਲ 2017 ਵਿੱਚ ਪਹਿਲੀ ਵਾਰ ਇਹ ਖ਼ਿਤਾਬ ਜਿੱਤ ਕੇ ਇਤਿਹਾਸ ਰਚਿਆ ਸੀ।
