ਪੰਜਾਬ ਵਿਚ ਕੋਰੋਨਾ ਦਾ ਕਹਿਰ ਜਾਰੀ ਹੈ ਤੇ ਪਿਛਲੇ 24 ਘੰਟਿਆਂ ਦੇ ਸਮੇਂ ਦੌਰਾਨ 10 ਹੋਰ ਮੌਤਾਂ ਹੋ ਗਈਆਂ ਹਨ।
ਚੰਡੀਗੜ੍ਹ, 30 ਜੁਲਾਈ (ਗੁਰਉਪਦੇਸ਼ ਭੁੱਲਰ): ਪੰਜਾਬ ਵਿਚ ਕੋਰੋਨਾ ਦਾ ਕਹਿਰ ਜਾਰੀ ਹੈ ਤੇ ਪਿਛਲੇ 24 ਘੰਟਿਆਂ ਦੇ ਸਮੇਂ ਦੌਰਾਨ 10 ਹੋਰ ਮੌਤਾਂ ਹੋ ਗਈਆਂ ਹਨ। 500 ਤੋਂ ਵੱਧ ਨਵੇਂ ਪਾਜ਼ੇਟਿਵ ਮਾਮਲੇ ਵੀ ਆਏ ਹਨ। ਮੌਤਾਂ ਦੀ ਗਿਣਤੀ ਜਿਥੇ ਹੁਣ 373 ਤਕ ਪਹੁੰਚ ਗਈ ਹੇ, ਉਥੇ ਕੁਲ ਪਾਜ਼ੇਟਿਵ ਕੇਸਾਂ ਦਾ ਅੰਕੜਾ ਵੀ 15450 ਤੋਂ ਪਾਰ ਹੋ ਚੁਕਾ ਹੈ। 10509 ਮਰੀਜ਼ ਹੁਣ ਤਕ ਠੀਕ ਵੀ ਹੋਏ ਹਨ। ਇਸ ਸਮੇਂ ਇਲਾਜ ਅਧੀਨ 4577 ਮਰੀਜ਼ਾਂ ਵਿਚੋਂ 153 ਦੀ ਹਾਲਤ ਗੰਭੀਰ ਹੈ। ਇਨ੍ਹਾਂ ਵਿਚੋਂ 135 ਆਕਸੀਜਨ ਅਤੇ 18 ਵੈਂਟੀਲੇਟਰ ਉਪਰ ਹਨ।
ਇਸ ਸਮੇਂ ਜ਼ਿਲ੍ਹਾ ਲੁਧਿਆਣਾ ਵਿਚ ਸੱਭ ਤੋਂ ਵੱਧ ਨਵੇਂ ਪਾਜ਼ੇਟਿਵ ਮਾਮਲੇ ਆ ਰਹੇ ਹਨ। ਅੱਜ ਵੀ 143 ਮਾਮਲੇ ਆਏ ਹਨ। ਜਲੰਧਰ ਵਿਚ 67 ਤੇ ਅੰਮ੍ਰਿਤਸਰ ਵਿਚ 69 ਮਾਮਲੇ ਆਏ। ਜ਼ਿਕਰਯੋਗ ਹੈ ਕਿ ਅੱਜ ਜ਼ਿਲ੍ਹਾ ਫ਼ਿਰੋਜ਼ਪੁਰ ਵਿਚ ਕੋਰੋਨਾ ਧਮਾਕਾ ਹੋਇਆ ਜਿਥੇ 73 ਹੋਰ ਪਾਜ਼ੇਟਿਵ ਮਾਮਲੇ ਆਏ ਹਨ। ਅੱਜ ਹੋਈਆਂ ਮੌਤਾਂ ਵਿਚੋਂ 4 ਮਾਮਲੇ ਜ਼ਿਲ੍ਹਾ ਲੁਧਿਆਣਾ, 3 ਜਲੰਧਰ ਅਤੇ 1-1 ਅੰਮ੍ਰਿਤਸਰ, ਪਟਿਆਲਾ ਤੇ ਹੁਸ਼ਿਆਰਪੁਰ ਨਾਲ ਸਬੰਧਤ ਹੈ। ਕੁਲ ਪਾਜ਼ੇਟਿਵ ਅੰਕੜੇ 'ਤੇ ਨਜ਼ਰ ਮਾਰੀਏ ਤਾਂ ਲੁਧਿਆਣਾ ਜ਼ਿਲ੍ਹੇ ਵਿਚ 3000 ਮਾਮਲਿਆਂ ਦੇ ਨੇੜੇ ਗਿਣਤੀ ਪਹੁੰਚ ਚੁਕੀ ਹੈ। ਜਲੰਧਰ 2225 ਤੇ ਅੰਮ੍ਰਿਤਸਰ ਇਹ ਅੰਕੜਾ 1799 ਹੈ। ਮੌਤਾਂ ਵਿਚ ਵੀ ਪਾਜ਼ੇਟਿਵ ਅੰਕੜਿਆਂ ਦੇ ਨਾਲ ਹੀ ਜ਼ਿਲ੍ਹਾ ਲੁਧਿਆਣਾ ਸੱਭ ਤੋਂ ਉਪਰ ਆ ਚੁਕਾ ਹੈ। ਇਥੇ ਹੁਣ ਤਕ 83 ਮੌਤਾਂ ਹੋਈਆਂ ਹਨ। ਇਸ ਤੋਂ ਬਾਅਦ ਅੰਮ੍ਰਿਤਸਰ ਜ਼ਿਲ੍ਹੇ ਵਿਚ 76 ਤੇ ਜਲੰਧਰ ਵਿਚ 52 ਮੌਤਾਂ ਹੋਈਆਂ ਹਨ।
