ਸੀਮਾ ਸੁਰੱਖਿਆ ਬਲ ਨੇ ਐਤਵਾਰ ਦੇਰ ਸ਼ਾਮ ਫਿਰੋਜ਼ਪੁਰ ਜ਼ਿਲ੍ਹੇ ਦੇ ਸਰਹੱਦੀ ਖੇਤਰ ਵਿਚ ਦੋ ਘੁਸਪੈਠੀਆਂ ਨੂੰ ਫੜਿਆ ਹੈ। ਜਾਣਕਾਰੀ ਦੇ ਮੁਤਾਬਕ ਇਹ ਦੋਵੇਂ ਪਾਕਿਸਤਾਨੀ...
ਫਿਰੋਜ਼ਪੁਰ (ਪੀਟੀਆਈ) : ਸੀਮਾ ਸੁਰੱਖਿਆ ਬਲ ਨੇ ਐਤਵਾਰ ਦੇਰ ਸ਼ਾਮ ਫਿਰੋਜ਼ਪੁਰ ਜ਼ਿਲ੍ਹੇ ਦੇ ਸਰਹੱਦੀ ਖੇਤਰ ਵਿਚ ਦੋ ਘੁਸਪੈਠੀਆਂ ਨੂੰ ਫੜਿਆ ਹੈ। ਜਾਣਕਾਰੀ ਦੇ ਮੁਤਾਬਕ ਇਹ ਦੋਵੇਂ ਪਾਕਿਸਤਾਨੀ ਫੌਜ ਦੇ ਕਰਮਚਾਰੀ ਦੱਸੇ ਜਾ ਰਹੇ ਹਨ। ਦੋਵਾਂ ਕੋਲੋਂ ਪਾਕਿਸਤਾਨੀ ਫੌਜ ਦੇ ਆਈਡੀ ਕਾਰਡ, ਪਾਕਿ ਕਰੰਸੀ ਅਤੇ ਉਥੋਂ ਦੇ ਦੋ ਮੋਬਾਇਲ ਫ਼ੋਨ ਵੀ ਬਰਾਮਦ ਕੀਤੇ ਗਏ ਹਨ। ਦੋਵਾਂ ਨੂੰ ਫੜ ਕੇ ਸੁਰੱਖਿਆ ਬਲਾਂ ਦੇ ਮੁੱਖ ਦਫ਼ਤਰ ਵਿਚ ਲਿਜਾਇਆ ਗਿਆ ਹੈ।
BSFਸੀਮਾ ਸੁਰੱਖਿਆ ਬਲ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਐਤਵਾਰ ਦੇਰ ਸ਼ਾਮ ਮਮਦੋਟ ਇਲਾਕੇ ਵਿਚ ਦੋਵਾਂ ਨੂੰ ਤੇਲੂ ਮਲ ਚੈੱਕ ਪੋਸਟ ‘ਤੇ ਤੈਨਾਤ 29ਵੀਂ ਬਟਾਲੀਅਨ ਦੇ ਜਵਾਨਾਂ ਨੇ ਬੀਪੀ 194 ਦੇ ਕੋਲ ਦੋ ਪਾਕਿ ਨਾਗਰਿਕਾਂ ਨੂੰ ਭਾਰਤੀ ਸਰਹੱਦ ਵਿਚ ਦਾਖ਼ਲ ਹੁੰਦੇ ਹੋਏ ਵੇਖਿਆ। ਇਨ੍ਹਾਂ ਨੂੰ ਰੁਕ ਜਾਣ ਲਈ ਅਲਰਟ ਕੀਤਾ ਅਤੇ ਤੁਰਤ ਆਈਬੀ ਵਲੋਂ 300 ਮੀਟਰ ਦੀ ਦੂਰੀ ‘ਤੇ ਇਨ੍ਹਾਂ ਨੂੰ ਫੜ ਲਿਆ ਗਿਆ।
ਪੁੱਛਗਿਛ ਕਰਨ ‘ਤੇ ਫੜੇ ਗਏ ਦੋਵਾਂ ਨੌਜਵਾਨਾਂ ਦੀ ਪਹਿਚਾਣ ਮੰਸੂਰ ਦੇ ਰਹਿਣ ਵਾਲੇ 31 ਸਾਲ ਦਾ ਸਿਰਾਜ ਅਹਿਮਦ (ਪਾਕਿਸਤਾਨੀ ਫੌਜ ਵਿਚ ਬਲੋਚ ਰੈਜੀਮੈਂਟ ਵਿਚ ਸਿਪਾਹੀ) ਅਤੇ ਅਤਕ ਮਤੀਹਾਲ ਦਾ ਰਹਿਣ ਵਾਲਾ 36 ਸਾਲ ਦਾ ਮੁਮਤਾਜ ਖਾਨ (ਬਲੋਚ ਰੈਜੀਮੈਂਟ ਵਿਚ ਹਵਲਦਾਰ) ਦੇ ਰੂਪ ਵਿਚ ਹੋਈ ਹੈ। ਮੁਮਤਾਜ ਖਾਨ ਕੋਲੋਂ 3660 ਰੁਪਏ ਦੀ ਪਾਕਿ ਕਰੰਸੀ, 1 ਨੋਕੀਆ ਮੋਬਾਇਲ ਫ਼ੋਨ ਅਤੇ 1 ਪਾਕਿ ਸਿਮ ਬਰਾਮਦ ਹੋਈ ਹੈ।
ਸਿਰਾਜ ਕੋਲੋਂ ਪਾਕਿ ਫੌਜ ਦੇ 2 ਪਰਸਨਲ ਆਈਡੀ ਕਾਰਡ, 4 ਫੋਟੋਆਂ, 2 ਮੋਬਾਇਲ ਫ਼ੋਨ ਅਤੇ 1040 ਰੁਪਏ ਦੀ ਪਾਕਿ ਕਰੰਸੀ ਬਰਾਮਦ ਹੋਈ ਹੈ। ਇਸ ਦੇ ਚਲਦੇ ਇਨ੍ਹਾਂ ਦੋਵਾਂ ਨੂੰ ਤੁਰਤ ਹਿਰਾਸਤ ਵਿਚ ਲੈਣ ਤੋਂ ਬਾਅਦ ਬੀਐਸਐਫ ਦੇ ਮੁੱਖ ਦਫ਼ਤਰ ਵਿਚ ਲਿਜਾਇਆ ਗਿਆ ਹੈ। ਇਥੇ ਵੱਖ-ਵੱਖ ਸੁਰੱਖਿਆ ਏਜੰਸੀਆਂ ਦੋਵਾਂ ਤੋਂ ਪੁੱਛਗਿਛ ਕਰ ਰਹੀ ਹਨ।
