ਪੀਐੱਸਪੀਸੀਐਲ ਦੀਆਂ ਇਨਫ਼ੋਰਸਮੈਂਟ ਟੀਮਾਂ ਨੇ ਲੁਧਿਆਣਾ ’ਚ ਵੱਡੇ ਪੱਧਰ ’ਤੇ ਬਿਜਲੀ ਦੀ ਚੋਰੀ ਫੜੀ
ਲੁਧਿਆਣਾ, 23 ਫ਼ਰਵਰੀ (ਸਪੋਕਸਮੈਨ ਸਮਾਚਾਰ ਸੇਵਾ) : ਪੀਐੱਸਪੀਸੀਐਲ ਦੀਆਂ ਇਨਫ਼ੋਰਸਮੈਂਟ ਟੀਮਾਂ ਨੇ ਇਕ ਗੁਪਤ ਸੂਚਨਾ ਦੇ ਆਧਾਰ ’ਤੇ ਕਾਰਵਾਈ ਕਰਦਿਆਂ ਸੀਨੀਅਰ ਐਕਸੀਅਨ ਇਨਫ਼ੋਰਸਮੈਂਟ 3 ਜਲੰਧਰ ਦੀ ਅਗਵਾਈ ਹੇਠ ਲੁਧਿਆਣਾ ਦੇ ਫੋਕਲ ਪੁਆਇੰਟ ਇਲਾਕੇ ਸਥਿਤ ਮਹਾਂਵੀਰ ਜੈਨ ਕਾਲੋਨੀ ਵਿਚ ਇਕ ਉਦਯੋਗਿਕ ਖਪਤਕਾਰ ਵਲੋਂ ਵੱਡੇ ਪੱਧਰ ’ਤੇ ਕੀਤੀ ਜਾ ਰਹੀ ਬਿਜਲੀ ਚੋਰੀ ਫੜੀ ਹੈ। ਖਪਤਕਾਰ ਨੇ 20 ਮੀਟਰ ਦੀ ਬਿਜਲੀ ਦੀ ਤਾਰ ਰਾਹੀਂ ਡਿਸਟ੍ਰੀਬਿਯੂਸ਼ਨ ਟਰਾਂਸਫ਼ਾਰਮਰ ਨਾਲ ਸਿੱਧੇ ਤੌਰ ’ਤੇ 45 ਕੇ.ਵੀ ਦਾ ਹੈਵੀ ਲੋਡ ਲਿਆ ਹੋਇਆ ਸੀ। ਕਪੜੇ ਬਣਾਉਣ ਦਾ ਯੂਨਿਟ ਚਲਾਉਣ ਵਾਲੇ ਉਕਤ ਖਪਤਕਾਰ ਨੂੰ ਬਿਜਲੀ ਚੋਰੀ ਲਈ 27 ਲੱਖ ਰੁਪਏ ਦਾ ਜੁਰਮਾਨਾ ਕੀਤਾ ਗਿਆ ਹੈ। ਖਪਤਕਾਰ ਖ਼ਿਲਾਫ਼ ਇੰਡੀਅਨ ਇਲੈਕਟ੍ਰੀਸਿਟੀ ਐਕਟ 2003 ਦੀ ਧਾਰਾ 135 ਦੇ ਤਹਿਤ ਕੇਸ ਦਰਜ ਕੀਤਾ ਗਿਆ ਹੈ।
ਪੀਐਸਪੀਸੀਐਲ ਦੇ ਸੀਐਮਡੀ ਏ ਵੇਨੂੰ ਪ੍ਰਸ਼ਾਦ ਨੇ ਇਨਫ਼ੋਰਸਮੈਂਟ ਵਿੰਗ ਨੂੰ ਪਹਿਲਾਂ ਹੀ ਬਿਜਲੀ ਚੋਰੀ ਅਤੇ ਭਿ੍ਰਸ਼ਟਾਚਾਰ ਸਬੰਧੀ ਮਾਮਲਿਆਂ ਵਿਰੁਧ ਜ਼ੀਰੋ ਟੋਲਰੈਂਸ ਅਪਣਾਉਣ ਸਬੰਧੀ ਨਿਰਦੇਸ਼ ਦਿਤੇ ਹੋਏ ਹਨ।
