ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਨੇ ਅਖੌਤੀ ਸਾਧ ਰਾਮਪਾਲ ਦੇ ਪੁੱਤਰ ਵੀਰੇਂਦਰ ਦੀ ਤਿੰਨ ਹਫ਼ਤੇ ਦੀ ਜ਼ਮਾਨਤ ਨੂੰ
ਚੰਡੀਗੜ, 22 ਜੂਨ (ਨੀਲ ਭਲਿੰਦਰ ਸਿੰਘ) : ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਨੇ ਅਖੌਤੀ ਸਾਧ ਰਾਮਪਾਲ ਦੇ ਪੁੱਤਰ ਵੀਰੇਂਦਰ ਦੀ ਤਿੰਨ ਹਫ਼ਤੇ ਦੀ ਜ਼ਮਾਨਤ ਨੂੰ ਮਨਜ਼ੂਰ ਕਰ ਲਈ ਹੈ। ਹਾਈ ਕੋਰਟ ਨੇ ਵੀਰੇਂਦਰ ਨੂੰ ਇਕ ਜੁਲਾਈ ਨੂੰ ਜੇਲ ਚੋਂ ਬਾਹਰ ਆਉਣ ਅਤੇ ਫਿਰ 22 ਜੁਲਾਈ ਨੂੰ ਵਾਪਸ ਆਤਮਸਮਰਪਣ ਕਰਨ ਦੇ ਨਿਰਦੇਸ਼ ਦਿਤੇ ਹਨ। ਵੀਰੇਂਦਰ ਨੇ ਜ਼ਮਾਨਤ ਦੀ ਮੰਗ ਕਰਦੇ ਹੋਏ ਕਿਹਾ ਕਿ 15 ਜੁਲਾਈ ਨੂੰ ਉਸ ਦੀ ਧੀ ਦਾ ਵਿਆਹ ਹੈ।
ਇਸ ਦੇ ਲਈ ਉਨ੍ਹਾਂ ਨੂੰ ਚਾਰ ਹਫ਼ਤੇ ਦੀ ਜ਼ਮਾਨਤ ਦਿਤੀ ਜਾਵੇ। ਹਾਈ ਕੋਰਟ ਨੇ ਇਸ ਉਤੇ ਤਿੰਨ ਹਫ਼ਤੇ ਦੀ ਜ਼ਮਾਨਤ ਮਿਆਦ ਨੂੰ ਮਨਜ਼ੂਰ ਕਰਦਿਆਂ ਕਿਹਾ ਕਿ ਧੀ ਦੇ ਵਿਆਹ ਤੋਂ ਦੋ ਹਫ਼ਤੇ ਪਹਿਲਾਂ ਅਤੇ ਇਕ ਹਫ਼ਤੇ ਬਾਅਦ ਤਕ ਰੁਕ ਸਕਦਾ ਹੈ। ਦਸਣਯੋਗ ਹੈ ਕਿ ਰਾਮਪਾਲ ਦੇ ਨਾਲ ਵੀਰੇਂਦਰ ਵੀ ਜੇਲ ਵਿਚ ਬੰਦ ਹੈ। ਇਕ ਬੱਚੇ ਅਤੇ ਚਾਰ ਔਰਤਾਂ ਦੀ ਹੱਤਿਆ ਦੇ ਮਾਮਲੇ ਵਿਚ ਰਾਮਪਾਲ ਅਤੇ ਵੀਰੇਂਦਰ ਸਹਿਤ 15 ਦੋਸ਼ੀਆਂ ਨੂੰ ਹਿਸਾਰ ਕੋਰਟ ਨੇ ਉਮਰਕੈਦ ਦੀ ਸਜ਼ਾ ਸੁਣਾਈ ਸੀ। ਹਿਸਾਰ ਜ਼ਿਲ੍ਹੇ ਵਿਚ ਬਰਵਾਲਾ ਦੇ ਸਤਲੋਕ ਆਸ਼ਰਮ ਵਿਚ ਸਾਲ 2014 ਵਿਚ ਹੋਈ ਇਕ ਬੱਚੇ ਅਤੇ ਚਾਰ ਔਰਤਾਂ ਦੀ ਹਤਿਆ ਵਿਚ ਕੋਰਟ ਨੇ ਉਸ ਨੂੰ ਦੋਸ਼ੀ ਕਰਾਰ ਦਿਤਾ ਸੀ।
