ਮੁਸਲਿਮ ਲੜਕੀ ਨੇ ਸਿਸਟਮ ਨੂੰ ਕੀਤਾ ਚੈਲੰਜ, ‘ਸਿੱਖਾਂ ਦੀ ਪੱਗ ਉਤਰਵਾ ਕੇ ਦਿਖਾਉ’

ਕਰਨਾਟਕ, 22 ਫ਼ਰਵਰੀ : ਸਥਾਨਕ ਕਾਲਜਾਂ ਚ ਬੁਰਕਾ ਪਾਉਣ ’ਤੇ ਪਾਬੰਦੀ ਲੱਗਣ ਤੋਂ ਬਾਅਦ ਸ਼ੁਰੂ ਹੋਇਆ ਵਿਵਾਦ ਹੁਣ ਪੂਰੇ ਭਾਰਤ ’ਚ ਚਰਚਾ ਦਾ ਵਿਸ਼ਾ ਬਣਿਆ ਹੋਇਆ ਹੈ ਅਤੇ ਹਰ ਨਾਗਰਿਕ ਦੇ ਮਨ ’ਚ ਇਕੋ ਸਵਾਲ ਹੈ ਕਿ ਕੀ ਸਾਨੂੰ ਹੁਣ ਅਪਣੇ ਧਰਮ ਮੁਤਾਬਕ ਚੱਲਣ ਦੀ ਇਜਾਜ਼ਤ ਵੀ ਨਹੀਂ ਰਹੀ? ਪਰ ਇਸ ਸਵਾਲ ਦਾ ਜਵਾਬ ਕਰਨਾਟਕ ਦੇ ਕਾਲਜਾਂ ਵਿਚ ਪੜ੍ਹਦੀਆਂ ਮੁਸਲਿਮ ਵਿਦਿਆਰਥਣਾਂ ਨੇ ਵੀ ਬਰਾਬਰ ਦਿਤਾ। ਉਸ ਵੇਲੇ ਜਦੋਂ ਉਹ ਭਗਵਾਂ ਕਪੜਾ ਪਾਈ ਨੌਜਵਾਨ ਮੁੰਡਿਆਂ ਦੇ ਸਾਹਮਣੇ ਅਪਣੇ ਹੱਕ ਲਈ ਡੱਟ ਗਈਆਂ।
ਇਹ ਵਿਵਾਦ ਉਸ ਵੇਲੇ ਵਧ ਗਿਆ ਜਦੋਂ ਕਰਨਾਟਕ ਹਾਈ ਕੋਰਟ ਨੇ ਅਗਲੇ ਹੁਕਮਾਂ ਤਕ ਹਿਜਾਬ ਨੂੰ ਯੂਨੀਫਾਰਮ ਦਾ ਹਿੱਸਾ ਰੱਖਣ ’ਤੇ ਰੋਕ ਲਗਾ ਦਿਤੀ। ਇਸ ਵਿਚਾਲੇ ਇਕ ਵੀਡੀਉ ਤੇਜ਼ੀ ਨਾਲ ਵਾਇਰਲ ਹੋ ਰਹੀ ਹੈ ਜਿਸ ਵਿਚ ਇਕ ਮੁਸਲਿਮ ਲੜਕੀ ਨੇ ਭਾਰਤ ਸਰਕਾਰ ਨੂੰ ਤਿੱਖੇ-ਤਿੱਖੇ ਸਵਾਲ ਕਰਦਿਆਂ ਚੈਲੰਜ ਕਰ ਦਿਤਾ। 
ਉਕਤ ਵੀਡੀਉ ਵਿਚ ਮੁਸਲਿਮ ਲੜਕੀ ਨੇ ਕਿਹਾ ਕਿ ਜੇਕਰ ਸਰਕਾਰ ਵਿਚ ਇੰਨਾ ਦਮ ਅਤੇ ਹਿਮੰਤ ਹੈ ਤਾਂ ਉਹ ਸਿੱਖਾਂ ਦੀ ਪੱਗ ਉਤਰਵਾ ਕੇ ਦਿਖਾਵੇ ਅਤੇ ਜੇਕਰ ਉਹ ਕਾਮਯਾਬ ਹੋਈ ਤਾਂ ਉਹ ਵੀ ਅਪਣਾ ਹਿਜਾਬ ਉਤਾਰ ਦੇਣਗੀਆਂ। ਉਨ੍ਹਾਂ ਕਿਹਾ ਕਿ ਜਦੋਂ ਅਸੀਂ ਕਾਲਜ ਵਿਚ ਜਾਂਦੇ ਹਾਂ ਤਾਂ ਉਥੇ ਭਗਵਾ ਕਪੜਾ ਪਾਈ ਨੌਜਵਾਨਾਂ ਵਲੋਂ 
ਨਾਹਰੇਬਾਜ਼ੀ ਕੀਤੀ ਜਾਂਦੀ ਹੈ ਕਿ ‘ਹਿਜਾਬ ਰੱਖੋ ਜਾਂ ਕਿਤਾਬ ਰੱਖੋ’, ਇਹ ਕਿਸ ਤਰ੍ਹਾਂ ਦਾ ਰਵਈਆ ਹੈ? ਇਸ ਨਾਲ ਹੀ ਉਨ੍ਹਾਂ ਕਿਹਾ ਕਿ ਸਰਕਾਰਾਂ ਵਲੋਂ ਕੀਤੀ ਜਾ ਰਹੀ ਸਿਆਸਤ ਉਹ ਅਪਣੇ ਤਕ ਹੀ ਰੱਖਣ ਅਤੇ ਸਕੂਲਾਂ ਕਾਲਜਾਂ ਵਿਚ ਪੜ੍ਹਦੇ ਬੱਚਿਆਂ ਦੀ ਪੜ੍ਹਾਈ ਵਿਚ ਅਜਿਹੀਆਂ ਕੋਝੀਆਂ ਚਾਲਾਂ ਚੱਲ ਕੇ ਰੁਕਾਵਟ ਨਾ ਪਾਈ ਜਾਵੇ।    (ਏਜੰਸੀ)