ਇਕ ਵਿਅਕਤੀ ਨੂੰ ਪਿੱਕ ਐਂਡ ਡਰਾਪ ਕਰਨ ਵਿਚ ਸਿਰਫ਼ 8 ਸੈਕਿੰਡ ਹੀ ਲੱਗੇ ਸਨ ਬਾਵਜੂਦ ਇਸ ਦੇ ਉਹਨਾਂ ਤੋਂ 50 ਰੁਪਏ ਵਸੂਲ ਲਏ ਗਏ
ਚੰਡੀਗੜ੍ਹ - ਰੇਲਵੇ ਸਟੇਸ਼ਨ 'ਤੇ ਪਿਕ ਐਂਡ ਡਰਾਪ ਚਾਰਜ ਦੇ ਵਿਰੋਧ ਵਿਚ ਲੋਕਾਂ ਦਾ ਗੁੱਸਾ ਵਧਦਾ ਹੀ ਜਾ ਰਿਹਾ ਹੈ। ਉਹਨਾਂ ਦਾ ਕਹਿਣਾ ਹੈ ਕਿ ਪਿਕ ਡਰਾਪ ਦੇ ਨਾਂ 'ਤੇ ਠੱਗੀ ਹੋ ਰਹੀ ਹੈ। ਬੀਤੇ ਦਿਨੀਂ ਪਰਿਵਾਰਕ ਮੈਂਬਰ ਨੂੰ ਰੇਲਵੇ ਸਟੇਸ਼ਨ 'ਤੇ ਛੱਡਣ ਆਈ ਇਕ ਮਹਿਲਾ ਜੈਸਮੀਨ ਨੇ ਦੱਸਿਆ ਕਿ ਉਹਨਾਂ ਨੇ ਰੇਲਵੇ ਸਟੇਸ਼ਨ 'ਤੇ ਸਿਰਫ਼ 15 ਤੋਂ 30 ਮਿੰਟ ਹੀ ਹੋਏ ਸਨ ਤੇ ਇਸ ਦੇ ਬਦਲੇ ਉਹਨਾਂ ਤੋਂ ਪਿਕ ਐਂਡ ਡਰਾਪ ਦੇ 200 ਰੁਪਏ ਵਸੂਲ ਲਏ।
ਉਹਨਾਂ ਕਿਹਾ ਕਿ 10 ਮਿੰਟ ਤੋਂ ਜ਼ਿਆਦਾ ਸਮਾਂ ਤਾਂ ਟੋਲ ਬੈਰੀਅਰ 'ਤੇ ਲੱਗੇ ਜਾਮ ਕਰ ਕੇ ਹੀ ਹੋ ਗਿਆ ਸੀ। ਰੇਲਵੇ ਜੇ ਚਾਰਜ ਲੈ ਵੀ ਰਹੀ ਹੈ ਤਾਂ ਐਗਜ਼ਿਟ ਪੁਆਇੰਟ ਤੋਂ ਜਾਮ ਹਟਾਉਣਾ ਵੀ ਉਹਨਾਂ ਦੀ ਹੀ ਜ਼ਿੰਮੇਵਾਰੀ ਹੈ ਪਰ ਵਸੂਲੀ ਕਰਨ ਵਾਲੇ ਇਹ ਜ਼ਿੰਮੇਵਾਰੀ ਚੁੱਕਣ ਨੂੰ ਤਿਆਰ ਨਹੀਂ ਹਨ। ਇਕ ਹੋਰ ਯਾਤਰੀ ਹਰੀਓਮ ਬੰਸਲ ਨੇ ਕਿਹਾ ਕਿ ਉਹਨਾਂ ਨੂੰ ਪਿੱਕ ਐਂਡ ਡਰਾਪ ਕਰਨ ਵਿਚ ਸਿਰਫ਼ 8 ਸੈਕਿੰਡ ਹੀ ਲੱਗੇ ਸਨ ਬਾਵਜੂਦ ਇਸ ਦੇ ਉਹਨਾਂ ਤੋਂ 50 ਰੁਪਏ ਵਸੂਲ ਲਏ ਗਏ
ਉਹਨਾਂ ਕਿਹਾ ਕਿ ਵਸੂਲੀ ਕਰਨ ਵਾਲੇ ਕਹਿ ਰਹੇ ਹਨ ਕਿ ਇਹ ਅਧਿਕਾਰ ਉਹਨਾਂ ਨੂੰ ਰੇਲਵੇ ਨੇ ਦਿੱਤਾ ਹੈ ਤਾਂ ਇਸ ਕਰ ਕੇ ਉਹਨਾਂ ਨੂੰ ਇਹ ਚਾਰਜ ਦੇਣਾ ਹੋਵੇਗਾ।
ਜ਼ਿਕਰਯੋਗ ਹੈ ਕਿ ਕਾਂਗਰਸ ਆਗੂ ਮਨੋਜ ਲੁਬਾਨਾ ਪਿਛਲੇ 3 ਦਿਨਾਂ ਤੋਂ ਪਿਕ ਐਂਡ ਡਰਾਪ ਨੀਤੀ ਖਿਲਾਫ਼ ਧਰਨੇ 'ਤੇ ਬੈਠੇ ਹੋਏ ਹਨ ਪਰ ਉਹਨਾਂ ਦੀ ਕਿਸੇ ਨੇ ਵੀ ਕੋਈ ਸੁੱਧ ਨਹੀਂ ਲਈ।
ਇਸ ਦੇ ਬਾਵਜੂਦ ਹੁਣ ਤੱਕ ਕਿਸੇ ਵੀ ਅੰਬਾਲਾ ਮੰਡਲ ਦੇ ਕਿਸੇ ਵੀ ਅਧਿਕਾਰੀ ਨੇ ਉਹਨਾਂ ਨੂੰ ਮਿਲਣ ਦੀ ਹਿੰਮਤ ਨਹੀਂ ਕੀਤੀ ਹੈ। ਮਨੋਜ ਲੁਬਾਨਾ ਦਾ ਕਹਿਣਾ ਹੈ ਕਿ ਜੀਆਰਪੀ ਚੰਡੀਗੜ੍ਹ ਪੁਲਿਸ ਅਤੇ ਅੰਬਾਲਾ ਰੇਲਵੇ ਮੰਡਲ ਦੀ ਸੀਆਈਡੀ ਟੀਮ ਜ਼ਰੂਰ ਧਰਨੇ ਵਾਲੀ ਜਗ੍ਹਾ 'ਤੇ ਆਈ ਸੀ ਪਰ ਕਿਸੇ ਵੀ ਰੇਲਵੇ ਅਧਿਕਾਰੀ ਨੇ ਉਹਨਾਂ ਨੂੰ ਕੋਈ ਭਰੋਸਾ ਨਹੀਂ ਦਿੱਤਾ। ਲੁਬਾਨਾ ਨੇ ਕਿਹਾ ਕਿ ਸਰਕਾਰ ਅਹੰਕਾਰੀ ਅਤੇ ਤਾਨਾਸ਼ਾਹੀ ਹੋ ਗਈ ਹੈ।
