ਡੀਆਰਡੀਓ ਵਲੋਂ ਤਿਆਰ ਕੋਰੋਨਾ ਰੋਕੂ ਦਵਾਈ 2-ਡੀਜੀ ਜਾਰੀ

ਪਾਊਡਰ ਦੇ ਰੂਪ ਵਿਚ ਹੈ ਦਵਾਈ, ਪਾਣੀ ਵਿਚ ਘੋਲ ਕੇ ਦੇਣੀ ਹੋਵੇਗੀ ਮਰੀਜ਼ਾਂ ਨੂੰ 

ਨਵੀਂ ਦਿੱਲੀ, 17 ਮਈ : ਰਖਿਆ ਮੰਤਰੀ ਹਰਸ਼ਵਰਧਨ ਨੇ ਰਖਿਆ ਖੋਜ ਅਤੇ ਵਿਕਾਸ ਸੰਗਠਨ (ਡੀਆਰਡੀਓ) ਵਲੋਂ ਵਿਕਸਤ ਕੀਤੀ ਗਈ ਕੋਰੋਨਾ ਰੋਕੂ ਦਵਾਈ 2-ਡੀਜੀ ਦੀ ਪਹਿਲੀ ਖੇਪ ਸੋਮਵਾਰ ਨੂੰ  ਜਾਰੀ ਕੀਤੀ | ਕੋਵਿਡ ਦੇ ਮੱਧਮ ਲੱਛਣਾਂ ਵਾਲੇ ਅਤੇ ਗੰਭੀਰ ਲੱਛਣਾਂ ਵਾਲੇ ਮਰੀਜ਼ਾਂ 'ਤੇ 2-ਡੀਆਕਸੀ-ਡੀ-ਗਲੂਕੋਜ਼ (2-ਡੀਜੀ) ਦਵਾਈ ਦੇ ਐਮਰਜੈਂਸੀ ਇਸਤੇਮਾਲ ਦਾ ਭਾਰਤ ਔਸ਼ਧੀ ਕੰਟੋਲਰ ਜਨਰਲ (ਡੀਜੀਸੀਆਈ) ਵਲੋਂ ਮਨਜ਼ੂਰੀ ਮਿਲ ਚੁਕੀ ਹੈ |
  ਇਸ ਮੌਕੇ ਅਪਣੇ ਸੰਖੇਪ ਭਾਸ਼ਣ ਵਿਚ ਰਾਜਨਾਥ ਸਿੰਘ ਨੇ ਕਿਹਾ ਕਿ ਇਹ ਦਵਾਈ ਕੋਰੋਨਾ ਮਰੀਜ਼ਾਂ ਦੇ ਇਲਾਜ ਲਈ ਉਮੀਦ ਦੀ ਕਿਰਨ ਲੈ ਕੇ ਆਈ ਹੈ | ਉਨ੍ਹਾਂ ਕਿਹਾ,''ਇਹ ਦੇਸ਼ ਦੇ ਵਿਗਿਆਨਿਕ ਕੌਸ਼ਲ ਦਾ ਅਨੋਖਾ ਉਦਾਹਰਣ ਹੈ |''  ਉਨ੍ਹਾਂ ਕਿਹਾ ਕਿ ਇਹ ਸਮਾਂ ਥੱਕਣ ਅਤੇ ਆਰਾਮ ਕਰਨ ਦਾ ਨਹੀਂ ਕਿਉਂਕਿ ਇਸ ਮਹਾਂਮਾਰੀ ਦੇ ਰੂਪ ਬਾਰੇ ਕੁੱਝ ਵੀ ਪੱਕੀ ਜਾਣਕਾਰੀ ਨਹੀਂ ਹੈ |
 
 ਦਵਾਈ ਲਾਂਚ ਕਰਨ ਮੌਕੇ ਹਰਸ਼ਵਰਧਨ ਨੇ ਕਿਹਾ ਕਿ ਕੋਵਿਡ ਵਿਰੁਧ ਲੜਨ ਲਈ ਸਾਡਾ ਪਹਿਲਾ ਦੇਸੀ ਸੋਧ ਆਧਾਰਤ ਨਤੀਜਾ ਹੋ ਸਕਦਾ ਹੈ | ਇਸ ਤੋਂ ਠੀਕ ਹੋਣ 'ਚ ਲੱਗਣ ਵਾਲਾ ਸਮਾਂ ਅਤੇ ਆਕਸੀਜਨ ਦੀ ਨਿਰਭਰਤਾ ਘੱਟ ਹੋਵੇਗੀ | ਉਨ੍ਹਾਂ ਕਿਹਾ ਕਿ ਮੈਨੂੰ ਆਸ ਹੈ ਕਿ ਇਹ ਆਉਣ ਵਾਲੇ ਦਿਨਾਂ 'ਚ ਵਿਸ਼ਵ ਪੱਧਰ 'ਤੇ ਕੋਵਿਡ ਵਿਰੁਧ ਲੜਾਈ 'ਚ ਕੰਮ ਕਰੇਗੀ | ਹਰਸ਼ਵਰਧਨ ਨੇ ਕਿਹਾ ਕਿ ਮੈਂ ਡੀ.ਆਰ.ਡੀ.ਓ. ਅਤੇ ਉਸ ਦੇ ਵਿਗਿਆਨੀਆਂ ਨੂੰ  ਧਨਵਾਦ ਅਤੇ ਵਧਾਈ ਦਿੰਦਾ ਹਾਂ | ਇਹ ਦਵਾਈ ਪਾਊਡਰ ਦੇ ਰੂਪ ਵਿਚ ਹੋਵੇਗੀ ਜਿਸ ਨੂੰ  ਪਾਣੀ ਵਿਚ ਘੋਲ ਕੇ ਮਰੀਜ਼ਾਂ ਨੂੰ  ਦੇਣਾ ਹੋਵਗਾ | (ਪੀਟੀਆਈ)