ਟੀਕਾ ਲਵਾਉਣ ਤੋਂ ਬਾਅਦ 51 ਲੋਕਾਂ ਨੂੰ ਹੋਈ ਥੋੜ੍ਹੀ ਪ੍ਰੇਸ਼ਾਨੀ : ਸਤੇਂਦਰ ਜੈਨ
ਨਵੀਂ ਦਿੱਲੀ, 17 ਜਨਵਰੀ: ਦਿੱਲੀ-ਐੱਨ.ਸੀ.ਆਰ. ਸਣੇ ਪੂਰੇ ਭਾਰਤ 'ਚ 16 ਜਨਵਰੀ ਤੋਂ ਕੋਰੋਨਾ ਵਾਇਰਸ ਟੀਕਾਕਰਨ ਮੁਹਿੰਮ ਦੀ ਸ਼ੁਰੂਆਤ ਕੀਤੀ ਗਈ | ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਵੀਡੀਉ ਕਾਨਫ਼ਰੰਸਿਗ ਰਾਹੀਂ ਇਸ ਪ੍ਰੋਗਰਾਮ ਦੀ ਸ਼ੁਰੂਆਤ ਕੀਤੀ |
ਰਾਜਧਾਨੀ ਦਿੱਲੀ 'ਚ ਟੀਕਾਕਰਨ ਨੂੰ ਲੈ ਕੇ ਦਿੱਲੀ ਦੇ ਸਿਹਤ ਮੰਤਰੀ ਸਤੇਂਦਰ ਜੈਨ ਨੇ ਐਤਵਾਰ ਨੂੰ ਮੀਡੀਆ ਨਾਲ ਗੱਲ ਕਰਦੇ ਹੋਏ ਕਿਹਾ ਕਿ ਦਿੱਲੀ 'ਚ ਕੁਲ 4,317 ਸਿਹਤ ਕਾਮਿਆਂ ਨੂੰ ਟੀਕਾ ਲਗਾਇਆ ਗਿਆ | ਵੈਕਸੀਨ ਲਗਵਾਉਣ ਤੋਂ ਬਾਅਦ 51 ਲੋਕਾਂ ਨੂੰ ਥੋੜੀ ਪ੍ਰੇਸ਼ਾਨੀ ਹੋਈ ਅਤੇ ਇਕ ਗੰਭੀਰ ਮਾਮਲਾ ਸਾਹਮਣੇ ਆਇਆ, ਜਿਸ ਨੂੰ ਏਮਜ਼ 'ਚ ਦਾਖ਼ਲ ਕਰਵਾਇਆ ਗਿਆ | ਇਨ੍ਹਾਂ 51 ਲੋਕਾਂ ਨੂੰ ਥੋੜੀ ਦੇਰ ਨਿਗਰਾਨੀ 'ਚ ਰੱਖਣ ਤੋਂ ਬਾਅਦ ਛੁੱਟੀ ਦੇ ਦਿਤੀ | ਟੀਕਾਕਰਨ ਸਥਾਨਾਂ ਦੀ ਗਿਣਤੀ ਨੂੰ ਵਧਾ ਕੇ 175 ਅਤੇ ਫਿਰ 1000 ਕੀਤਾ ਜਾਵੇਗਾ |
ਸਿਹਤ ਮੰਤਰੀ ਅਨੁਸਾਰ, ਹੁਣ ਤਕ ਦਿੱਲੀ 'ਚ 53.32 ਫ਼ੀ ਸਦੀ ਸਿਹਤ ਕਾਮਿਆਂ ਦਾ ਟੀਕਾਕਰਨ ਹੋਇਆ ਹੈ | ਦਿੱਲੀ ਦੀ 81 ਟੀਕਾਕਰਨ ਸਾਈਟਾਂ 'ਤੇ ਕੁਲ 8100 ਸਿਹਤ ਕਾਮਿਆਂ ਨੂੰ ਪਹਿਲੇ ਦਿਨ ਟੀਕੇ ਲਗਣ ਦੀ ਉਮੀਦ ਸੀ | ਹਾਲਾਂਕਿ ਕੁਲ 4,319 ਸਿਹਤ ਕਾਮਿਆਂ ਨੇ ਟੀਕੇ ਲਗਵਾਏ | ਦਿੱਲੀ ਦੇ ਸਿਹਤ ਮੰਤਰੀ ਸਤੇਂਦਰ ਜੈਨ ਨੇ ਪਹਿਲੇ ਦਿਨ ਦੀ ਟੀਕਾਕਰਨ ਮੁਹਿੰਮ ਨੂੰ ਸਫ਼ਲ ਦਸਿਆ ਅਤੇ ਕਿਹਾ ਕਿ ਵੈਕਸੀਨ ਪੂਰੀ ਤਰ੍ਹਾਂ ਨਾਲ ਸਵੈ-ਇਛੁੱਕ ਹੈ | (ਏਜੰਸੀ)
