ਪੁਲਿਸ ਨੇ ਤੁਰਤ ਕੀਤੀ ਇਲਾਕੇ ਦੀ ਨਾਕਾਬੰਦੀ, ਤਲਾਸ਼ ਜਾਰੀ
ਬਾਘਾ ਪੁਰਾਣਾ, 17 ਸਤੰਬਰ (ਸੰਦੀਪ ਬਾਘੇਵਾਲੀਆ, ਹਰਬੰਸ ਢਿੱਲੋਂ) : ਥਾਣਾ ਬਾਘਾ ਪੁਰਾਣਾ ਅਧੀਨ ਆਉਦੇ ਪਿੰਡ ਆਲਮ ਵਾਲਾ ਕਲਾਂ ਵਿਖੇ ਦਿਨ ਦਿਹਾੜੇ 10 ਸਾਲਾ ਬੱਚੇ ਨੂੰ ਅਗਵਾ ਕਰ ਲਿਆ ਗਿਆ। ਅੱਜ ਕਰੀਬ 12:30 ਵਜੇ ਗੁਰਮੀਤ ਸਿੰਘ ਔਲਖ ਜੋ ਕਿ ਅਲਮੀਨੀਅਮ ਦਾ ਕੰਮ ਕਰਦਾ ਹੈ। ਉਸ ਦੇ ਦੋਵੇ ਬੱਚੇ ਦੁਕਾਨ 'ਤੇ ਖੇਡ ਰਹੇ ਸਨ, ਜਦੋ ਕਿ ਗੁਰਮੀਤ ਸਿੰਘ ਕਿਸੇ ਜਗ੍ਹਾਂ 'ਤੇ ਕੰਮ ਕਰਨ ਬਾਹਰ ਗਿਆ ਹੋਇਆ ਸੀ ਅਤੇ ਦੁਕਾਨ ਉਪਰ ਇਕ ਹੀ ਮੁਲਾਜ਼ਮ ਮੌਜੂਦ ਸੀ। ਉਸ ਸਮੇ ਇਕ ਚਿੱਟੇ ਰੰਗ ਦੀ ਮਾਰੂਤੀ ਕਾਰ ਵਿਚ ਸਵਾਰ ਦੋ ਅਣਪਛਾਤੇ ਵਿਅਕਤੀ ਆਏ, ਜਿਨ੍ਹਾਂ ਦੇ ਮੂੰਹ 'ਤੇ ਮਾਸਕ ਪਾਏ ਹੋਏ ਸਨ ਅਤੇ ਉਨ੍ਹਾਂ ਨੇ ਦੁਕਾਨ ਮੁਲਾਜ਼ਮ ਨੂੰ ਦੁਕਾਨਦਾਰ ਬਾਰੇ ਪੁਛਿਆ ਅਤੇ ਕਿਹਾ ਕਿ ਅਸੀਂ ਘਰ ਵਿਚ ਅਲਮੀਨੀਅਮ ਦਾ ਕੰਮ ਕਰਵਾਉਣਾ ਹੈ ਅਤੇ ਉਨ੍ਹਾਂ ਨੇ ਮੁਲਾਜ਼ਮ ਨੂੰ ਦੁਕਾਨ ਦੇ ਮਾਲਕ ਦਾ ਮੋਬਾਈਲ ਨੰਬਰ ਪੁੱਛਿਆ ਅਤੇ ਜਦੋਂ ਮੁਲਾਜ਼ਮ ਨੇ ਮੋਬਾਇਲ ਨੰਬਰ ਲਿਖਵਾਇਆ ਤਾਂ ਉਨ੍ਹਾਂ ਨੇ ਮੁਲਾਜ਼ਮ ਤੋ ਪੀਣ ਲਈ ਪਾਣੀ ਮੰਗਿਆ ਅਤੇ ਜਦੋਂ ਮੁਲਾਜ਼ਮ ਪਾਣੀ ਪਿਲਾ ਕੇ ਦੁਕਾਨ ਅੰਦਰ ਗਿਆ ਤਾਂ ਉਨ੍ਹਾਂ ਵਿਅਕਤੀਆਂ ਨੇ ਗੁਰਮੀਤ ਸਿੰਘ ਔਲਖ ਦੇ 10 ਸਾਲਾ ਬੱਚੇ ਅਮਨਦੀਪ ਸਿੰਘ ਨੂੰ ਚੁੱਕ ਕੇ ਕਾਰ ਵਿਚ ਸੁਟ ਲਿਆ ਤੇ ਕਾਰ ਮੁਦਕੀ ਸਾਈਡ ਨੂੰ ਭਜਾ ਦਿਤੀ।
image
ਬੱਚੇ ਦੇ ਚੀਕਾਂ ਮਾਰਨ ਅਤੇ ਦੁਕਾਨ 'ਤੇ ਲੱਗੇ ਮੁਲਾਜ਼ਮ ਦੇ ਰੌਲਾ ਪਾਉਣ 'ਤੇ ਪਿੰਡ ਦੇ ਕੁਝ ਨੌਜਵਾਨਾ ਨੇ ਮੋਟਰਸਾਈਕਲਾਂ 'ਤੇ ਕਾਰ ਦਾ ਪਿੱਛਾ ਕੀਤਾ ਪਰ ਅਗਵਾਹਕਾਰ ਕਾਰ ਭਜਾ ਕੇ ਲਿਜਾਣ ਵਿਚ ਕਾਮਯਾਬ ਹੋ ਗਏ। ਇਸ ਸਬੰਧੀ ਬਾਘਾ ਪੁਰਾਣਾ ਪੁਲਿਸ ਨੂੰ ਸੂਚਿਤ ਕਰਨ 'ਤੇ ਪੁਲਿਸ ਨੇ ਤੁਰਤ ਕਾਰਵਾਈ ਕਰਦਿਆਂ, ਡੀ.ਐਸ.ਪੀ ਜਸਬਿੰਦਰ ਸਿੰਘ ਖਹਿਰਾ ਅਤੇ ਥਾਣਾ ਮੁਖੀ ਹਰਮਨਜੀਤ ਸਿੰਘ ਦੀ ਅਗਵਾਈ ਹੇਠ ਪੁਲਿਸ ਵਲੋਂ ਇਲਾਕੇ ਦੀ ਨਾਕਾਬੰਦੀ ਕਰ ਕੇ ਦੋਸ਼ੀਆਂ ਦੀ ਭਾਲ ਸ਼ੁਰੂ ਕਰ ਦਿਤੀ ਅਤੇ ਪੁਲਿਸ ਵਲੋਂ ਸਾਰੇ ਇਲਾਕੇ ਦੇ ਸੀਸੀਟੀਵੀ ਕੈਮਰਿਆਂ ਦੀ ਬਰੀਕੀ ਨਾਲ ਜਾਂਚ ਕੀਤੀ ਜਾ ਰਹੀ ਹੈ।
