ਹਾਈ ਕੋਰਟ ਨੇ ਦਿੱਲੀ ਗੁਰਦਵਾਰਾ ਚੋਣਾਂ ਟਾਲਣ ਦੇ ਬਾਦਲਾਂ ਦੇ ਮਨਸੂਬੇ ਕੀਤੇ ਫੇਲ: ਸਰਨਾ
ਨਵੀਂ ਦਿੱਲੀ: 13 ਅਕਤੂਬਰ (ਅਮਨਦੀਪ ਸਿੰਘ) : ਦਿੱਲੀ ਹਾਈਕੋਰਟ ਵਲੋਂ ਦਿੱਲੀ ਸਿੱਖ ਗੁਰਦਵਾਰਾ ਪ੍ਰਬੰਧਕ ਕਮੇਟੀ ਦੀਆਂ ਚੋਣਾਂ ਪੁਰਾਣੀਆਂ ਵੋਟਰ ਲਿਸਟਾਂ ਵਿਚ ਸੋਧ ਕਰ ਕੇ ਸਮੇਂ ਸਿਰ ਕਰਵਾਉਣ ਦੇ ਫ਼ੈਸਲੇ ਨੂੰ ਇਤਿਹਾਸਕ ਦੱਸਦੇ ਹੋਏ ਸ਼੍ਰੋਮਣੀ ਅਕਾਲੀ ਦਲ ਦਿੱਲੀ ਦੇ ਸਕੱਤਰ ਜਨਰਲ ਸ.ਹਰਵਿੰਦਰ ਸਿੰਘ ਸਰਨਾ ਨੇ ਕਿਹਾ ਹੈ ਕਿ ਅਦਾਲਤ ਨੇ ਸਮੇਂ ਸਿਰ ਚੋਣਾਂ ਕਰਵਾਉਣ ਦਾ ਫ਼ੈਸਲਾ ਸੁਣਾ ਕੇ, ਚੋਣਾਂ ਲਮਕਾਉਣ ਦੇ ਸ਼੍ਰੋਮਣੀ ਅਕਾਲੀ ਦਲ ਬਾਦਲ ਦੇ ਫ਼ੈਸਲੇ 'ਤੇ ਪਾਣੀ ਫੇਰ ਦਿਤਾ ਹੈ। ਉਨਾਂ੍ਹ ਦੋਸ਼ ਲਾਇਆ ਕਿ ਸ਼੍ਰੋਮਣੀ ਅਕਾਲੀ ਦਲ ਬਾਦਲ ਨੇ 2017 ਦੀਆਂ ਗੁਰਦਵਾਰਾ ਚੋਣਾਂ ਅਖਉਤੀ ਤੌਰ 'ਤੇ ਫ਼ਰਜ਼ੀ ਵੋਟਾਂ ਸਹਾਰੇ ਜਿੱਤੀਆਂ ਸਨ, ਹੁਣ ਨਵੇਂ ਸਿਰੇ ਤੋਂ ਵੋਟਾਂ ਬਨਵਾਉਣ ਦੀ ਮੰਗ ਲੈ ਕੇ ਬਾਦਲ ਦਲ ਨੇ ਹਾਈਕੋਰਟ ਵਿਚ ਪਟੀਸ਼ਨ ਦਾਖ਼ਲ ਕਰ ਦਿਤੀ, ਤਾ ਕਿ ਚੋਣਾਂ ਲਮਕਾਈਆਂ ਜਾ ਸਕਣ। ਇਸ ਵਿਚਕਾਰ 'ਸਪੋਕਸਮੈਨ' ਵਲੋਂ ਜਦੋਂ ਸ਼੍ਰੋਮਣੀ ਅਕਾਲੀ ਦਲ ਬਾਦਲ ਦਿੱਲੀ ਦੇ ਪ੍ਰਧਾਨ ਤੇ ਦਿੱਲੀ ਸਿੱਖ ਗੁਰਦਵਾਰਾ ਪ੍ਰਬੰਧਕ ਕਮੇਟੀ ਦੇ ਜਨਰਲ ਸਕੱਤਰ ਸ.ਹਰਮੀਤ ਸਿੰਘ ਕਾਲਕਾ ਨੇ ਸਰਨਾ ਦੇ ਦੋਸ਼ਾਂ 'ਤੇ ਟਿੱਪਣੀ ਕਰਨ ਤੋਂ ਨਾਂਹ ਕਰ ਦਿਤੀ ਤੇ ਕਿਹਾ, ਅਦਾਲਤ ਦੇ ਪਿਛਲੇ ਹੁਕਮਾਂ 'ਤੇ ਹੀ ਉਹ ਨਵੀਂਆਂ ਵੋਟਰ ਲਿਸਟਾਂ ਬਨਵਾਉਣ ਦੀ ਮੰਗ ਨੂੰ ਲੈ ਕੇ ਹਾਈਕੋਰਟ ਗਏ ਸਨ।
