24 ਘੰਟੇ ਵਿਚ ਆਏ 260 ਤੋਂ ਵੱਧ ਨਵੇਂ ਪਾਜ਼ੇਟਿਵ ਮਾਮਲੇ, ਪਟਿਆਲਾ ਤੇ ਜਲੰਧਰ ਵਿਚ ਮੁੜ ਕੋਰੋਨਾ ਧਮਾਕਾ, 2-2 ਮੌਤਾਂ ਵੀ ਹੋਈਆਂ
ਚੰਡੀਗੜ੍ਹ, 11 ਜੁਲਾਈ (ਗੁਰਉਪਦੇਸ਼ ਭੁੱਲਰ): ਪੰਜਾਬ ਵਿਚ ਕੋਰੋਨਾ ਦਾ ਕਹਿਰ ਦਿਨ ਬ ਦਿਨ ਵਧਦਾ ਹੀ ਜਾ ਰਿਹਾ ਹੈ। ਬੀਤੇ 24 ਘੰਟਿਆਂ ਦੌਰਾਨ ਜਿਥੇ ਕੋਰੋਨਾ ਵਾਇਰਸ ਨੇ 8 ਹੋਰ ਜਾਨਾਂ ਲੈ ਲਈਆਂ ਹਨ ਉਥੇ 260 ਤੋਂ ਵੱਧ ਨਵੇਂ ਪਾਜ਼ੇਟਿਵ ਮਾਮਲੇ ਵੀ ਸਾਹਮਣੇ ਆਏ ਹਨ। ਸੂਬੇ ਵਿਚ ਕੁੱਝ ਹੋਰ ਅਧਿਕਾਰੀਆਂ ਤੇ ਪੁਲਿਸ ਮੁਲਾਜ਼ਮਾਂ ਦੇ ਵੀ ਪਾਜ਼ੇਟਿਵ ਮਾਮਲੇ ਸਾਹਮਣੇ ਆਏ ਹਨ। ਜਿਥੇ ਸੂਬੇ ਵਿਚ ਮੌਤਾਂ ਦੀ ਕੁਲ ਗਿਣਤੀ 198 ਤਕ ਪਹੁੰਚ ਗਈ ਹੇ ਉਥੇ ਕੁਲ ਪਾਜ਼ੇਟਿਵ ਮਰੀਜ਼ਾਂ ਦਾ ਅੰਕੜਾ ਵੀ 7800 ਤੋਂ ਪਾਰ ਹੋ ਗਿਆ ਹੈ।
ਜਲੰਧਰ ਤੇ ਪਟਿਆਲਾ ਜ਼ਿਲ੍ਹੇ ਵਿਚ ਅੱਜ ਕੋਰੋਨਾ ਧਮਾਕਾ ਹੋਏ ਹਨ ਜਿਥੇ 24 ਘੰਟੇ ਦੌਰਾਨ ਕ੍ਰਮਵਾਰ 77 ਅਤੇ 73 ਮਾਮਲੇ ਆਏ ਹਨ। ਅੱਜ ਹੋਈਆਂ ਮੌਤਾਂ ਵਿਚੋਂ 2 ਮਾਮਲੇ ਪਟਿਆਲਾ, 2 ਜਲੰਧਰ ਅਤੇ ਇਕ-ਇਕ ਮਾਮਲਾ ਪਠਾਨਕੋਟ, ਸੰਗਰੂਰ, ਲੁਧਿਆਣਾ ਤੇ ਬਠਿੰਡਾ ਨਾਲ ਸਬੰਧਤ ਹੈ। ਹੁਣ ਤਕ ਸੂਬੇ ਵਿਚ 5040 ਮਰੀਜ਼ ਠੀਕ ਵੀ ਹੋਏ ਹਨ। 2352 ਮਰੀਜ਼ ਇਸ ਸਮੇਂ ਇਲਾਜ ਅਧੀਨ ਹਨ। ਜਿਨ੍ਹਾਂ ਵਿਚੋਂ ਗੰਭੀਰ ਮਰੀਜ਼ਾਂ ਵਿਚ 59 ਆਕਸੀਜਨ ਅਤੇ 9 ਵੈਂਟੀਲੇਟਰ ਉਪਰ ਹਨ।
Corona Virus
ਇਸੇ ਦੌਰਾਨ ਸਰਕਾਰ ਵਲੋਂ ਸੱਭ ਤੋਂ ਵੱਧ ਪਾਜ਼ੇਟਿਵ ਮਾਮਲਿਆਂ ਵਾਲੇ 9 ਖੇਤਰਾਂ ਨੂੰ ਕਨਟੋਨਮੈਂਟ ਜ਼ੋਨ ਐਲਾਨਿਆ ਹੈ ਜੋ 5 ਜ਼ਿਲ੍ਹਿਆਂ ਨਾਲ ਸਬੰਧਤ ਹਨ। ਇਨ੍ਹਾਂ ਵਿਚ ਜ਼ਰੂਰੀ ਸੇਵਾਵਾਂ ਨੂੰ ਛੱਡ ਕੇ ਬਾਕੀ ਕੰਮਾਂਕਾਰਾਂ 'ਤੇ ਪਾਬੰਦੀਆਂ ਰਹਿਣਗੀਆਂ ਤੇ ਖੇਤਰ ਸੀਲ ਰਹਿਣਗੇ। ਐਲਾਨ ਗਏ ਇਨ੍ਹਾਂ ਜ਼ੋਨਾਂ ਵਿਚ ਜ਼ਿਲ੍ਹਾ ਲੁਧਿਆਣਾ ਵਿਚ ਹਬੀਗੰਜ ਸਹਿੰਸੀ ਮੁਹੱਲਾ, ਅਸ਼ੋਕ ਨਗਰ, ਜਲੰਧਰ ਵਿਚ ਭਾਰਗੋ ਕੈਂਪ, ਫ਼ਤਿਹਪੁਰ, ਮਖਦੂਮਪੁਰਾ, ਗੁਰਦਾਸਪੁਰ ਵਿਚ ਡੇਰਾ ਬਾਬਾ ਨਾਨਕ, ਮੋਹਾਲੀ ਵਿਚ ਬੇਹੜਾ ਤੇ ਨਵਾਂਸ਼ਹਿਰ ਜ਼ਿਲ੍ਹੇ ਵਿਚ ਜੈਨ ਸਟਰੀਟ ਤੇ ਰਾਹੋਂ ਸ਼ਾਮਲ ਹਨ।
ਆਈ.ਏ.ਐਸ. ਜੋੜਾ ਪ੍ਰਵਾਰ ਸਮੇਤ ਪਾਜ਼ੇਟਿਵ- ਪੰਜਾਬ ਦਾ ਆਈ.ਏ.ਐਸ. ਜੋੜਾ ਪੰਚਾਇਤ ਵਿਭਾਗ ਦੇ ਡਾਇਰੈਕਟਰ ਵਿਪਲ ਉਜਵਲ ਤੇ ਉਨ੍ਹਾਂ ਦੀ ਪਤਨੀ ਤੇ ਰੋਪੜ ਵੀ ਡੀ.ਸੀ. ਸੋਨਾਲੀ ਗਿਰੀ ਪੂਰੇ ਪ੍ਰਵਾਰ ਸਮੇਤ ਪਾਜ਼ੇਟਿਵ ਪਾਏ ਜਾਣ ਦੀ ਪੁਸ਼ਟੀ ਹੋਈ ਹੈ। ਇਨ੍ਹਾਂ ਦੇ ਪ੍ਰਵਾਰ ਨੇ ਚਾਰ ਹੋਰ ਮੈਂਬਰ ਜਿਨ੍ਹਾਂ ਵਿਚ ਦੋ ਬੱਚੇ 8 ਸਾਲ ਤੇ 1 ਸਾਲ ਅਤੇ ਬਿਰਧ ਮਾਤਾ ਤੇ ਪਿਤਾ ਸ਼ਾਮਲ ਹਨ, ਵੀ ਪਾਜ਼ੇਟਿਵ ਪਾਏ ਗਏ ਹਨ। ਇਨ੍ਹਾਂ ਵਿਚ ਕੋਈ ਸਪਸ਼ੱਟ ਲੱਛਣ ਨਹੀਂ ਅਤੇ ਇਹ ਇਸ ਸਮੇਂ ਘਰ ਵਿਚ ਹੀ ਇਕਾਂਤਵਾਸ ਹਨ।
