ਬੀ.ਸੀ ਚੋਣਾਂ 'ਚ ਇਕ ਹੋਰ ਪੰਜਾਬਣ ਜਿੱਤੀ, ਅਸੈਂਬਲੀ 'ਚ 9 ਹੋਏ ਪੰਜਾਬੀ
ਸਰੀ, 8 ਨਵੰਬਰ : ਬੀ.ਸੀ ਵਿਚ 24 ਅਕਤੂਬਰ ਨੂੰ ਅਸੈਂਬਲੀ ਦੀਆਂ ਹੋਈਆਂ ਚੋਣਾਂ ਵਿਚ ਡਾਕ ਰਾਹੀਂ ਪ੍ਰਾਪਤ ਹੋਈਆਂ ਵੋਟਾਂ ਦੀ ਕੱਲ੍ਹ ਸ਼ੁਰੂ ਹੋ ਗਈ ਸੀ ਅਤੇ ਅੱਜ ਦੂਜੇ ਦਿਨ ਇਲੈਕਸ਼ਨ ਬੀਸੀ ਵਲੋਂ ਅਪਣੀ ਸਾਂਝੀ ਕੀਤੀ ਜਾਣਕਾਰੀ ਅਨੁਸਾਰ ਵਰਨਨ ਮੋਨਾਸ਼ੀ ਤੋਂ ਐਨ ਡੀ ਪੀ ਦੀ ਪੰਜਾਬੀ ਮੁਟਿਆਰ ਹਰਵਿੰਦਰ ਸੰਧੂ ਨੇ ਲਿਬਰਲ ਉਮੀਦਵਾਰ ਐਰਿਕ ਫ਼ੋਸਟਰ ਨੂੰ ਮਾਤ ਦੇ ਦਿਤੀ ਹੈ।
ਬੇਸ਼ਕ ਇਲੈਕਸ਼ਨ ਬੀਸੀ ਵਲੋਂ ਫ਼ਾਈਨਲ ਨਤੀਜਾ ਨਹੀਂ ਐਲਾਨਿਆ ਗਿਆ ਪਰ ਇਸ ਹਲਕੇ ਵਿਚ ਵੋਟਾਂ ਦੀ ਗਿਣਤੀ ਦਾ ਕੰਮ ਮੁਕੰਮਲ ਹੋ ਚੁਕਿਆ ਹੈ ਅਤੇ ਹਰਵਿੰਦਰ ਸੰਧੂ ਨੇ ਅਪਣੇ ਵਿਰੋਧੀ ਤੋਂ 282 ਵੋਟਾਂ ਦੀ ਲੀਡ ਹਾਸਲ ਕਰ ਲਈ ਹੈ। ਤਾਜ਼ਾ ਗਿਣਤੀ ਅਨੁਸਾਰ ਐਨ ਡੀ ਪੀ ਉਮੀਦਵਾਰ ਹਰਵਿੰਦਰ ਸੰਧੂ ਨੂੰ 9568 ਅਤੇ ਲਿਬਰਲ ਉਮੀਦਵਾਰ ਐਰਿਕ ਨੂੰ 9286 ਵੋਟਾਂ ਹਾਸਲ ਹੋਈਆਂ ਹਨ। ਹਰਵਿੰਦਰ ਸੰਧੂ ਦੀ ਜਿੱਤ ਨੇ ਬੀਸੀ ਅਸੈਂਬਲੀ ਵਿਚ ਪੰਜਾਬੀਆਂ ਦੀ ਗਿਣਤੀ ਵਿਚ ਇਕ ਵਰਨਣਯੋਗ ਅਤੇ ਰਿਕਾਰਡ ਵਾਧਾ ਕਰ ਦਿਤਾ ਹੈ। ਹੁਣ ਬੀਸੀ ਅਸੈਂਬਲੀ ਵਿਚ ਪੰਜਾਬੀ ਮੂਲ ਦੇ 9 ਐਮ.ਐਲ.ਏ. ਹੋਣਗੇ ਅਤੇ ਸਭ ਤੋਂ ਅਹਿਮ ਗਲ ਕਿ ਇਹ ਸਾਰੇ ਪੰਜਾਬੀ ਐਮ.ਐਲ.ਏ. ਸੱਤਾਧਾਰੀ ਐਨ ਡੀ ਪੀ ਪਾਰਟੀ ਨਾਲ ਸਬੰਧਤ ਹਨ।
