ਕੰਗਣਾ ਰਣੌਤ ਵਿਰੁਧ ਬਠਿੰਡਾ ਦੀ ਅਦਾਲਤ ’ਚ ਮਾਣਹਾਣੀ ਦਾ ਕੇਸ ਦਾਈਰ

ਬਠਿੰਡਾ, 8 ਜਨਵਰੀ (ਸੁਖਜਿੰਦਰ ਮਾਨ) : ਦਿੱਲੀ ’ਚ ਚੱਲ ਰਹੇ ਕਿਸਾਨ ਸੰਘਰਸ਼ ’ਚ ਸਮੂਲੀਅਤ ਕਰਨ ਵਾਲੀ ਬਠਿੰਡਾ ਜ਼ਿਲ੍ਹੇ ਦੇ ਪਿੰਡ ਬਹਾਦਰਗੜ੍ਹ ਜੰਡੀਆ ਦੀ ਔਰਤ ਮਹਿੰਦਰ ਕੌਰ ਨੂੰ ਦਿਹਾੜੀਦਾਰ ਦੱਸ ਕੇ ਮੂੰਹ ਦੀ ਖਾ ਚੁੱਕੀ ਬਾਲੀਵੁੱਡ ਅਦਾਕਾਰਾ ਕੰਗਣਾ ਰਣੌਤ ਵਿਰੁਧ ਹੁਣ ਬਠਿੰਡਾ ਦੀ ਅਦਾਲਤ ਵਿਚ ਮਾਣਹਾਣੀ ਦਾ ਕੇਸ ਦਾਈਰ ਕੀਤਾ ਗਿਆ ਹੈ।  ਰਣੌਤ ਨੂੰ ਅਪਣੇ ਵਿਰੁਧ ਬੋਲਣ ’ਤੇ ਮੂੰਹ ਤੋੜਵਾ ਜਵਾਬ ਦੇਣ ਵਾਲੀ ਮਹਿੰਦਰ ਕੌਰ ਨੇ ਹੁਣ ਸਥਾਨਕ ਅਦਾਲਤ ’ਚ ਵਕੀਲ ਰਘਵੀਰ ਸਿੰਘ ਬਹਿਣੀਵਾਲ ਰਾਹੀਂ ਕੇਸ ਦਾਇਰ ਕੀਤਾ ਹੈ, ਜਿਸਦੀ ਪਹਿਲੀ ਸੁਣਵਾਈ 11 ਜਨਵਰੀ ਨੂੰ ਹੋਵੇਗੀ। 
 ਕੰਗਣਾ ਰਣੌਤ ਦੇ ਟਵੀਟ ਕਾਰਨ ਚਰਚਾ ਵਿਚ ਆਈ ਮਹਿੰਦਰ ਕੌਰ ਨੂੰ ਨਾ ਸਿਰਫ਼ ਦੇਸ-ਵਿਦੇਸ਼ ’ਚ ਵੱਡੀ ਹਮਾਇਤ ਮਿਲ ਰਹੀ ਹੈ, ਬਲਕਿ ਉਸਨੂੰ ਇਕ ਵਿਦੇਸ਼ੀ ਸੰਸਥਾ ਵਲੋਂ ਮਦਰ ਇੰਡੀਆ ਦੇ ਐਵਾਰਡ ਨਾਲ ਸਨਮਾਨਤ ਵੀ ਕੀਤਾ ਜਾ ਚੁੱਕਾ ਹੈ। ਪਤਾ ਲੱਗਿਆ ਹੈ ਕਿ ਮਹਿੰਦਰ ਕੌਰ ਹੁਣ ਮੁੜ ਦਿੱਲੀ ਸੰਘਰਸ਼ ’ਚ ਡਟੀ ਹੋਈ ਹੈ। ਵਕੀਲ ਬਹਿਣੀਵਾਲ ਮੁਤਾਬਕ, ਕੰਗਣਾ ਰਣੌਤ ਨੇ ਬਜ਼ੁਰਗ ਔਰਤ ਮਹਿੰਦਰ ਕੌਰ ਵਿਰੁਧ ਵਿਵਾਦਤ ਟਿੱਪਣੀ ਕਰ ਕੇ ਨਾ ਸਿਰਫ਼ ਉਸਦਾ, ਬਲਕਿ ਸਮੁੱਚੇ ਕਿਸਾਨ ਵਰਗ ਦੀ ਮਾਣਹਾਣੀ ਕੀਤੀ ਹੈ, ਜਿਸਦੇ ਚਲਦੇ ਉਸਨੂੰ ਅਦਾਲਤ ਵਿਚ ਘਸੀਟਿਆ ਜਾਵੇਗਾ। 
ਜ਼ਿਕਰਯੋਗ ਹੈ ਕਿ ਕੰਗਣਾ ਨੇ ਇਕ ਟਵੀਟ ਕਰ ਕੇ ਮਹਿੰਦਰ ਕੌਰ ਨੂੰ ਸ਼ਾਹੀਨ ਬਾਗ਼ ਵਾਲੀ ਔਰਤ ਨਾਲ ਤੁਲਨਾ ਕਰਦਿਆਂ ਕਿਹਾ ਕਿ ਇਹ 100 ਰੁਪਏ ਲਈ ਸੰਘਰਸ਼ ਵਿਚ ਜਾਂਦੀ ਹੈ, ਹਾਲਾਂਕਿ ਬਾਅਦ ਵਿਚ ਉਸਨੇ ਇਹ ਟਵੀਟ ਡਿਲੀਟ ਕਰ ਦਿਤਾ ਸੀ।