image
ਫਾਈਜ਼ਰ ਟੀਕੇ ਦੀ ਉਪਲਬਧਤਾ ਲਈ ਭਾਰਤ ਸਰਕਾਰ ਨਾਲ ਕੰਮ ਕਰਨ ਲਈ ਵਚਨਬੱਧ
ਨਵੀਂ ਦਿੱਲੀ, 3 ਦਸੰਬਰ: ਫ਼ਾਰਮਾਸਿਉਟੀਕਲ ਕੰਪਨੀ ਫਾਈਜ਼ਰ ਨੇ ਵੀਰਵਾਰ ਨੂੰ ਕਿਹਾ ਕਿ ਉਹ ਫਾਈਜ਼ਰ ਅਤੇ ਬਾਇਉਐਨਟੈਕ ਟੀਕਿਆਂ ਨੂੰ ਦੇਸ਼ ਵਿਚ ਉਪਲਬੱਧ ਕਰਵਾਉਣ ਲਈ ਭਾਰਤ ਸਰਕਾਰ ਨਾਲ ਕੰਮ ਕਰਨ ਲਈ ਵਚਨਬੱਧ ਹੈ। ਜ਼ਿਕਰਯੋਗ ਹੈ ਕਿ ਬ੍ਰਿਟੇਨ ਫਾਈਜ਼ਰ ਅਤੇ ਬਾਇਓਐਨਟੈਕ ਟੀਕਿਆਂ ਦੀ ਵਰਤੋਂ ਨੂੰ ਮਨਜ਼ੂਰੀ ਦੇਣ ਵਾਲਾ ਵਿਸ਼ਵ ਦਾ ਪਹਿਲਾ ਦੇਸ਼ ਬਣ ਗਿਆ ਹੈ। ਯੂਕੇ ਡਰੱਗ ਰੈਗੂਲੇਟਰ ਮੈਡੀਸਨਜ਼ ਐਂਡ ਹੈਲਥਕੇਅਰ ਪ੍ਰੋਡਕਟਸ ਰੈਗੂਲੇਟਰੀ ਏਜੰਸੀ ਨੇ ਟੀਕੇ ਨੂੰ ਅਸਥਾਈ ਤੌਰ 'ਤੇ ਮਨਜ਼ੂਰੀ ਦੇ ਦਿਤੀ ਹੈ। ਇਹ ਟੀਕਾ ਅਗਲੇ ਹਫ਼ਤੇ ਤੋਂ ਯੂਕੇ ਵਿਚ ਉਪਲਬੱਧ ਹੋਵੇਗਾ। ਫਾਈਜ਼ਰ ਦੇ ਬੁਲਾਰੇ ਨੇ ਇਕ ਬਿਆਨ ਵਿਚ ਕਿਹਾ ਕਿ ਅਸੀਂ ਇਸ ਸਮੇਂ ਕਈ ਸਰਕਾਰਾਂ ਨਾਲ ਗੱਲਬਾਤ ਦੀ ਪ੍ਰਕਿਰਿਆ ਵਿਚ ਹਾਂ। ਅਸੀਂ ਦੇਸ਼ ਵਿਚ ਟੀਕਾ ਉਪਲਬੱਧ ਕਰਵਾਉਣ ਲਈ ਭਾਰਤ ਸਰਕਾਰ ਨਾਲ ਕੰਮ ਕਰਨ ਲਈ ਵੀ ਵਚਨਬੱਧ ਹਾਂ। ਫਾਈਜ਼ਰ ਨੇ ਕਿਹਾ ਕਿ ਹਰੇਕ ਕੋਲ ਟੀਕੇ ਤਕ ਪਹੁੰਚਣ ਦਾ ਮੌਕਾ ਹੈ। (ਪੀਟੀਆਈ)
