ਫ਼ਿਲਿੰਗ ਪਾਈਪ ਠੀਕ ਕਰਨ ਲਈ ਅਨੰਦਪੁਰ ਸਾਹਿਬ ਹਾਈਡਲ ਨਹਿਰ ਦਾ ਪਾਣੀ ਕੀਤਾ ਬੰਦ
ਕੀਰਤਪੁਰ ਸਾਹਿਬ, 2 ਜੁਲਾਈ (ਜੰਗ ਬਹਾਦਰ ਸਿੰਘ) : ਅਨੰਦਪੁਰ ਸਾਹਿਬ ਹਾਈਡਲ ਪ੍ਰੋਜੈਕਟ ਦੇ ਪਣ ਬਿਜਲੀ ਘਰ ਨੱਕੀਆਂ ਦਾ ਫ਼ਿਲਿੰਗ ਪਾਈਪ ਟੁੱਟਣ ਕਾਰਨ ਡਰਾਫ਼ਟ ਟਿਊਬ ਗੈਲਰੀ ਵਿਚ ਪਾਣੀ ਭਰ ਜਾਣ ਨਾਲ ਪਿਛਲੇ ਦਿਨਾਂ ਤੋਂ ਅਨੰਦਪੁਰ ਸਾਹਿਬ ਹਾਈਡਲ ਚੈਨਲ ਨਹਿਰ ਵਿਚ ਭਾਖੜਾ ਬ੍ਰਾਂਚ ਲਾਈਨ ਨੰਗਲ ਤੋਂ ਆਉਂਦਾ ਪਾਣੀ ਬੰਦ ਕਰ ਦਿਤਾ ਗਿਆ ਹੈ, ਜਿਸ ਕਾਰਨ ਪਣ ਬਿਜਲੀ ਘਰ ਨੱਕੀਆਂ ਤੇ ਗੰਗੂਵਾਲ ਦੀਆਂ ਚਾਰੇ ਮਸ਼ੀਨਾਂ ਨੇ ਬਿਜਲੀ ਦਾ ਉਤਪਾਦਨ ਕਰਨਾ ਬੰਦ ਕਰ ਦਿਤਾ ਹੈ, ਜਿਸ ਨਾਲ ਪੰਜਾਬ ਰਾਜ ਪਾਵਰ ਕਾਰਪੋਰੇਸ਼ਨ ਲਿਮਟਿਡ ਨੂੰ ਰੋਜ਼ਾਨਾ ਕਰੋੜਾ ਰੁਪਏ ਦਾ ਘਾਟਾ ਪੈ ਰਿਹਾ ਹੈ।
ਪਣ ਬਿਜਲੀ ਘਰ ਨੱਕੀਆਂ ਵਿਖੇ ਅਨੰਦਪੁਰ ਸਾਹਿਬ ਹਾਈਡਲ ਪ੍ਰੋਜੈਕਟ ਦੇ ਅਧਿਕਾਰੀ ਤੇ ਕਰਮਚਾਰੀ ਦਿਨ ਰਾਤ ਕੰਮ ਕਰਦੇ ਹੋਏ ਪਾਈਪਾਂ ਰਾਹੀਂ ਡਰਾਫ਼ਟ ਟਿਊਬ ਗੈਲਰੀ ਵਿਚ ਜਮਾਂ ਹੋਏ ਪਾਣੀ ਨੂੰ ਬਾਹਰ ਕੱਢਣ ਵਿਚ ਲੱਗੇ ਹੋਏ ਹਨ। ਇਸ ਕੰਮ ਨੂੰ ਹੋਰ ਕਈ ਦਿਨ ਲੱਗ ਸਕਦੇ ਹਨ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਪੰਜਾਬ ਰਾਜ ਪਾਵਰ ਕਾਰਪੋਰੇਸ਼ਨ ਲਿਮਟਿਡ ਦੇ ਅਨੰਦਪੁਰ ਸਾਹਿਬ ਹਾਈਡਲ ਪ੍ਰੋਜੈਕਟ ਦੇ ਦੋ ਪਣ ਬਿਜਲੀ ਘਰ ਗੰਗੂਵਾਲ ਅਤੇ ਨੱਕੀਆਂ ਚਲ ਰਹੇ ਹਨ। ਇਨਾਂ ਦੋਹਾਂ ਵਿਚ 33.5 ਮੈਗਾਵਾਟ ਦੀਆਂ ਦੋ-ਦੋ ਮਸ਼ੀਨਾਂ ਲੱਗੀਆਂ ਹੋਈਆਂ ਹਨ।
File Photo
ਇਹ ਚਾਰੋ ਮਸ਼ੀਨਾਂ 134 ਮੈਗਾਵਾਟ ਬਿਜਲੀ (ਪ੍ਰਤੀ ਦਿਨ 29 ਲੱਖ ਯੂਨਿਟ) ਦਾ ਉਤਪਾਦਨ ਕਰਦੀਆਂ ਹਨ। ਇਹ ਬਿਜਲੀ ਨਵਾਂ ਸ਼ਹਿਰ ਫੀਡਰ ਇੱਕ, ਨਵਾਂਸ਼ਹਿਰ ਫੀਡਰ ਦੋ ਅਤੇ ਰੋਪੜ ਨੂੰ ਸਪਲਾਈ ਕੀਤੀ ਜਾਂਦੀ ਹੈ। ਇਹਨਾਂ ਚਾਰੇ ਮਸ਼ੀਨਾਂ ਦੁਆਰਾ ਰੋਜ਼ਾਨਾ ਕਰੋੜਾਂ ਰੁਪਏ ਦੀ ਬਿਜਲੀ ਪੈਦਾ ਕੀਤੀ ਜਾਂਦੀ ਹੈ। ਭਰੋਸੇਯੋਗ ਸੂਤਰਾਂ ਨੇ ਦਸਿਆ ਕਿ 29 ਜੂਨ ਰਾਤ ਸਮੇਂ ਪਣ ਬਿਜਲੀ ਘਰ ਨੱਕੀਆਂ ਦੀ ਫ਼ਿਲਿੰਗ ਪਾਈਪ ਜੋ ਅੱਠ ਇੰਚ ਮੋਟੀ ਹੈ,
ਜਿਸ ਦਾ ਕੰਮ ਡਰਾਫਟ ਟਿਊਬ ਵਿਚ ਪਾਣੀ ਭਰਨਾ ਹੈ। ਇਸ ਵਿਚ ਅਚਾਨਕ ਸੁਰਾਖ਼ ਹੋਣ ਕਾਰਨ ਇਹ ਲੀਕ ਕਰਨ ਲੱਗ ਪਿਆ, ਜਿਸ ਕਾਰਨ ਹੇਠਾਂ ਡਰਾਫ਼ਟ ਟਿਊਬ ਗੈਲਰੀ ਵਿਚ ਪਾਣੀ ਭਰ ਗਿਆ ਜੋ ਲਗਾਤਾਰ ਵਧਦਾ ਗਿਆ। ਜਿਸ ਨੂੰ ਰੋਕਣ ਲਈ ਭਾਖੜਾ ਬ੍ਰਾਂਚ ਲਾਈਨ ਨੰਗਲ ਤੋਂ ਅਨੰਦਪੁਰ ਸਾਹਿਬ ਹਾਈਡਲ ਚੈਨਲ ਨਹਿਰ ਵਿਚ ਆ ਰਿਹਾ 10500 ਕਿਊਸਿਕ ਦੇ ਕਰੀਬ ਪਾਣੀ ਨੂੰ ਬੰਦ ਕਰਵਾਉਣਾ ਪਿਆ। ਪਾਣੀ ਬੰਦ ਹੋਣ ਨਾਲ ਗੰਗੂਵਾਲ ਪਣ ਬਿਜਲੀ ਘਰ ਅਤੇ ਨੱਕੀਆਂ ਪਣ ਬਿਜਲੀ ਘਰ ਦੀਆਂ ਚਾਰੇ ਮਸ਼ੀਨਾਂ ਨੇ ਬਿਜਲੀ ਦੀ ਪੈਦਾਵਾਰ ਬੰਦ ਕਰ ਦਿਤੀ ਹੈ।
